Лукаша 3 разьдзел

 

 

А ў пятнаццаты год панаваньня цэзара Тыбэрыя, калі Понтый Пілат панаваў у Юдэі, Ірад быў тэтрархам у Галілеі, Філіп, брат ягоны, — тэтрархам у Ітурэі і раханіцкай краіне, а Лісані — тэтрархам у Абіліне,

 

У пятнаццатым годзе панаваньня цэзара Тыбэрыя, калі Понці Пілат начальнічаў у Юдэі, а Герод быў тэтрархам Галілеі, а брат яго Філіп — тэтрархам Ітурэі і Траханіцкай краіны, а Лісані — тэтрархам Абіліны,

пры першасьвятарах Аньне і Каяфе было слова Божае да Яна, сына Захарыі, у пустыні.

 

пры першасьвятарах Аньне і Каяфе было слова Бога да Яна, сына Захарыі, у пустыні.

І ён праходзіў па ўсіх ваколіцах Ярданскіх, прапаведуючы хрышчэньне навяртаньня дзеля адпушчэньня грахоў,

 

І праходзіў ён усю зямлю вакол Ярдану, вешчучы хрост навярненьня дзеля адпушчэньня грахоў,

як напісана ў кнізе словаў прарока Ісаі, які кажа: «Голас таго, хто кліча ў пустыні: “Падрыхтуйце шлях Госпаду, простымі рабіце сьцежкі Яго;

 

як напісана ў кнізе словаў Ісаі прарока: "Голас гамонячага ў пустыні: Прыгатуйце дарогу Госпаду, прастуйце сьцежкі Яму.

усякі дол няхай напоўніцца, і ўсякая гара і ўзгорак няхай панізяцца, крывізны няхай выпрастуюцца, і няроўныя шляхі зробяцца гладкімі;

 

Хай усякая яма будзе засыпана, і кожная гара і ўзгорак хай будуць паніжаны, і крывыя дарогі хай будуць выпрастаны, а выбоістыя хай будуць выраўнены,

і ўгледзіць усякае цела збаўленьне Божае”».

 

і хай кожны чалавек убачыць збаўленьне Божае".

І казаў ён натоўпам, якія прыходзілі хрысьціцца ў яго: «Спараджэньні яхідны, хто перасьцярог вас, каб уцякалі ад гневу, які надыходзіць?

 

Грамадам, што прыходзілі да яго атрымаць хрост, гаварыў: "Зьмяінае племя, хто навучыў вас уцякаць ад будучага гневу?

Зрабіце плады, годныя навяртаньня, і не пачынайце гаварыць у сабе: “Бацьку маем Абрагама”, бо кажу вам, што Бог можа з камянёў гэтых падняць дзяцей Абрагаму.

 

Рабіце дастойныя плады навярненьня, і перастаньце хваліцца між сабой: "Маем бацьку Абрагама"; кажу вам, што Бог можа з гэтых каменьняў падняць сыноў Абрагаму.

Ужо і сякера ля кораня дрэваў ляжыць; усякае дрэва, якое не прыносіць добрага плоду, сьсякаецца і кідаецца ў агонь».

 

Ужо вось сякера прыложана да карэньняў дрэваў, усякае бо дрэва, што не дае добрага плоду, будзе сьсечана і кінута ў агонь.

І спытаўся ў яго натоўп, кажучы: «Дык што нам рабіць?»

 

Дык пыталіся ў яго грамады: "Што тады маем рабіць?"

А ён, адказваючы, кажа ім: «Хто мае дзьве вопраткі, няхай дасьць таму, хто ня мае; і хто мае ежу, няхай робіць тое самае».

 

Ён у адказ гаварыў ім: "Хто мае дзьве адзежы, хай дасьць таму, хто ня мае. І хто мае яду, хай зробіць падобна".

Прыйшлі і мытнікі хрысьціцца, і сказалі яму: «Настаўнік, што нам рабіць?»

 

Прыходзілі таксама мытнікі, каб атрымаць хрост, і яны пыталіся ў яго: "Вучыцелю, што мы маем рабіць?"

А ён сказаў ім: «Нічога не бярыце больш таго, што вам загадана».

 

А ён і ім казаў: "Нічога не рабіце больш таго, што вам прызначана".

Пыталіся ў яго таксама жаўнеры, кажучы: «А нам што рабіць?» І ён сказаў ім: «Нікога ня крыўдзьце, не абвінавачвайце фальшыва і задавальняйцеся платай сваёй».

 

Пыталіся ў яго таксама жаўнеры: "А што мы маем рабіць?" А ён ім сказаў: "Нікога ня біце, не ўціскайце і будзьце задаволены сваёю платаю".

І народу, які чакаў і разважаў у сэрцах сваіх адносна Яна, ці не Хрыстос ён,

 

А калі народ сумняваўся ды ўсе ў душы пачыналі разважаць пра Яна, ці ён часам ня Хрыстос,

адказаў Ян усім, кажучы: «Я хрышчу вас вадою, але ідзе Дужэйшы за мяне, у Якога я ня варты разьвязаць рамень сандалаў Ягоных. Ён будзе хрысьціць вас Духам Сьвятым і агнём.

