Да Эфэсянаў 5 разьдзел
Пасланьне да Эфэсянаў
Пераклад Рыма-Каталіцкага Касцёла → Пераклад Васіля Сёмухі
Дык вось, наследуйце Бога, як дзеці ўмілаваныя,
Дык вось, сьледуйце Богу, як дзеці любасныя,
і паступайце ў любові, як і Хрыстус палюбіў нас і аддаў сябе за нас як дар і ахвяру Богу на прыемны пах.
і жывеце ў любові, як і Хрыстос палюбіў нас і аддаў Сябе за нас у прынашэньне і ахвяру Богу, на пахошчы прыемныя.
А распуста, і ўсялякая нячыстасць, і сквапнасць няхай нават не згадваюцца сярод вас, як гэта належыць святым.
А распуста і ўсялякая нечысьць і любазьдзірства не павінны нават упамінацца ў вас, як гэта прыстойна сьвятым.
Таксама і непрыстойнасць, і пустаслоўе, і вульгарнасць нягожыя для вас. Наадварот, няхай лепш будзе падзяка.
Таксама і брыдкаслоўе і пустаслоўе і пакепства не да гонару вам; а наадварот, хай лепш будзе падзяка;
Вы павінны ведаць, што ніякі распуснік, або нячысты, ці сквапны, гэта значыць ідалапаклоннік, не мае спадчыны ў Валадарстве Хрыста і Бога.
бо ведайце, што ніякі распусьнік, альбо нячысты, альбо любазьдзірца, які ёсьць ідаласлужэнец, ня мецьме спадчыны ў Царстве Хрыста і Бога.
Няхай ніхто не зводзіць вас марнымі словамі, бо праз гэта прыходзіць Божы гнеў на непаслухмяных сыноў.
Хай ніхто ня зводзіць вас пустымі словамі, бо за гэта прыходзіць гнеў Божы на сыноў бунтоўных:
Не будзьце ж іх супольнікамі.
дык жа ня будзьце супольнікамі іхнімі.
Калісьці вы былі цемрай, а цяпер вы святло ў Пану. Паступайце, як дзеці святла.
Вы былі колісь цемра, а цяпер — сьвятло ў Госпадзе: дык паводзьцеся, як дзеці сьвятла,
Бо плод святла ёсць ва ўсялякай дабрыні, справядлівасці і праўдзе.
бо плод Духа — ва ўсякай даброці, праведнасьці і ісьціне.
Імкніцеся да таго, што даспадобы Пану.
Шукайце таго, што да спадобы Богу,
Не бярыце ўдзел у бясплённых справах цемры, а лепш выкрывайце іх.
і не бярэце ўдзелу ў бясплённых дзеях цемры, а яшчэ і выкрывайце,
Бо пра тое, што яны робяць патаемна, нават сорамна казаць.
бо пра тое, што яны робяць таемна, сорамна і казаць.
А ўсё, што выкрываецца праз святло, становіцца яўным, бо ўсё, што становіцца яўным, ёсць святло.
А ўсё, што выкрываецца, выяўляецца ў сьвятле, бо ўсё, што робіцца яўным, ёсьць сьвятло.
Таму сказана: «Прачніся, які спіш, і ўваскрэсні, і Хрыстус асветліць цябе».
Таму сказана: «устань, хто сьпіць, і ўваскрэсьні зь мёртвых, і асьветліць цябе Хрыстос!».
Глядзіце дакладна, як паступаеце, не як неразумныя, а як мудрыя.
Дык глядзеце, дзейце асьцярожна, не як неразумныя, а як мудрыя,
Выкарыстоўвайце час, бо дні ліхія.
цэнячы дорага час, бо дні — ліхія.
Не будзьце ж неразважнымі, але пазнавайце, што ёсць воляй Пана.
Дык ня будзьце ж неразважныя, а спазнавайце, што ёсьць воля Божая.
І не ўпівайцеся віном, ад якога бывае распуста, але напаўняйцеся Духам,
І ня ўпівайцеся віном, ад якога бывае распуста; а напаўняйцеся Духам,
настаўляючы саміх сябе псальмамі, гімнамі і духоўнымі песнямі, спяваючы і праслаўляючы Пана ў вашых сэрцах.
настаўляючы саміх сябе псальмамі і славаслоўем і духоўнымі сьпевамі, сьпяваючы і апяваючы ў сэрцах вашых Госпада,
Дзякуйце заўсёды за ўсё Богу і Айцу ў імя Пана нашага Езуса Хрыста.
дзякуючы заўсёды за ўсё Богу і Айцу, у імя Госпада нашага Ісуса Хрыста,
Падпарадкоўвайцеся адзін аднаму ў боязі Хрыстовай.
слухаючыся адно аднаго ў страху Божым.
Жонкі, падпарадкоўвайцеся сваім мужам, як Пану,
Жонкі, упакорвайцеся сваім мужам, як Госпаду,
бо муж — галава жонкі, як і Хрыстус — Галава Касцёла. Ён — Збаўца цела.
бо муж ёсьць галава жонкі, як і Хрыстос — галава Царквы, і Ён жа Збаўца цела.
Таму, як Касцёл падпарадкоўваецца Хрысту, так і жонкі падпарадкоўваюцца ва ўсім мужам.
Але як Царква слухаецца Хрыста, так і жонкі сваіх мужоў ва ўсім.
Мужы, любіце сваіх жонак, як і Хрыстус палюбіў Касцёл і аддаў сябе за яго,
Мужы, любеце сваіх жонак, як і Хрыстос палюбіў Царкву і аддаў Сябе за яе,
каб асвяціць яго, ачысціўшы купеллю вады і словам,
каб асьвяціць яе, ачысьціўшы мыцьцём водным, праз слова;
каб ён з’явіўся перад Ім слаўным Касцёлам, які не мае плямы, ці заганы, ці чаго-небудзь падобнага, і каб ён быў святы і беззаганны.
каб прадставіць яе Сабе слаўнаю Царквою, бяз плямы, без заганы, або чаго-небудзь падобнага, а каб яна была сьвятая і беззаганная.
Так павінны мужы любіць сваіх жонак, як сваё цела. Хто любіць сваю жонку, любіць самога сябе.
Так павінны мужы любіць сваіх жонак, як сваё цела: хто любіць сваю жонку, любіць самога сябе.
Бо ніхто ніколі не меў нянавісці да свайго цела, але корміць і даглядае яго, як і Хрыстус свой Касцёл,
Бо ніхто ніколі ня меў нянавісьці да сваёй плоці, а корміць і грэе яе, як і Гасподзь Царкву;
бо мы члены Ягонага цела.
бо мы часткі Цела Ягонага, ад плоці Ягонай і ад касьцей Ягоных.
Таму пакіне мужчына бацьку свайго і маці і злучыцца са сваёй жонкай, і будуць двое адным целам.
Таму «пакіне чалавек бацьку свайго і маці і прылепіцца да жонкі сваёй, і будуць двое адна плоць».
Вялікая таямніца гэтая, а кажу я ў дачыненні да Хрыста і да Касцёла!
Тайна гэтая вялікая; я кажу пра Хрыста і пра Царкву.
Дык няхай кожны з вас любіць сваю жонку так, як самога сябе, а жонка няхай паважае мужа.
Так кожны з вас хай любіць сваю жонку, як самога сябе; а жонка хай баіцца свайго мужа.
