Да Галятаў 5 разьдзел

Пасланьне да Галятаў
Пераклад Чарняўскага 2017 → Пераклад Яна Станкевіча

 
 

Дык стойце ў свабодзе, якой вызваліў нас Хрыстос, і не патрапляйце зноў пад ярмо няволі.
 
Хрыстос вывальніў нас да волі; дык стойце цьверда і не паддавайцеся ізноў пад іго няволі.

Вось, я, Паўла, кажу вам, што, калі вы дасцеся абрэзацца, Хрыстос не прынясе вам ніякай карысці.
 
Вось, я Паўла кажу вам: калі вы абразаецеся, ня будзе вам ніякае карысьці ад Хрыста.

Яшчэ сведчу, што кожны чалавек абрэзаны павінен выконваць увесь закон.
 
Яшчэ сьветчу кажнаму чалавеку, каторы абразаецца, што ён мае споўніць увесь Закон.

Вы, што шукаеце ў законе апраўдання, ад Хрыста аддзеленыя і ад ласкі адпалі.
 
Вы, што правіцеся Законам, спабыліся Хрыста, адпалі ад ласкі,

Мы ж духам ад веры маем надзею апраўдання.
 
Бо мы Духам зь веры жджэм справядлівасьці;

Бо ў Хрысце Ісусе ані абразанне, ані неабразанне не маюць сілы, а толькі вера, што дзейнічае праз любоў.
 
Бо ў Хрысту Ісусу ня мае сілы ані абразаньне, ані неабразаньне, але вера, што дзее міласьцяй.

Вы беглі добра, і хто ж перашкодзіў вам быць паслухмянымі праўдзе?
 
Вы беглі добра; хто пераказіў вам, каб вы ня слухалі праўды?

Перакананне гэта не ад Таго, Які вас кліча.
 
Гэтае перакананьне не ад Гукаючага вас.

Трохі кіслі ўсё цеста квасіць.
 
Ад малое закісі кісьне ўсе цеста.

Я ўпэўнены ў вас у Госпадзе, што інакш гэтага не разумееце; а хто бунтуе вас, той панясе асуджэнне, хто б ён ні быў.
 
Я спадзяюся ўзглядам вас у Спадару, што вы ня будзеце думаць накш; а хто вас парушае, будзе мець рассудак свой, хто б ён ня быў.

Калі ж я, браты, і далей прапаведую абразанне, дык чаму я цярплю пераслед? Тады знікла б згаршэнне крыжа.
 
Чаму, браты, мяне яшчэ перасьлядуюць, калі я яшчэ абяшчаю абразаньне? Тады спатыкненьне крыжа было б аддалена.

О каб былі адсечаны тыя, якія вас бунтуюць!
 
О каб былі нават адрэзаны тыя, што вас парушаюць!

Бо вы, браты, пакліканы да свабоды; толькі каб свабоду вы не давалі як падставу для пажадлівасці цела, але любоўю духа служыце адзін аднаму.
 
Бо вы, браты, пагуканыя да свабоды, адно каб пад прыклепам свабоды не гадзіць целу; але міласьцяй слугуйце адзін аднаму.

Бо ўвесь закон адным выразам спаўняецца, вось гэтым: «Любі блізкага свайго, як самога сябе».
 
Бо ўвесь Закон у вадным слове замыкаецца: «Любі бліжняга свайго, як самога сябе».

Калі ж адзін аднаго кусаеце і з’ядаеце, глядзіце, каб вы адзін аднаго не загубілі.
 
Калі ж вы адны адных грызіце а ясьце, глядзіце, каб ня выгубілі адны адных.

Кажу вам: кіруйцеся духам, ды не падпадайце пад пажадлівасць цела.
 
Я кажу: хадзіце Духам, і вы ніяк ня будзеце чыніць досыць жадлівасьцям цела;

Цела бо цягне супраць духа, а дух — супраць цела; яны супрацівяцца адно аднаму, каб не тое, што хочаце, вы рабілі.
 
Бо цела жадае напярэк Духа, і Дух —напярэк цела: яны праціўныя адно аднаму, каб вы не рабілі таго, чаго хочаце.

Калі будзеце кіравацца духам, вы не пад законам.
 
Калі ж вы воджаныя Духам, дык вы не пад Законам.

Вядомыя ж учынкі цела, вось яны: чужаложства, распуста, нячыстасць, разбэшчанасць,
 
Учынкі цела яўныя, яны ё: чужалоства, бязулства, нечысьціня, аблуд,

балванапаклонства, чараванне, варожасць, сварлівасць, нянавісць, забойствы, гнеў, звадкі, нязгода, герэзіі,
 
Балвахвалства, чары, ненавіднасьць, сьпярэчкі, завіднасьць, гнеў, нязгода, падманы, падзелы, гэрасі,

забойствы, п’янства, гулянкі і ім падобнае. Аб гэтым я і папярэджваў вас, і папярэджваю, што тыя, якія такое чыняць, Валадарства Божага не атрымаюць.
 
Завісьць, забіўствы, п’яцства, буянства і да гэтых падобныя. Кажу наперад, як і ўперад казаў, што гэта чынячым не спадзець гаспадарства Божае.

Плод жа духа — любоў, радасць, супакой, доўгацярплівасць, ласкавасць, дабрыня, вера,
 
Плод жа Духа: міласьць, радасьць, супакой, цярплівосьць, зычлівасьць, дабрыня, вернасьць,

сціпласць, стрыманасць. Супраць такіх няма закону.
 
Лагоднасьць, валоданьне сабою. На гэткіх няма Закону.

Тыя ж, што належаць Хрысту Ісусу, укрыжавалі цела з заганамі і пажадлівасцямі.
 
Але тыя, што Хрыстовы, укрыжавалі цела із жадобамі й жадамі.

Калі жывём Духам, дык Духам і ходзім.
 
Калі мы жывем Духам, хадзіма таксама Духам.

Давайце не імкнуцца да пустой славы, дражнячы адзін аднаго, зайздросцячы адзін аднаму.
 
Ня гальмася на пустую славу, квелячы адзін аднаго, завідуючы адзін аднаму.