Домъ собе ставилъ ест царь Саломонъ з древа горы Ливанское и другий дворъ дщере фараонове. Гирамъ-майстеръ злилъ до храму Господьня два столпа, и море, и бани медяные, и иные сосуды храмовы.a
1 Домъ пакъ свой делалъ естъ царь Саломонъ тринадесеть летъ, даже и доконал его.
2 Поставил теже домъ иный с древа горы Ливанское: сто локотъ в должиню, и пятьдесятъ локотъ в шириню, и тридцеть локотъ въ вышиню, и четыри проходища межи столпы кедровыми, древа убо кедрова стесалъ былъ на столпы.
3 И всю полату обилъ досками кедровыми, онаже бе содержаема четырьдесятьма и пятьма столпы, и единый каждый рядъ имеяше в собе пятьнадесеть столповъ,
4 противъ собе поставленыхъ и межи собою розделеныхъ ровным пространствомъ.
5 И на тыхъ столпехъ на верху были суть древа четверограноватыи, во всемъ ровныи.
6 И комору на столпех тых уделал пятьдесятъ локотъ в должиню и тридцеть в шириню; и иные сени пред большею коморою уделал, и столпы, и переходы на столпехъ.
7 Учинилъ теже полату, в нейже былъ ест престолъ царский, на немже судяше, от древа кедрова, и обил ю сысподу даже до верху дсками кедровыми.
8 И престол судищный посреди тое полаты былъ подобный к ней уделан. Поставил теже домъ дщере фараонове, юже былъ понялъ собе за жену Саломон, подобнымъ делом полате той.
9 Сие все было с камения великаго, оныже подлугъ правила и меры внутрь и зовнутрь отесаны были четверограновато от уднения даже до верху стенъ и внутри аже до сеней вышнихъ.
10 Основания же дому беша с камения великаго, десяти или осми локтев были,
11 и сверху камение великое, ровное меры, тесаное было, также и древа кедрова.
12 Полата пакъ большая была ест округла, имея три ряды от каменя тесаного, а единый рядъ от древа тесаного кедрова — такъ, яко крилосъ, иже ест во храме Господьнем и въ сенехъ двора.b
13 Послалъ же естъ царь Саломонъ и позвалъ мужа едина, именемъ Гирама, от Тира,
14 онъже былъ сынъ жены-вдовици от племеня Нефталимля, отец пакъ его былъ естъ Тирянинъ; сей былъ мастеръ досконалый дела медяна, полонъ мудрости, и разума, и умения ко всякому чинению великихъ речей изъ меди. Той внегда прииде къ царю Саломону, делалъ ест всякое дело, еже ему повелелъ царь.
15 И слилъ естъ два столпы медяна, осмънадесять локтей в вышиню столпъ единъ, и мера двунадесяти локтей обкружовала каждый столпъ.
16 И вделалъ две маковици, иже поставлены имели быти на верху столповъ, слиты с меди: пять локтей во вышиню маковица едина и пять локтей в вышиню маковица другая.
17 И якобы на подобность сети и ретезковъ, к собе восполокъ дивнымъ деломъ споеныхъ, обедве маковици столповъ слиты были: седмъ рядовъ ретезковъ было на маковици единой и седмъ рядовъ ретезковъ на маковици второй.
18 И доконалъ столповъ и два ряды около ретезковъ всехъ, абы прикривали маковице, иже были на веръху зернатыхъ яблокъ; такоже уделал и около другое маковици.
19 Главы пакъ, иже были суть на верху столповъ, якобы на взор цвету лилиова учинены были; и были суть поставлены с столпы во притворе храму Божия.
20 И опять иные маковички на самомъ верху столповъ к верхней стране уделалъ подле меры столпа противъ ретезкомъ; подобенство теже зернатыхъ яблокъ двесте в рядехъ были суть около маковици второе.
21 И поставилъ царь Саломонъ тыи два столпы во притворе храму Господьня. И внегда поставилъ столпъ един на правой стране притвора, назвалъ его именем Яхимъ;c теже воздвиже вторый столпъ и прозвал и именемъ Боозъ.d
22 И на самомъ верху столпов дело, подобно цветомъ лилиовымъ, поставилъ; и доконано ест чинение столповъ.
23 Вделал теже мореe медяное слитое — десети локотъ в шириню от края едина до края другаго, — округло около, пять локтей вышиня его; и точеница тридцети локтей обкружала около его,
24 и ритина подъ краем обхожала его десяти локтей, окружающи море; два ряды ритинъ зреймыхъ были слиты.
25 И стояло ест на дванадесяти волехъ, от нихже три поставлены были на полнощ, три к западу солнца и три на полдня, а три ко всходу солнца; и море было сверху, и задкове ихъ всехъ внутрь под морем сокриты были.
26 Толстость пак моря того была на длан и край его былъ ест, яко край чаши и яко листъ накривленое лилии. И вливалося до него две тысещи мериць.f
27 Слилъ теже Гирамъ десеть подъставокъ медяныхъ; четырех локтей вдолжъ едина каждая подставка, и четырехъ локтей наширь, и трехъ локтей навышъ.
