Лукаша 3 разьдзел

 

 

А ў пятнаццаты год праўленьня Тыверыя кесара, калі Понцій Пілат начальнічаў у Юдэі, Ірад быў тэтрархам у Галілеі, Піліп, брат ягоны, — тэтрархам у Ітурэі і Траханіцкай вобласьці, а Лісаній — тэтрархам у Авілінеі,

 

У пятнаццатым годзе панаваньня цэзара Тыбэрыя, калі Понці Пілат начальнічаў у Юдэі, а Герод быў тэтрархам Галілеі, а брат яго Філіп — тэтрархам Ітурэі і Траханіцкай краіны, а Лісані — тэтрархам Абіліны,

пры першасьвятарах Ганьне і Каяфе, быў голас Божы да Яна, сына Захара, у пустыні.

 

пры першасьвятарах Аньне і Каяфе было слова Бога да Яна, сына Захарыі, у пустыні.

І ён пайшоў па ўсіх навакольлях Ярдана, прапаведуючы хрышчэньне пакаяньня на дараваньне грахоў,

 

І праходзіў ён усю зямлю вакол Ярдану, вешчучы хрост навярненьня дзеля адпушчэньня грахоў,

як напісана ў кнізе слоў прарока Ісаі, які кажа: «голас таго, хто кліча ў пустыні: падрыхтуйце шлях Госпаду, простымі зрабеце сьцежкі Яму;

 

як напісана ў кнізе словаў Ісаі прарока: "Голас гамонячага ў пустыні: Прыгатуйце дарогу Госпаду, прастуйце сьцежкі Яму.

кожны дол хай напоўніцца, і кожная гара і пагорак хай абнізяцца, крывізны выпрастуюцца, і няроўныя дарогі зробяцца гладкімі;

 

Хай усякая яма будзе засыпана, і кожная гара і ўзгорак хай будуць паніжаны, і крывыя дарогі хай будуць выпрастаны, а выбоістыя хай будуць выраўнены,

і ўбачыць кожная плоць ратунак Божы».

 

і хай кожны чалавек убачыць збаўленьне Божае".

Ян люду, што прыходзіў хрысьціцца ў яго, казаў: выродзьдзе яхідніна? хто намовіў вас уцякаць ад будучага гневу?

 

Грамадам, што прыходзілі да яго атрымаць хрост, гаварыў: "Зьмяінае племя, хто навучыў вас уцякаць ад будучага гневу?

прынясеце ж плады годныя пакаяньня, і ня думайце гаварыць самі сабе: «бацька ў нас Абрагам»; бо кажу вам, што Бог можа з камянёў гэтых узьвесьці дзяцей Абрагаму;

 

Рабіце дастойныя плады навярненьня, і перастаньце хваліцца між сабой: "Маем бацьку Абрагама"; кажу вам, што Бог можа з гэтых каменьняў падняць сыноў Абрагаму.

ужо і сякера пры корані дрэваў ляжыць: бо ўсякае дрэва, якое ня родзіць добрага плоду, сьсякаюць і кідаюць у вагонь.

 

Ужо вось сякера прыложана да карэньняў дрэваў, усякае бо дрэва, што не дае добрага плоду, будзе сьсечана і кінута ў агонь.

І пыталіся ў яго людзі: што ж нам рабіць?

 

Дык пыталіся ў яго грамады: "Што тады маем рабіць?"

Ён сказаў ім у адказ: у каго дзьве адзежыны, той дай таму, хто ня мае; і ў каго ёсьць ежа, рабі тое самае.

 

Ён у адказ гаварыў ім: "Хто мае дзьве адзежы, хай дасьць таму, хто ня мае. І хто мае яду, хай зробіць падобна".

Прыйшлі і мытнікі хрысьціцца і сказалі яму: Настаўнік! што нам рабіць?

 

Прыходзілі таксама мытнікі, каб атрымаць хрост, і яны пыталіся ў яго: "Вучыцелю, што мы маем рабіць?"

Ён адказваў ім: нічога не патрабуйце больш вызначанага вам.

 

А ён і ім казаў: "Нічога не рабіце больш таго, што вам прызначана".

Пыталіся ў яго таксама і воі: а нам што рабіць? І сказаў ім: нікога ня крыўдзіце, не паклёпнічайце, і задавольвайцеся сваёй платай.

 

Пыталіся ў яго таксама жаўнеры: "А што мы маем рабіць?" А ён ім сказаў: "Нікога ня біце, не ўціскайце і будзьце задаволены сваёю платаю".

А калі люд быў у чаканьні, і ўсе думалі ў сэрцах сваіх пра Яна, ці ня Хрыстос ён, —

 

А калі народ сумняваўся ды ўсе ў душы пачыналі разважаць пра Яна, ці ён часам ня Хрыстос,

Ян усім адказваў: я хрышчу вас вадою, але ідзе Мацнейшы за мяне, у Якога я няварты разьвязаць рэмень на абутку; Ён будзе хрысьціць вас Духам Сьвятым і вагнём;

 

Ян адказваў усім, кажучы: "Я хрышчу вас вадою. Але прыйдзе дужэйшы ад мяне, катораму Я ня варты разьвязаць рамень Яго сандалаў. Ён будзе вас хрысьціць Духам Сьвятым і агнём.

