3 Яна 1 разьдзел

 

 

Старац — любаснаму Гаію, якога я ў ісьціне люблю.

 

Старшы — дарагому Гаю, каторага люблю ў праўдзе.

Любасны! малюся, каб табе здаровілася і шчасьціла ва ўсім, як шчасьціць душы тваёй.

 

Умілаваны, прагну табе ва ўсім пасьпяховасьці і здароўя так, як шчасьліва чуецца душа твая.

Бо я вельмі ўсьцешыўся, калі прыйшлі браты і засьведчылі пра тваю вернасьць, як ты ходзіш у ісьціне.

 

Вельмі ўзрадаваўся я з прыбыцьця братоў, якія засьведчылі праўду тваю ды што ты жывеш справядліва.

Няма мне большае радасьці, як чуць, што дзеці мае ходзяць у ісьціне.

 

Для мяне няма большай радасьці, як пачуць, што дзеці мае ходзяць у праўдзе.

Любасны! ты як верны дзееш у тым, што робіш братам і вандроўнікам;

 

Ты, умілаваны, вернае робіш, калі дапамагаеш братам, а асабліва падарожным,

яны засьведчылі перад царквою пра любоў тваю; ты добра зробіш, калі адпусьціш іх, як яно трэба дзеля Бога,

 

якія засьведчылі тваю любоў перад царквою. Ты добра зробіш, заагледзеўшы іх на дарогу па-Божаму.

бо яны дзеля імя Ягонага пайшлі, ня ўзяўшы нічога ад язычнікаў.

 

Бо выбраліся яны ў дарогу ў імя Яго, не прыймаючы нічога ад паганаў.

Дык вось павінны мы прымаць іх такіх, каб зрабіцца спрыяльнікамі ісьціне.

 

Таму мусім гасьцінна прыймаць такіх людзей для супольнай працы з імі для праўды.

Я пісаў быў царкве; але Дыятрэф, які любіць быць першым у іх, ня прымае нас.

 

Я напісаў крыху царкве, але Дыятрэф, каторы хоча быць кіраўніком іхнім, не прыймае нас.

Таму, калі я прыйду, дык узгадаю ўчынкі, якія ён робіць, ганячы словамі ліхімі нас, і, не задавальняючыся гэтым, і сам ня прымае братоў, і забараняе тым, што жадаюць прымаць, і выганяе іх з царквы.

 

Таму вось, калі прыбуду пасваруся за яго паводзіны ды за злосныя словы супраць нас. А прытым, як бы яму яшчэ гэтага не хапала, і сам не прыймае братоў, ды хочучых гэта зрабіць выганяе з царквы.

Любасны! не ўпадабняйся ліхому, а добраму. Хто робіць дабро, той Божы; а хто робіць ліха, ня бачыў Бога.

 

Улюблены, не ідзі за ліхім, але рабі дабро. Хто добрае робіць, ёсьць ад Бога, а хто робіць благое, той ня бачыў Бога.

Пра Дзімітрыя засьведчылі ўсе і сама ісьціна; сьведчым таксама і мы, і вы ведаеце, што сьведчаньне нашае ў ісьціне.

 

Пра Дэмэтра ўсе добра сьведчаць, і нават сама праўда. Такое самае сьведчаньне даём і мы, і ведаем, што сьведчаньне нашае праўдзівае.

Многае меўся я напісаць; ды не хачу пісаць табе чарнілам і трысьцінкаю,

 

Шмат я меў бы табе напісаць, але не хачу пяром і атрамантам.

спадзяюся ж бо неўзабаве пабачыць цябе і пагутарыць вуснамі ў вусны.

 

Спадзяюся, што хутка цябе ўбачу і тады пагаворым вуснамі ў вусны.

Мір табе! вітаюць цябе сябры; павітай сяброў паіменна. Амін.

 

Супакой табе. Вітаюць цябе сябры. Прывітай сяброў пайменна.