 

Ян адказваў усім, кажучы: "Я хрышчу вас вадою. Але прыйдзе дужэйшы ад мяне, катораму Я ня варты разьвязаць рамень Яго сандалаў. Ён будзе вас хрысьціць Духам Сьвятым і агнём.

Веялка Ягоная ў руцэ Яго, і Ён ачысьціць ток Свой, і зьбярэ пшаніцу ў сьвіран Свой, а салому спаліць агнём незгасальным».

 

Ён трымае ў руцэ сваёй веялку і ачысьціць ток свой, ды зьбярэ пшаніцу ў сьвіран свой, а салому спаліць у агні незгасальным.

І шмат іншага дабравесьціў ён народу, навучаючы яго.

 

Многа таксама іншага навучаючы, абвяшчаў народу добрую вестку.

А Ірад тэтрарх, дакараны ім за Ірадыяду, жонку Філіпа, брата ягонага, і за ўсё, што Ірад зрабіў злога,

 

Але Герод, тэтрарха, напамінаны Янам дзеля Герадыяды, жонкі брата свайго, ды дзеля іншых ліхіх паступкаў, якіх дапускаўся Герод,

дадаў да ўсяго і тое, што замкнуў Яна ў вязьніцу.

 

дадаў да ўсяго і тое, што пасадзіў Яна ў вязьніцу.

І сталася, калі хрысьціўся ўвесь народ, і Ісус, ахрысьціўшыся, маліўся, адчынілася неба,

 

І сталася, калі ўвесь народ хрысьціўся, і Езус быў ахрышчаны і маліўся, адкрылася неба,

і Дух Сьвяты зыйшоў на Яго ў цялесным выглядзе, як голуб, і быў голас з неба, які казаў: «Ты — Сын Мой Улюбёны; у Табе Я маю ўпадабаньне».

 

і Дух Сьвяты цялесна ў выглядзе галуба зыйшоў на Езуса. І азваўся голас з неба: "Ты — Сын Мой улюблёны, у Табе Маё ўпадабаньне".

І меў Ісус, пачынаючы [служэньне], гадоў каля трыццаці, і быў, як думалі, сын Язэпаў, Гэліяў,

 

Езус меў каля трыццаці гадоў, калі пачынаў (сваё служэньне), і быў уважаны за сына Язэпа, сына Гелія, сына Матата,

Мататаў, Левіяў, Мэльхіяў, Янаяў, Язэпаў,

 

сына Левія, сына Мэльхі, сына Янная, сына Язэпа,

Мататыяў, Амосаў, Навумаў, Эсьліяў, Нагеяў,

 

сына Мататыя, сына Амоса, сына Нагума, сына Эсьлі, сына Нагая,

Магатаў, Мататыяў, Сэмэяў, Язэпаў, Юдаў,

 

сына Магата, сына Мататыя, сына Сэмэя, сына Ясэха, сына Ёда,

Яанаяў, Рэсаеў, Зэрубабэляў, Салятыэляў, Нэрыяў,

 

сына Яна, сына Рэсы, сын Зарабабэля, сына Салятыеля, сына Нэрыя,

Мэльхіяў, Аддыяў, Касамаў, Эльмадамаў, Іраў,

 

сына Мэльхі, сына Адыя, сына Касама, сына Эльмадама, сына Гера,

Ёсіяў, Эліезэраў, Ярымаў, Мататаў, Левіяў,

 

сына Ёзуэ, сына Эліезэра, сына Ярыма, сына Матата, сына Левія,

Сымонаў, Юдаў, Язэпаў, Янанаў, Эліякімаў,

 

сына Сымона, сына Юды, сына Язэпа, сына Ёны, сына Эліякіма,

Мэлеаяў, Маінанаў, Мататаў, Натанаў, Давідаў,

 

сына Мэлея, сына Мэнны, сына Матата, сына Натана, сына Давіда,

Есэяў, Абэдаў, Боазаў, Сальмонаў, Наасонаў,

 

сынам Есэя, сына Абэда, сына Баоза, сына Сальмона, сына Наасона,

Амінадабаў, Арамаў, Эсромаў, Пэрэсаў, Юдаў,

 

сына Амінадаба, сына Адміна, сына Арнія, сынам Эсрома, сына Фарэса, сына Юды,

Якубаў, Ісаакаў, Абрагамаў, Тэрахаў, Нахораў,

 

сына Якуба, сына Ізаака, сына Абрагама, сына Тарэ, сына Нахора,

Сэрухаў, Рагаваў, Фалекаў, Гэбэраў, Салаў,

 

сына Сэруха, сына Рагава, сына Фалека, сына Гебэра, сына Сале,

Каінанаў, Арфаксадаў, Сэмаў, Нояў, Лямэхаў,

 

сына Кайнана, сына Арфаксада, сына Сэма, сына Ноя, сына Лямэха,

Мэтушаляхаў, Энохаў, Ярэдаў, Магалялеэляў, Кейнанаў,

 

сына Матузаля, сына Геноха, сына Ярэда, сына Малялеэля, сына Кайнана,

Эносаў, Сэтаў, Адамаў, Божы.

 

сынам Геноса, сына Сэта, сына Адама, сына Божага.