Псалтыр 116 псалом
Псалтыр
Пераклад Сабілы і Малахава → Пераклад Л. Дзекуць-Малея
Я люблю (Ягову), бо Ягова пачуў голас мой, маленьні мае,
Цешуся я, бо Госпад пачуў галосну малітву маю.
бо Ён нахіліў Вуха Сваё да мяне. Дык буду прыклікаць Яго ўва ўсе мае дні.
Схіліў да мяне Ён вуха Сваё, дык клікаці буду Яго ў-ва ўсе мае дні.
Путы сьмерці абхапілі мяне, і мукі пякельныя знайшлі мяне. Я знайшоў гора і бяду.
Путы сьмерці мяне абхапілі; мукі пякельныя дагналі мяне; наткнуўся я на тугу ды сум.
Але я прыклікаў Імя Яговы: «О, Ягова, дай душы маёй уцячы!»
Але клікнуў я імя Гасподняе: Збаў, Госпадзе, душу маю!
Багадатны ёсьць Ягова і Праведны, і Бог наш спачувальны.
Ласкавы Госпад і справядлівы, міласэрны наш Бог.
Ягова ёсьць Ахоўнік прастадушных. Я быў зьнямагаючым, але Ён выратаваў мяне.
Прастадушных ахоўвае Госпад; калі зьнемагаю, Ён ратуе мяне.
Вярніся, душа мая, у спакой твой, бо Ягова зрабіў табе добрае.
Вярніся, душа мая, да супакою твайго, бо Госпад табе робіць добрае.
Бо Ты вызваліў душу маю ад сьмерці, вочы мае — ад сьлёзаў, нагу маю — ад спатыканьня.
Бо ад сьмерці Ты вызваліў душу маю, ад сьлёзаў — вока маё і нагу маю ад упадку.
Я буду хадзіць перад Абліччам Яговы ў землях жывых.
Буду хадзіць прад абліччам Гасподнім у краіне жывых.
Я веру, таму я гавару: «Я ёсьць вельмі прыніжаны».
Я веру, дык гавару; але я крэпка прыбіты.
Я сказаў у пасьпешлівасьці маёй: «Усе людзі ілгуць».
У неразважлівасьці маёй я сказаў: усе людзі ілгуць!
Як я аддзячу Ягове за ўсе Ягоныя дабрадзеі да мяне?
Як аддзячыць мне Госпаду за ўсе дабрадзействы Яго для мяне?
Я ўзьніму келіх збаўленьня, і я прыклічу Імя Яговы.
Чару збаўленьня ўзьніму і імя Гасподняе клікну.
Абяцаньні мае я аддам Ягове перад усім народам Ягоным.
Абяцаньні мае аддам я Госпаду прад усенькім народам Ягоным.
Дарагая ёсьць у Вачах Яговы сьмерць Ягоных сьвятых.
Прад вачыма Гасподнімі сьмерць сьвятых Яго дорага.
О Ягова! я слуга Твой. Я слуга Твой, сын Тваёй служанкі. Ты разамкнуў мае кайданы.
О Госпадзе! Я-ж раб Твой, сын рабыні Тваёй! Ты разьвязаў мае путы.
Я ахвярую Табе ахвяру ўдзячнасьці, і прыклікаю Імя Яговы.
Табе прынясу ахвяру хвалы й буду клікаць імя Гасподняе.
Абяцаньні мае я аддам Ягове перад усім народам Ягоным,
Абяцаньні мае аддам я Госпаду прад усенькім народам Ягоным,
у панадворках Дому Яговы, сярод цябе, Ярузаліме. Хваліце вы Ягову!
у панадворках дому Гасподняга, пасярод цябе, Ерузаліме! Альлілуя!
