Саломонъ понялъ естъ собе жену, дщеру фараонову, царя Египетскаго. Просил от Господа Бога мудрости, и далъ ю естъ ему. О суде Саломонове, иже судил две жене-блудници о детехъ ихъ.
1 Тогда утвердися царство в рукахъ Саломоновыхъ.a И случился ест приязнию съ фараономъ, царемъ Египетскимъ, понял убо былъ дщеру его; и приведе ю во градъ Давыдовъ, поки былъ не сооружилъ дому своего царскаго, и храму Божия, и стены около Ерусалима.
2 И тогда людие приношаху жертвы Богу на горахъ высокихъ, понеже не былъ еще уделанъ храмъ имени Божиему даже до того дня.
3 И возлюбилъ естъ Саломонъ Господа Бога, ходяй по путех Давыда, отца своего, кроме толико того, иже приносяше жертвы на горахъ высоких и кадяше фимиан.
4 Въсталъ же естъ Саломонъ и иде въ Гаваонъ принести жертву Господу Богу, тое убо было место найвышшее. И принесе Саломон тысещу всехъсозженией Господу Богу на требнице въ Гаваоне.
5 Тогда явился естъ Господь Саломонови вночи во сне, глаголя: «Проси от Мене чегоже хощеши, и дамъ тобе».
6 И рече Саломонъ:b «Господи, Боже мой, Ты еси учинилъ милосердие великое съ рабомъ Твоим Давыдомъ, отцемъ моим, якоже ходилъ естъ предъ лицемъ Твоимъ в правде и во истинне и серцемъ справедливымъ, и сохранилъ еси милость Свою великую к нему, и далъ еси ему сына, седящего на престоле его днешнего дня.
7 И ныне, Господи, Боже мой, Ты еси учинилъ мене, раба своего, царствовати въместо Давыда, отца моего. Азъ же еще есмъ младенець малъ, не всего зная, ани внития моего, ани выштия.
8 И рабъ твой посреди естъ людей, еже еси избралъ, людие безчисленыи, ихъже не можеть никто сочти для множества.
9 Протож, Господи, Боже мой, дай рабу твоему серце смыслено, абы умелъ судити людей твоих и розознати межи добрым и злым. Понеже и кто можеть судити людей сихъ, людей твоих, многихъ велми?»
10 И угодно бысть предъ Господемъ Богомъ слово Саломоново, иже жадалъ ест за таковую речь.
11 И рече Господь къ Саломону: «Понеже жадалъ еси собе речи сее, а не просил еси собе дней многыхъ, ни богатества и ни душъ враговъ твоихъ, но просилъ еси мудрости, абы умелъ розознати прю суду,
12 се, учинихъ тобе по словеси твоему и далъ есми тобе серце мудро и разумно тако велми, иже жадинъ пред тобою не былъ тобе ровный и по тобе не встанеть.
13 Но и тые речи, ихже еси не просилъ, дахъ тобе, то естъ богатество и славу — тако, иже жадинъ от царей не будеть тобе ровный по вся дни.
14 И будеши ли ходити в заповедехъ Моихъ и по путехъ Моихъ, якоже ходилъ естъ отець твой, продолъжу дни твоя».
15 Тогда прочутился естъ Саломонъ и поразумел, иже то бысть видение. И внегда прииде въ Ерусалим, сталъ предъ Кивотомъ Завета Господьня и принесе ту всясозжения и жертвы мирныя. И учинилъ естъ царь Саломонъ пиръ всем слугам своимъ.
16 В той часъ пришли суть две жене-будници къ царю Саломону и стали пред нимъ.
17 И рече едина от нею: «Молю ти ся, господине мой царю, азъ и жена сия жили есмо въ единомъ доме, и породила есми въ коморе ея.
18 Третиего же дня потомъ, породившей мне, родила и она; и были есмо посполу, и никтоже иный не былъ ест с нами в доме томъ, кроме нас дву.
19 И умерлъ естъ сынъ жены сея в нощи, спячи бо, воистинну удавила его.
20 И въставши молчком, егда было тихо ополунощи, взяла сына моего от боку рабы твоея, внегда спахъ, и положила и в лоне своемъ, сына же своего мертваго положила естъ подле мене.
21 И егда рано встала и хотелахъ накормити сына моего, видехъ его мертва, на негоже внегда пилне погледела есми в день ясный, позналах, иже не естъ мой, егоже родихъ».
22 Тогда отвеща жена другая: «Не ест тако, якоже молвиши, но сын твой умерлъ ест, а мой жив ест». Она же паки рче: «Лжеши, сын воистинну мой жив ест, твой же умерлъ ест». И таковыми словы пречахуся пред царем.
23 И рече царь: «Сия глаголет: “Сынъ мой живъ ест, а сынъ твой мертвъ”, а тая отвещаеть: “Не тако, но мой сынъ естъ живъ, а твой умерлъ”».
24 Рече паки царь: «Принесите ми меч». И внегда принесли суть мечь предъ царя,
25 тогда рече царь: «Розотните жь отроча живое наполы и дайте половицу едину жене единой, а другую половицу другой».
26 Отвеща жена, еяже былъ естъ сынъ живый, и рече къ царю: «Понеже погнулася была лютостию утроба ея надъ сыном своимъ, молю ти ся, господи мой, дайте ей дитятко живое, а не ростинайте его». А другая к тому рече: «Да не будет мне ани тобе, но да будеть ростято надвое».
27 Тогда выдал естъ суд царь, глаголя: «Дайте ж той-то отроча живо,c а не убивайте его, яко то ест мати ему».
28 И услыша вес Ізраиль той судъ, иже судил царь, и возбояшеся царя, видяще мудрость Божию в немъ къ чинению суду.
a 2 Параліпаменан, 1[:1].
b Мудрасці, 8[:21, 9].
c Лукі, 7[:15] (зачын 30), у Скарыны нумар зачына пададзены памылкова — 8.
Знайшлі памылку ў тэксце? Вылучыце яе і націсніце:
Ctrl + Enter
Третии Царствъ, 3 разьдзел
Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў. Паспрабуйце, магчыма, вы будзеце прыемна здзіўлены.
Public Domain — народны здабытак.
2022, укладальнік — Бразгуноў Алесь.