2 да карыньцянаў 6 Другое да карыньцянаў 6 разьдзел

¹ І мы, як супрацоўнікі (Бога), молім (вас), каб Багадаць Бога была прынята вамі ня ма́рна,

² бо Ён кажа: «у час прыдатны Я пачуў цябе і ў дзень збаўленьня дапамог табе». Вось цяпер час прыдатны, вось цяпер дзень збаўленьня.

³ Мы нікому ні ў чым ня даём спатыканьня, каб ня было паглумленым служэньне,

⁴ але ва ўсім выяўляем сябе, як слугі Бога, у вялікай цярплівасьці, у бедах, у нястачах, ва ўцісках,

⁵ пад ударамі, у вастрогах, у бу́нтах, у спрацаванасьцях, у чуваньнях, у пастах,

⁶ у чысьціні, у мудрасьці, у доўгацярплівасьці, у дабрыні, у Духу Сьвятым, у любові някрывадушнай,

⁷ у слове праўды, у сіле Бога, са зброяй праведнасьці ў правай і левай руцэ,

⁸ у паша́не і ў га́ньбе, пад паклёпам і (у) добрай славе: як ашуканцы, але мы верныя,

⁹ як нявядомыя, але пазнава́ныя; як паміраючыя, але вось мы жывём; як караемыя, ды ня забіваныя;

¹⁰ як засмучаныя, але (мы) заўсёды радуемся; як жабракі, але многіх абагача́ючыя; як нічога ня маючыя, але ўсім валодаючыя.

¹¹ Вусны нашыя адкрытыя для вас, карыньцяне, сэрца нашае расшырана.

¹² Вам ня цесна ў нас, але ў сэрцах вашых цесна.

¹³ Адплаціце тым жа, — кажу як дзецям, — расшырцеся і вы.

¹⁴ Ня ўпрагайцеся зь няверучымі пад чужое ярмо; бо якая лу́чнасьць праведнасьці зь бяззаконьнем? Якая ж лучнасьць сьвятла зь цемраю?

¹⁵ Дык якая згода між Хрыстом і Бяліарам? Ці які саўдзел у вернага зь няверным?

¹⁶ Дык якая супольнасьць Сьвятыні Бога з балвана́мі? Бо вы ёсьць Сьвятыня Бога Жывога, як сказаў Бог: «пасялюся ў іх і буду жыць; і буду іхным Богам, і яны будуць Маім народам».

¹⁷ Таму: «выйдзіце зь асяродку іхнага і адлучыцеся, — кажа Госпад, — і ня дакранайцеся да нячыстага, і Я прыму вас».

¹⁸ «І буду вам Бацькам, і вы будзеце Мне сынамі і дочкамі, — кажа Госпад Уседзяржыцель (Усемагутны)».