Лічбаў 2 Лічбаў 2 разьдзел

¹ І казаў Госпад Майсею і Аарону, гаворачы:

² «Хай сыны Ізраэля стануць лагерам: кожны пад сваім сцягам, пад знакамі бацькоў сваіх, навокал палаткі сустрэчы на адлегласці.

³ З усходу хай стаіць лагер Юды па дружынах войска яго, а кіраўніком сыноў яго хай будзе Наасон, сын Амінадаба;

⁴ і лік яго ваяроў — семдзесят чатыры тысячы шэсцьсот.

⁵ Побач з ім хай стануць лагерам людзі калена Ісахарава, кіраўніком якіх мае быць Натанаэль, сын Суара;

⁶ і ўвесь лік ваяроў яго — пяцьдзесят чатыры тысячы чатырыста.

⁷ У пакаленні Забулона кіраўніком хай будзе Эліяб, сын Гэлона; і лік ваяроў —

⁸ пяцьдзесят сем тысяч чатырыста.

⁹ Усіх палічаных у лагеры Юды хай будзе сто восемдзесят шэсць тысяч чатырыста, і хай па дружынах сваіх яны першыя будуць выходзіць.

¹⁰ З паўднёвага боку хай будзе сцяг лагера Рубэна па яго войсках, а кіраўнік — Элісур, сын Сэдэура;

¹¹ і ўсё войска ваяроў яго паводле падліку хай мае сорак шэсць тысяч пяцьсот.

¹² Побач з імі хай стануць лагерам людзі з пакалення Сімяона, а кіраўніком іх — хай Саламіэль, сын Сурысадая;

¹³ і ўсё войска ваяроў яго паводле падліку хай мае пяцьдзесят дзевяць тысяч трыста.

¹⁴ У пакаленні Гада кіраўніком хай будзе Эліясаф, сын Дэуэля;

¹⁵ і ўсё войска ваяроў яго паводле падліку хай мае сорак пяць тысяч шэсцьсот пяцьдзесят.

¹⁶ Усіх палічаных у лагеры Рубэна — сто пяцьдзесят адна тысяча чатырыста пяцьдзесят; хай яны выходзяць другімі па сваіх дружынах.

¹⁷ Пасля хай здымецца з месца палатка сустрэчы і лагер левітаў у сярэдзіне іншых лагераў, хай яна здымаецца так, як ставіцца; хай усе пускаюцца ў дарогу на сваіх месцах і пад сваім сцягам.

¹⁸ З заходняга боку хай будзе сцяг лагера Эфраіма па дружынах яго, кіраўніком іх хай будзе Элісама, сын Аміюда;

¹⁹ усё войска ваяроў яго паводле падліку хай мае сорак тысяч пяцьсот.

²⁰ І з імі пакаленне сыноў Манасы, кіраўніком якіх хай будзе Гамаліэль, сын Падасура;

²¹ і ўсё войска ваяроў яго паводле падліку хай мае трыццаць дзве тысячы дзвесце.

²² І пакаленні сыноў Бэньяміна; кіраўніком хай будзе Абідан, сын Гедэона;

²³ і ўсё войска ваяроў яго паводле падліку хай мае трыццаць пяць тысяч чатырыста.

²⁴ Усіх палічаных у лагеры Эфраіма — сто восем тысяч сто; і хай па дружынах сваіх яны выходзяць трэція.

²⁵ З паўночнага боку адпаведна сваім дружынам хай стаіць сцяг лагера сыноў Дана, а кіраўніком іх хай будзе Ахіязэр, сын Амісадая;

²⁶ усё войска ваяроў яго паводле падліку хай мае шэсцьдзесят дзве тысячы семсот.

²⁷ Побач з ім хай стане лагерам пакаленне Асэра, кіраўніком іх хай будзе Пэгіэль, сын Акрана;

²⁸ усё войска ваяроў яго паводле падліку хай мае сорак адну тысячу пяцьсот.

²⁹ З пакалення сыноў Нэфталі кіраўніком хай будзе Ахіра, сын Энана;

³⁰ усё войска ваяроў яго — пяцьдзесят тры тысячы чатырыста.

³¹ Усіх палічаных у лагеры Дана хай будзе сто пяцьдзесят сем тысяч шэсцьсот, і хай яны самымі апошнімі выходзяць пад сваімі сцягамі».

³² Гэта лік сыноў Ізраэля, усе яны палічаны па сем’ях бацькоў сваіх адпаведна войскам сваім — шэсцьсот тры тысячы пяцьсот пяцьдзесят.

³³ А левіты не былі палічаны разам з сынамі Ізраэля; бо так загадаў Госпад Майсею.

³⁴ І сыны Ізраэля споўнілі ўсё, што загадаў Госпад: сталі лагерам пад сваімі сцягамі і выйшлі паводле пакаленняў і сем’яў бацькоў сваіх.