гарфа Ягоная ў руцэ Ягонай, і Ён ачысьціць гумно Сваё і зьбярэ пшаніцу ў засекі Свае, а салому спаліць вагнём непагасным.

 

Ён трымае ў руцэ сваёй веялку і ачысьціць ток свой, ды зьбярэ пшаніцу ў сьвіран свой, а салому спаліць у агні незгасальным.

Шмат чаго іншага зьвеставаў ён народу, павучаючы яго.

 

Многа таксама іншага навучаючы, абвяшчаў народу добрую вестку.

А Ірад тэтрарх, дакараны ім за Ірадыяду, жонку братавую, і за ўсё, што зрабіў Ірад благога,

 

Але Герод, тэтрарха, напамінаны Янам дзеля Герадыяды, жонкі брата свайго, ды дзеля іншых ліхіх паступкаў, якіх дапускаўся Герод,

дадаў да ўсяго іншага і тое, што ўвязьніў Яна ў цямніцу.

 

дадаў да ўсяго і тое, што пасадзіў Яна ў вязьніцу.

А калі ахрысьціўся ўвесь народ, і Ісус, ахрысьціўшыся, маліўся, — адчынілася неба,

 

І сталася, калі ўвесь народ хрысьціўся, і Езус быў ахрышчаны і маліўся, адкрылася неба,

і Дух Сьвяты сышоў на Яго ў цялесным вобразе, як голуб, і быў голас зь нябёсаў, які прамовіў: Ты Сын Мой любасны; Цябе Я ўпадабаў!

 

і Дух Сьвяты цялесна ў выглядзе галуба зыйшоў на Езуса. І азваўся голас з неба: "Ты — Сын Мой улюблёны, у Табе Маё ўпадабаньне".

Ісус, пачынаючы Сваё служэньне, быў гадоў трыццаці, і быў, як думалі, сын Язэпаў, Іліеў,

 

Езус меў каля трыццаці гадоў, калі пачынаў (сваё служэньне), і быў уважаны за сына Язэпа, сына Гелія, сына Матата,

Мататаў, Левіінаў, Мэлхіеў, Янаеў, Язэпаў,

 

сына Левія, сына Мэльхі, сына Янная, сына Язэпа,

Мататыеў, Амосаў, Навумаў, Ясьлімаў, Нагееў.

 

сына Мататыя, сына Амоса, сына Нагума, сына Эсьлі, сына Нагая,

Маатаў, Мататыеў, Сэмяіеў, Язэпаў, Юдаў,

 

сына Магата, сына Мататыя, сына Сэмэя, сына Ясэха, сына Ёда,

Ёананаў, Рысаеў, Зарававэлеў, Салатыілеў, Нірыеў,

 

сына Яна, сына Рэсы, сын Зарабабэля, сына Салятыеля, сына Нэрыя,

Мэлхіеў, Аддзіеў, Касамаў, Элмадамаў, Іраў,

 

сына Мэльхі, сына Адыя, сына Касама, сына Эльмадама, сына Гера,

Ёсіеў, Эліезэраў, Ёрымаў, Мататаў, Левіінаў,

 

сына Ёзуэ, сына Эліезэра, сына Ярыма, сына Матата, сына Левія,

Сымонаў, Юдаў, Язэпаў, Ёнанаў, Іліякімаў,

 

сына Сымона, сына Юды, сына Язэпа, сына Ёны, сына Эліякіма,

Мэлеаеў, Маінанаў, Мататаеў, Натанаў, Давідаў,

 

сына Мэлея, сына Мэнны, сына Матата, сына Натана, сына Давіда,

Ясэеў, Авідаў, Ваозаў, Салмонаў, Наасонаў,

 

сынам Есэя, сына Абэда, сына Баоза, сына Сальмона, сына Наасона,

Амінадаваў, Арамаў, Ісромаў, Фарэсаў, Юдаў,

 

сына Амінадаба, сына Адміна, сына Арнія, сынам Эсрома, сына Фарэса, сына Юды,

Якаваў, Ісакаў, Абрагамаў, Тараў, Нахораў,

 

сына Якуба, сына Ізаака, сына Абрагама, сына Тарэ, сына Нахора,

Сэрухаў, Рагаваў, Фалекаў, Івераў, Салаў,

 

сына Сэруха, сына Рагава, сына Фалека, сына Гебэра, сына Сале,

Каінанаў, Арфаксадаў, Сімаў, Ноеў, Ламэхаў,

 

сына Кайнана, сына Арфаксада, сына Сэма, сына Ноя, сына Лямэха,

Матусалаў, Інохаў, Ярэдаў, Малелеілаў, Каінанаў,

 

сына Матузаля, сына Геноха, сына Ярэда, сына Малялеэля, сына Кайнана,

Іносаў, Сітаў, Адамаў, Божы.

 

сынам Геноса, сына Сэта, сына Адама, сына Божага.