Лічбаў 34 Лічбаў 34 разьдзел

¹ Далей казаў Госпад Майсею, гаворачы:

² «Загадай сынам Ізраэля і скажы ім: “Калі ўвойдзеце ў зямлю гэтую Ханаан, тады абшар, які выпадзе па жэрабі вам ва ўласнасць, хай будзе ў гэтых межах.

³ Паўднёвая мяжа хай будзе ад пустыні Сін, уздоўж Эдома, і хай мяжуецца на ўсходзе з морам Салёным.

⁴ Хай яны звернуць на поўдзень да ўзвышша Акрабім, каб, такім чынам, пайсці праз Сін і дасягнуць на поўдні Кадэс-Барнэ, а адтуль выйсці да Асарадара і дайсці аж да Асэмона.

⁵ Ад Асэмона хай паверне мяжа да ручая Егіпецкага і спыніцца хай на беразе Вялікага мора.

⁶ Вашай мяжой заходняй хай будзе Вялікае мора, гэта будзе ваша заходняя мяжа.

⁷ А на поўначы хай будзе ў вас мяжа, пачынаючы ад Вялікага мора і аж да гары Гор,

⁸ ад якой павядзіце мяжу да ўваходу ў Эмат і далей, да межаў Сэдада.

⁹ Потым хай пойдзе мяжа да Зэфрона і Асарэнона. Такія хай будуць межы з поўначы.

¹⁰ Усходнюю мяжу правядзіце ад Асарэнона да Сэпама,

¹¹ і ад Сэпама хай пойдзе мяжа ў напрамку Рэблы на ўсход ад Аіна, адтуль хай пойдзе далей і дасягне на ўсходзе боку мора Кінэрэт,

¹² і працягнецца аж да Ярдана, і спыніцца, нарэшце, пры моры Салёным. Гэта хай будзе зямля вашая з межамі сваімі вакол”».

¹³ І, кажучы, загадаў Майсей сынам Ізраэля: «Гэта хай будзе зямля, якую маеце падзяліць па жэрабі і якую загадаў Госпад даць дзевяці пакаленням і палове пакалення.

¹⁴ Бо пакаленне сыноў Рубэна па сем’ях сваіх, і пакаленне сыноў Гада па ліку родаў, і палова пакалення Манасы атрымалі ўжо сваю ўласнасць;

¹⁵ гэтыя два і палова пакаленні ўзялі сваю ўласнасць па той бок Ярдана насупраць Ерыхона на ўсходзе».

¹⁶ І сказаў Госпад Майсею:

¹⁷ «Гэта імёны людзей, якія падзеляць вам зямлю: Элеязэр святар, і Ешуа, сын Нуна,

¹⁸ і адзін князь з кожнага пакалення, каб падзяліць зямлю ва ўласнасць,

¹⁹ імёны якіх наступныя: з пакалення Юды — Калеб, сын Ефоны;

²⁰ з пакалення Сімяона — Самуэль, сын Аміюда;

²¹ з пакалення Бэньяміна — Элідад, сын Хаселона;

²² з пакалення сыноў Дана — Бокцы, сын Ёглі.

²³ З сыноў Язэпа: з пакалення Манасы — Ханіэль, сын Эфода;

²⁴ з пакалення Эфраіма — Кемуэль, сын Сэфтана.

²⁵ З пакалення Забулона — Элісафан, сын Парнаха;

²⁶ з пакалення Ісахара — кіраўнік Палціэль, сын Азана;

²⁷ з пакалення Асэра — Ахіюд, сын Саломі;

²⁸ з пакалення Нэфталі — Пэдаэль, сын Аміюда».

²⁹ Вось тыя, каму загадаў Госпад падзяліць зямлю Ханаан між сыноў Ізраэля.