Третии Царствъ 20 Третии Царствъ 20 разьдзел

¹ Вен-Адав же, царь Сирский, собрал все войско свое, и тридцеть и два цари с нимъ, возы ихъ и конники их, и иде воевати на Самарию, и облагоша ю.

² И послалъ естъ послы къ царю Ахаву во градъ,

³ глаголя: «Сия усказал к тобе Вен-Адавъ: “Сребро твое и злато твое мое естъ; жены твои и сынове твои красъныи мои суть”».

⁴ Отвеща же имъ Ахавъ, царь Ізраилев, и рече: «По словеси твоему, господине мой царю, твой есмъ азъ и твоя суть вся, яже имам».

⁵ Тогда опят удругое навратившеся послы къ Ахаву и молвиша ему: «Тако глаголеть царь Вен-Адавъ, онже послалъ насъ естъ к тобе: “Злато твое и сребро твое, жены твое и сыны твоя даси мне”.

⁶ Сего для за утра в сей же час пошлю к тобе рабы своя, да бы согледали домъ твой и домы слугъ твоих, и все, еже полюбится имъ, поберуть и принесуть ко мне».

⁷ И позва царь Ізраилев всехъ старейшинъ земли и рече к ним: «Пилне согледайте и видьте, иже причины ищеть на нас, послалъ убо ко мне по моя жены и по сыны, и по злато, и по сребро, и не возбраних ему».

⁸ И рекоша къ царю старейшины Ізраилевы и вси людие: «Не послушай его в томъ и ни призволяй ему».

⁹ Тогда отвеща Ахавъ посломъ Вен-Адавовым, глаголя: «Рците господину моему царю: “Вси речи, о нихже присылал еси ко мне первей, учиню, сего же не могу учинити”». И навратившися, послы поведели суть вся слова сия господину своему.

¹⁰ И взказа Вен-Адав: «Сие да учинят мне бози мои и сие да приложать, еже не достанется персти, иже ест около Самарии-града, каждому з горсть людем моим, ониже со мною суть».

¹¹ Отвеща же царь Ізраилев и рече: «Да не хвалится идущій на бран, яко той, иже победил ест».

¹² И бысть, егда услышал Вен-Адав слова сия, пияше бо вино и цари, иже беша с ним, въ шатрех своих, и рече воемъ своим: «Обляжите градъ». И облягоша и.

¹³ И се, пророкъ единъ приступивъ ко Ахаву и рече: «Сие глаголеть Господь: Воистинну видел еси все множество сее великое. Се, Азъ предам е днесь в руце твое, абы познал есь, яко Азъ есмъ Господь».

¹⁴ И рече Ахавъ: «Ким предасть?» Отвеща ему пророкъ: «Сие глаголеть Господь: Отроками князей странъ сихъ». И рече царь: «Кто жъ пакъ зачнеть бой?» Он же рече: «Ты».

¹⁵ Тогда сочте Ахавъ отроки князей стран и знайде их числом двесте тридесеть и два. И потом сочте всех сынов Ізраилевых, и бе их седмъ тысещей, и зыйдоша к бою ополудни.

¹⁶ Вен-Адав же пияше вино и упися в шатре своемъ, и царей тридесеть и два с ним, иже пришли были ему на помощь.

¹⁷ Тогда идоша напред отроци князей стран. И возвестиша сее царю Вен-Адаву, глаголюще: «Мужи суть вышли із Самарии».

¹⁸ Он же рече: «Идуть ли семо о мире, поимайте их живых, пакли же идуть к бою, теже поимайте их живых».

¹⁹ Идяху же отроци князей странъ к бою напред и людие Ізраилевы за ними.

²⁰ И забилъ единый кажный мужа, споткавшегося с ним. И побегоша Сиряне, и гониша их людие Ізраилевы. И утече Вен-Адавъ, царь Сирский, на кони с конники своими.

²¹ Изыйде же царь Ізраилев и порази вся возы и кони ихъ, и сказил землю Сирскую язвою великою велми.

²² Тогда приступивъ пророкъ къ царю Ізраилеву и рече: «Иди, и укрепися, и поразумей, что имаши чинити, понеже другаго лета приидеть на тя царь Сирский».

²³ Слузи пакъ царя Сирскаго молвиша къ царю своему: «Бози горъ суть бози их, и протожъ поразиша насъ; сего ради лепей ест нам битися с ними на ровнинах, и тако поразимо е.

²⁴ Ты же, царю, учини сице: отдали всехъ царей от войска твоего и постави князей въ место их,

²⁵ и собери паки число воинъ на место тыхъ, ониже избиты суть, и кони, и возы, якоже прежде имелъ еси. И воеватися с ними будешъ на ровнинахъ, и узришъ, иже поразимы е». И уверил ест царь совету их, и учинил тако.

