1 летапісаў 23 разьдзел

 

 

Як Давід быў стары а насычаны днямі, ён устанавіў Салямона, сына свайго, за караля над Ізраелям.

 

Дык Давід, стары і насычаны гадамі, паставіў Саламона, сына свайго, царом над Ізраэлем,

І зьбер усіх князёў Ізраеля а сьвятароў а Левітаў.

 

і сабраў усіх князёў Ізраэля, і святароў, і левітаў.

І палічаны былі Левіты ад трыццацёх год і вышэй; і быў лік іх, подле галоваў мужчын, трыццаць восьмі тысячаў.

 

І былі палічаны левіты ад трыццаці гадоў і вышэй, і было налічана іх трыццаць восем тысяч мужчын.

«Зь іх загадаваць рамеснаю работаю ў доме СПАДАРОВЫМ дваццаць чатыры тысячы, ураднікаў жа а судзьдзяў шэсьць тысячаў;

 

З іх прызначаны на службу ў доме Госпада — дваццаць чатыры тысячы; а суддзямі былі пастаўлены шэсць тысяч;

І чатыры тысячы брамнікаў, і чатыры тысячы выхваляючых СПАДАРА на снадзях, каторыя я зрабіў да выхваляньня»

 

затым прыдзверных — чатыры тысячы ды столькі ж музыкаў, якія пастаўлены праслаўляць Госпада на музычных інструментах, якія справіў на праслаўленне.

І падзяліў іх Давід на дзелі межы сыноў Левавых — Ґіршома, Когафа а Мерары.

 

Ды падзяліў іх Давід на змены па сынах Леві, гэта значыць Гэрсона, Кагата і Мэрары.

Зь Ґіршомічаў — Ладан а Шымей.

 

З сыноў Гэрсона: Ладан і Сямэй.

Сыны Ладановы: галоўны Егіель а Зэфам а Ёель, трох.

 

Сыны Ладана: князь Ягіэль, і Зэтам, і Ёэль — трое.

Сыны Шымеевы: Шэломоф а Газель а Гаран, трох. Гэтыя галавы айцоў Ладановых.

 

Сыны Сямэя: Саламіт, і Газіэль, і Аран — трое; яны былі кіраўнікамі родаў Ладана.

Сыны Шымеевы: Ягаф, Зыза а Еуш а Бэра. Гэта сыны Шымеевы, чатырох.

 

Затым сыны Сямэя: Ягат, і Зіза, і Ягус, і Бэрыя; гэта сыны Сямэя — чацвёра.

Ягаф быў галоўны, а Зыза другі; але Еуш а Бэра мелі ня шмат сыноў, затым яны былі ў ваднэй лічбе пры доме айца.

 

А Ягат быў першы, Зіза — другі; а Ягус і Бэрыя не мелі шмат дзяцей і таму былі палічаны як адзін род і адна сям’я.

Сыны Когафовы: Амрам, Іцгар, Гэўрон а Узель, чатырох.

 

Сыны Кагата: Амрам, і Ісаар, Геброн і Азіэль — чацвёра.

Сыны Амрамовы: Аарон а Масей. Аарон быў аддзелены на пасьвячэньне да Сьвятога Сьвятых, ён а сынове ягоныя, на векі, каб кадзіць перад відам СПАДАРА, каб служыць Яму і дабраславіць імям Ягоным аж на векі.

 

Сыны Амрама: Аарон і Майсей. І Аарон быў выдзелены, каб складаць ахвяры найсвяцейшыя, ён і сыны яго навек: і каб ён успальваў перад абліччам Госпада, і паслугаваў Яму ды дабраслаўляў імя Яго навек.

І Масей, чалавек Божы, і сыны ягоныя прылічаны да пакаленьня Левавага.

 

Таксама сыны Майсея, чалавека Божага, былі залічаны ў пакаленне Леві.

Сыны Масеявы: Ґершом а Елезэр.

 

Сыны Майсея: Гэрсам і Эліязэр.

Сыны Ґершомавы: першы быў Шэвуель.

 

Сыны Гэрсама: першы — Субаэль.

І былі сыны Елезэравы: Рэгава галоўны. І ня было ў Елезэра іншых сыноў, а ў Рэгавы было вельмі шмат сыноў.

 

Сынамі ж Эліязэра былі: Рагобія — першы, ды не было ў Эліязэра іншых сыноў; а сыны Рагобіі надта распладзіліся.

