Лічбаў 12 Лічбаў 12 разьдзел

¹ А Мірыям і Аарон гаварылі супраць Майсея з-за яго жонкі-кушыткі

² і казалі: «Ці ж толькі праз аднаго Майсея гаварыў Госпад? Ці таксама і праз нас не гаварыў Ён?» Калі пачуў гэта Госпад —

³ а Майсей быў найпакорлівейшы з усіх людзей, якія жылі на зямлі, —

⁴ сказаў раптам Госпад да Майсея і да Аарона, і да Мірыям: «Толькі вы ўтраіх падыдзіце да палаткі сустрэчы». І, калі яны падышлі,

⁵ Госпад сышоў у слупе воблачным і затрымаўся ля ўваходу ў палатку, клікаючы Аарона і Мірыям. Калі яны ўвайшлі,

⁶ сказаў Ён ім: «Слухайце словы Мае! Калі хто паміж вас будзе прарок Госпадаў, Я з’яўлюся яму ў з’яве, або ў снах буду гаварыць з ім.

⁷ Але не такі паслугач Мой Майсей, які найвярнейшы ва ўсім доме Маім!

⁸ Бо вуснамі ў вусны кажу яму, і адкрыта, а не праз згадкі і ўяўленні бачыць ён Госпада! Дык чаму асмеліліся вы дакараць паслугача Майго Майсея?»

⁹ І, загневаўшыся на іх, Ён адышоў,

¹⁰ таксама знікла воблака, што было над скініяй; і вось, Мірыям зрабілася белая, як снег, ад праказы. І калі Аарон павярнуўся да яе і ўбачыў яе, пашкоджаную праказай,

¹¹ сказаў ён Майсею: «Прашу, гаспадару мой, не карай нас за той грэх, які мы ўчынілі па дурноце,

¹² каб не была яна, быццам мёртвая і як выкідыш, які выходзіць з улоння маці сваёй».

¹³ І прасіў Майсей Госпада, кажучы: «Божа, прашу, аздараві яе!»

¹⁴ Адказаў яму Госпад: «Калі б бацька яе плюнуў ёй у твар, ці не павінна была б яна сем дзён чырванець ад сораму? Хай яна на сем дзён аддзеліцца ад лагера, а потым вернецца».

¹⁵ Дык выдалена была Мірыям па-за лагер на сем дзён, а народ не рухаўся з таго месца, пакуль Мірыям не вярнулася.