²⁶ Внегда же было по едином лете, сочте царь Вен-Адав войско свое сирское и иде въ Афетъ битися с людьми Ізраилевыми.

²⁷ Сынове теже Ізраилевы, съчетъшися и набравши стравы, вышли суть и положилися з войскомъ своимъ противу имъ, яко две стаде мале козъ; Сиряне пакъ везде наполнили были землю.

²⁸ Тогда приступивъ единъ мужъ Божий къ царю Ізраилеву и рече к нему: «Сия глаголеть Господь Богъ: Понеже глаголаша Сиряне: “Бог горъ естъ богъ ихъ, и не естъ богъ долинъ”, сего ради, се, Азъ предам все множество сее в руце твое и увеси, яко Азъ есмъ Господь».

²⁹ Тогда за седмъ дней справовалися обои к бою едини противу другимъ. И въ седмый день сталася естъ битва, и убиша сынове Ізраилевы в той день Сирянъ сто тысещей мужей пешихъ.

³⁰ Кои же пакъ еще были остали от Сирянъ, сии убежаша во Афетъ-градъ. И паде стена градоваa на двадцеть и на седмъ тысещей людей, ониже были остали по битве. Тогда Вен-Адавъ, царь Сирский, утекая, прибежа во градъ и внииде в комору, иже бе внутри во храмине.

³¹ И рекоша к нему отроци его: «Се, слыхивали есмо, иже цари Ізраилевы суть милостиви; протожъ, въземши вретища на бедра наша и повразы на главы наша, подьмо къ царю Ізраилеву, еда како слютуется над нами и спасет душа наша».

³² И припоясаша тогда вретищами бедра своя, и возложиша повразы на главы своя, и приидоша къ царю Ізраилеву, глаголюще: «Рабъ твой Вен-Адавъ молвить к тобе: “Молю ти ся, царю, да будеть жива душа моя”». И рече царь Ізраилевъ: «Ащели еще живъ братъ мой естъ?»

³³ И они взяли тое за доброе знамение, и поспешивши, ухопили из усть слово его и рекли суть к нему: «Братъ твой, царю, Вен-Адавъ живъ естъ». И рече имъ царь Ізраилевъ: «Приведите его ко мне». Тогда прииде к нему Вен-Адав, и всади его на воз свой.

³⁴ И рече ему Вен-Адав: «Грады, иже побрал ест отец мой отцу твоему, отдаю тобе назадъ,b и наделай собе улиць торговыхъ в Дамасце, яко былъ наделал отець мой въ Самарии. И азъ, учинивши с тобою заветъ, от[ъ]иду от тебе». Тогда, учинивши смолву с ним, царь Ізраилев отпустил его.

³⁵ Бысть же в то время мужъ единъ от пророковъ Божиих, сей рече к товаришу своему, Словесемъ Господьним глаголя: «Бий мя». Он же не хотелъ его бити.

³⁶ К нему же паки рече: «Понеже не хотелъ еси послушати гласа Господьня и бити мя, прото, се, яко от[ъ]идеши от мене, удавит тя левъ». И егда мало отшолъ от него, споткал его левъ и удави и.

³⁷ Потомъ иного мужа знайде и рече к нему: «Бий мя». Он же ударилъ его и ранилъ и.

³⁸ И иде пророкъ той на стретение царю Ахаву, и зменил уста своя, и очи свое прахомъ посыпал.

³⁹ И внегда идяше царь, возпи за царем и рече: «Рабъ твой идяше к бою близко, и егда единъ мужъ утекаше, иный, нявши его, приведе и ко мне и рече: “Стережи ми пильне мужа сего, аще бо упустиши его, то будеть живот твой за животъ его или даси ми за него талантъ сребра”.

⁴⁰ И бысть потомъ, внегда я, рабъ твой, въ печали своей тамъ и семъ обрачахся, и се, не вем, камо ми ся поделъ». Тогда рече к нему царь Ізраилевъ: «Сей ест судъ твой, еже еси самъ на себе сказал».

⁴¹ И той скоро отре прахъ от очию своихъ, и позналъ его царь Ізраилевъ, яко от пророкъ единый беше.

⁴² И рече къ царю: «Сие глаголеть Господь Богъ: Понеже отпустил еси мужа, годнаго смерти, з руку твоихъ, протожъ даси животъ твой за животъ его и люди твоя за люди его».

⁴³ И навратися царь Ізраилев в домъ свой, и не хотелъ послушати пророка Божия, но съ гневом прииде въ Самарию.