Сыны Іцгаровы: Шэломіф, галоўны.

 

Сыны Ісаара: Саламот — першы.

Сыны Гэўронавы: Ера галоўны а Амара другі, Ягазель трэйці а Екамеам чацьверты.

 

Сыны Геброна: Ерыяў — першы, Амарыя — другі, Яхазіэль — трэці, Екмаам — чацвёрты.

Сыны Узелявы: Міха галоўны, Іша другі.

 

Сыны Азіэля: Міха — першы, Ясія — другі.

Сыны Мераравы: Маглі а Мушы. Сыны Маглявы: Елеазар а Кіш.

 

Сыны Мэрары: Махалі і Мусі. Сыны Маголі: Элеязэр і Кіс;

І памер Елеазар, і ня было ў яго сыноў, адно дачкі; і ўзялі іх да сябе Кішанкі, браты іхныя.

 

а Элеязэр памёр ды не меў сыноў, але дачок, і ўзялі іх за жонак сыны Кіса, браты іх.

Сыны Мушавы: Маглі а Едэр а Ірэмоф, трох.

 

Сыны Мусі: Махалі, і Эдэр, і Ярмут — трое.

Гэта сынове Левавы, подле дому айцоў сваіх, галавы радзімаў, як яны былі палічаны іменным лічэньням подле галоў іх, каторыя рабілі работу служэньня ў доме СПАДАРОВЫМ, ад дваццацёх год і вышэй.

 

Гэта сыны Леві па іх родах, кіраўнікі сем’яў па змене і па ліку паасобных галоў, якія спаўнялі службу ў доме Госпада ад дваццаці гадоў і вышэй.

Бо Давід сказаў: «СПАДАР, Бог Ізраеляў, даў супакой люду Свайму, і ён будзе жыць у Ерузаліме на векі,

 

Давід бо сказаў: «Госпад, Бог Ізраэля, даў супакой народу Свайму ды будзе жыць у Ерузаліме вечна;

І таксама Левітам ня трэба насіць вітальні й усялякіх снадзяў яе да службы ў ёй».

 

і левіты не будуць мець абавязку далей насіць палатку, ды ўсе пасудзіны яе да службы».

Затым, подле апошніх слоў Давідавых, палічаны Левіты ад дваццацёх год і вышэй,

 

Дык па апошнім загадзе Давіда левіты будуць залічаны ад дваццаці гадоў і вышэй,

Бо ўрад іхны быў ля сыноў Ааронавых, да паслугі дому СПАДАРОВАМУ, на панадворках а ў залях, і дзеля чысьціні ўсяго сьвятога, і работы служэньня пры доме Божым,

 

і яны будуць пад рукой сыноў Аарона на паслузе дома Госпадава — на панадворках і ў пакоях, і пры ачышчэнні ўсяго, што пасвечана, ды спаўняць паслугу ў святыні Бога,

І да хлябоў Выкладу, і да ценькае мукі хлебнага аброку, і прэсных перапечак, і печанага на скварадзе, і смажанага, і ўсялякае меры а памеру,

 

яны рупіліся пра хлябы пакладныя, і пра муку на ахвяру з ежы, і пра праснакі, і пра патэльню, і пра смажанне, і пра ўсё, што было ўзважана і адмерана.

І каб станавіліся кажнае раніцы дзякаваць а выхваляць СПАДАРА, таксама і ўвечары,

 

І мелі стаяць штораніцы, каб дзякаваць Госпаду і славіць Яго, і таксама вечарам;

І пры ўсіх усепаленьнях, абраканых СПАДАРУ ў сыботы, на маладзіку і ў сьвяты, лікам, подле парадку прызначанага ім, — кажначасна перад відам СПАДАРА,

 

і каб складаць усе цэласпаленні Госпаду, і каб у шабат, і на маладзік, і ў астатнія святы па ўстаноўленым ліку і рытуалах кожнай справы — заўсёды перад абліччам Госпада.

І каб адбывалі старожу пры будане збораў на прызначаныя поры, і старожу сьвятыні, і старожу сыноў Ааронавых, братоў сваіх, на службе дому СПАДАРОВАГА.

 

І хай яны пільнуюць правілы палаткі сустрэчы, і рытуал свяцілішча, і пабожнасць сыноў Аарона, іх братоў, у службе ў доме Госпадавым.