Выслоўяў Саламонавых 8 разьдзел
Кніга выслоўяў Саламонавых
Пераклад Чарняўскага 2017 → Пераклад Васіля Сёмухі
Няўжо гэта не мудрасць усклікае і не разважлівасць падымае голас свой?
Ці мудрасьць не заклікае? і ці розум ня ўзносіць свой голас?
На найвышэйшых вяршынях і на дарозе, на сярэдзіне сцежак стоячы,
Яна стаіць на ўзвышаных месцах, пры дарозе, на ростанях;
ля брам пры ўваходзе ў горад, у саміх дзвярах усклікае:
яна кліча каля гарадское брамы, дзе ўваходзяць у дзьверы:
«О людзі, да вас заклікаю, і кліч мой да сыноў чалавечых.
«Да вас, людзі, даклікаюся я, і да сыноў чалавечых мой голас!
Пазнайце, прастакі, мудрасць, а неразумныя — звярніце ўвагу;
Навучэцеся, невукі, добрай разумнасьці, зразумейце вы розум, бязглуздыя.
слухайце, бо буду гаварыць пра справы важныя і расчыняцца вусны мае, каб сказаць праўду.
Слухайце, таму што я буду казаць важнае, і выслоўе вуснаў маіх — праўда;
Праўду выкажа горла маё, а вусны мае праклянуць бязбожніка.
Бо ісьціну вымавіць язык мой, а бязбожнасьць — гідота для вуснаў маіх;
Усе размовы вуснаў маіх — справядлівыя, няма ў іх ніякай ілжы і крывадушнасці;
усе словы вуснаў маіх слушныя; няма ў іх хітрыны і ашуканства;
усе яны ясныя для разумных і справядлівыя для тых, хто здабывае веды.
усе яны простыя разумнаму і справядлівыя тым, хто здабыў веды.
Прыміце настаўленне маё, а не грошы, лепш навучанне, чым адборнае золата.
Прымеце навуку маю, а ня срэбра; лепей веды, чым чыстае золата;
Бо мудрасць лепшая за самацветы, і ўсё, што жадаеш, не можа параўнацца з ёю.
бо мудрасьць лепшая за перлы, і ўсё, чаго пажадаеш, не дараўнаецца зь ёю.
Я, Мудрасць, жыву з Разважлівасцю і знаходжу дасканаласць ведаў.
Я, мудрасьць, жыву з розумам, і шукаю спазнаньня ў разважлівага.
Страх Госпадаў — ненавідзець высакамер’е, пыхлівасць, ліхую дарогу, зло, ненавідзець і крывадушныя вусны.
Страх Гасподні — ненавідзець зло; гонар і пыху і ліхія шляхі і падступныя вусны я ненавіджу.
Маё — гэта розум і разважлівасць, разважлівасць — мая, мужнасць — мая.
У мяне рада і праўда: я розум, у мяне сіла.
Праз мяне цары царуюць і валадары выносяць справядлівыя рашэнні;
Мною цары валадараць, і праўнікі ўзаконьваюць праўду.
праз мяне кіраўнікі загадваюць, а магутныя людзі справядлівасць чыняць.
Мною кіруюць уладыкі і вяльможы, і ўсе судзьдзі праведныя.
Я люблю тых, хто любіць мяне; і тыя, хто зранку пільнуе мяне, знойдуць мяне.
Хто любіць мяне, тых я люблю, і хто шукае мяне, знойдуць мяне;
Са мною — багацце і слава, незнішчальныя скарбы і справядлівасць.
багацьце і слава са мною — скарб нятленны, і праўда;
Бо плод мой даражэйшы за золата і золата вышэйшага гатунку, а народжанае мною — за адборнае срэбра.
плады мае лепшыя за золата, і золата самага чыстага, і карысьці ад мяне болей, чым ад чыстага срэбра.
Я хаджу па дарогах справядлівасці і пасярэдзіне сцежак законнасці,
Я хаджу дарогаю праўды, сьцежкамі правасудзьдзя,
каб абагаціць тых, хто любіць мяне, і напоўніць іх скарбніцы.
каб даць тым, хто мяне любіць, спадчыну дабра, і скарбніцы іхнія я напаўняю.
Госпад валодае мною ад пачатку дарог Сваіх, перш чым стварыць што-небудзь, спакон вякоў;
Гасподзь меў мяне ад пачатку дарогі Сваёй, раней дзеяў Сваіх, спрадвеку:
ад вечнасці ўзнікла я і ад старадаўніх часоў, перш чым зямля ўзнікла.
адвеку была я памазаная, ад пачатку, ад правеку зямлі.
Яшчэ не існавалі бездані, а я ўжо ўтварылася; яшчэ крыніцы не былі цяжкімі ад водаў;
Я нарадзілася, калі ня было яшчэ бездані, калі яшчэ ня было крыніц, багатых вадою.
перш, чым узвысіліся горы, раней за ўзгоркі я нарадзілася.
Я нарадзілася перш, чым былі пастаўлены горы, раней за пагоркі,
Дагэтуль Ён не стварыў зямлю, і палі, і пачатак зямлі ў сусвеце.
калі яшчэ Ён не стварыў ні зямлі, ні палёў, ні пачатковых пылінак сусьвету.
Калі асноўваў нябёсы, я была там, калі цвёрдым законам і кругам абводзіў бездані,
Ён рыхтаваў нябёсы, я была там. Калі ён крэсьліў скляпеньне над паверхняю бездані,
калі воблакі ўстанаўліваў угары, калі ўмацаваліся вытокі бездані,
калі сталяваў наверсе аблокі, калі мацаваў крыніцы бездані,
калі мору вызначаў Ён яго мяжу і водам, каб з рубяжоў сваіх не выходзілі, калі паклаў асновы зямлі,
калі даваў мору статут, каб воды не заступалі межаў яго, калі закладваў асновы зямлі:
я разам з Ім усё рашала ў захапленні, гуляючы перад Ім штодзень,
тады я была пры Ім за майстра, і была кожны дзень радасьцю, весялосьцю была перад абліччам Ягоным заўсёды,
гуляючы па крузе зямлі, і радасці мае — быць з сынамі чалавечымі.
радуючыся на зямным коле Яго, і радасьць мая была з сынамі чалавечымі.
Такім чынам, цяпер, сыны, слухайце мяне: шчасныя тыя, хто зберагае дарогі мае,
Цяпер, дзеці, паслухайце мяне; і шчасныя тыя, што будуць ахоўваць шляхі мае!
слухайце настаўленне і будзеце мудрымі, і не адкідайце яго.
Паслухайце настаўленьня, і мудрымі станьце, і не адступайцеся ад яго.
Шчасны чалавек, які слухае мяне, і які штодзень пільнуе пры дзвярах маіх, і хто пільнуе каля вушака дзвярэй маіх.
Шчасны той чалавек, які слухае мяне, чуваючы дзень у дзень каля варотаў маіх і вартуючы дзьверы мае!
Хто мяне знойдзе, той жыццё знойдзе і атрымае радасць ад Госпада.
Бо, хто знайшоў мяне, той знайшоў жыцьцё, і атрымае мілату ад Госпада;
А хто адносна мяне зграшыць, той пакалечыць душу сваю: усе, хто ненавідзіць мяне, — смерць любяць».
а хто грэшыць супроць мяне, учыняе шкоду душы маёй: усе тыя, што ненавідзяць мяне, любяць сьмерць».