28 А тое дело подставковъ межи ритинами гладъкое было
29 и при споении во углехъ ритины и межи кружками львове, и волове, и херувимове; и при споении теже сверху и сысподу львове, и волове, и кресщикове, яко удила медяная, висели;
30 и четыри кола у каждое подставки, и оси медяные. И на четырехъ странахъ якобы рамена под банями слита, восполокъ противу собе зрящая.
31 Жерело пак бани внутрь было от самого верху, и что зовнутрь могло видяно быти, было на единый локоть, и все округло, теже на дне имела естъ широкость полдруга локтя. Но и во углехъ стоялныхъ, где ся споивали, различныи ритины были; середины пак, иже беша посреди стоялъ, четверогранаты, а неокругли были.
32 И четыри кола, иже въ четырехъ углехъ подставки, случены к собе были подъ подставкою; и едино коло въ вышиню было полдругаго локтя.
33 И были суть таковыи кола, яковы у возе бывають; и оси ихъ, и спици, и ободы, и песты — все з меди слито.
34 Но и рамена тая четыре, иже беша у каждого угла подставки, посполу с ними слиты и споены суть были.
35 И на верху единое каждое подставки была неякая округлость на полъдругаго локтя тако уделана, иже баня могла на ней поставлена быти, имеющи на собе резание и различныи ритины.
36 И вырилъ естъ на доскахъ тыхъ, иже были з меди, и во углехъ херувимы, и львы, и фуники, якобы къ подобенству людей стоящихъ, тако, иже невыритые, но якобы приставленые около мнелися быти.
37 Тымъ обычаемъ уделалъ естъ десеть подставокъ единостайного лития и меры, и ритины единаковы были на всихъ ихъ.
38 Уделалъ теже Гирамъ десеть баней великихъ медяныхъ: четырьдесятъ меръ брала вся баня едина и была въ вышиню четыри локти; и единую каждую баню розделне поставил на десети подставкахъ.
39 И поставилъ с тыхъ десети подъставокъ пять на правой стране храму Божия и пять на левой; море же медяное поставилъ естъ на правой стране храму, къ восходу солнца и къ полудню.
40 Наделалъ теже Гирамъ котликов медяныхъ, и сковрадъ, и конвей. И сконъчалъ все дело царю Саломону во храме Господьнемъ:
41 столпы два и ободы, иже оточивали две маковици столповъ, и ретезкование двое, еже украшало тые ободы, ониже были суть на маковицахъ столповъ;
42 и зернатых яблокъ четыриста на двоих диркованиахъ, два ряды яблокъ зернатыхъ на единомъ каждом дирковании ко окрасе круговъ, еже были суть на маковицахъ столповыхъ;
43 и подставковъ десеть, и умывалниць великихъ, иже беша на подъставкахъ тыхъ, десеть;
44 и море медяное едино, и воловъ дванадесеть, иже беша подъ моремъ медянымъ;
45 и котлики, и сковрадкы, и чашки. Вся сосуды, еже делал естъ Гирамъ царю Саломону во храме Господьнем, были суть с меди красное.
46 И сливалъ е царю на поли у Еръдана, въ земли иловатой, межи Сохотомъ и Сартаномъ.
47 И далъ естъ Саломон вся сосуды ты до храму Господьня. И для великого множества не было ваги меди той.
48 И учинилъ ест царь Саломонъ вся потребы в дому Господьнем: олтар златый и столъ златый, на немже клали суть хлебы посвященныя;
49 и свечневъ златыхъ пять на правой стране и пять на левой противъ молитовници от злата пречиста, якобы цветы лилиовы; и светилници на нихъ златыи, и клещки златыи,
50 и гасила, и удици, и чашки, и ступки, и кадилнице — все от злата пречистаго. И завесы дверей дому внутренаго, иже слылъ естъ Святыня Святыхъ, и дверей храму Божия были от злата чиста.
51 И скончалъ естъ все дело, еже делалъ Саломонъ во храме Господьнемъ. И внесе тыи вси речи, еже посвятилъ былъ Давыдъ, отець его, сребро, и злато, и сосуды, и положи е въ сокровищи храму Господьня.
a На наступнай старонцы — гравюра, зверху якой надпіс: «ВЗОРЪ ДОМУ ДРЕВЯНА ЦАРЯ САЛОМОНА».
b Далей — гравюра, знізу якой надпіс: «ВЗОРЪ ДВУ СТОЛПОВЪ, ИЖЕ ПРЕДЪ ХРАМОМЪ».
c Аd marginem: крепост.
d Аd marginem: утвержение.
e Аd marginem: умывалницу.
f Далей — гравюра, знізу якой надпіс: «ВЗОРЪ МОРЯ, ИЛИ УМЫВАЛНИЦИ МЕДЯНОЕ». На наступнай старонцы — гравюра, зверху якой надпіс: «ВЗОРЪ ДЕСЯТИ ПОДЪСТАВОКЪ И БАНЕЙ ИХЪ».
Знайшлі памылку ў тэксце? Вылучыце яе і націсніце:
Ctrl + Enter
Третии Царствъ, 7 разьдзел
Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў. Паспрабуйце, магчыма, вы будзеце прыемна здзіўлены.
Public Domain — народны здабытак.
2022, укладальнік — Бразгуноў Алесь.