1 да Тэсалонцаў 5 1-ы ліст да Тэсалонцаў 5 разьдзел

¹ Пра часы і пару, браты, няма патрэбы вам пісаць,

² бо самі добра ведаеце, што дзень Госпадаў, як злодзей уначы, так ён прыйдзе.

³ Бо калі скажуць: «Супакой і бяспека», тады раптам прыйдзе на іх загуба, як родавыя мукі на цяжарную, і не ўцякуць.

⁴ Вы ж, браты, не ў цемры, каб дзень той захапіў вас, як злодзей,

⁵ бо ўсе вы — сыны святла і сыны дня. Мы не належым ані ночы, ані цемры.

⁶ Дык не будзем спаць, як і іншыя, але будзем чуваць і будзем цвярозымі.

⁷ Бо тыя, што спяць, ноччу спяць, і тыя, што п’юць, ноччу п’яныя.

⁸ Мы ж, якія належым дню, будзем цвярозымі, адзетымі ў панцыр веры і любові і ў шлем надзеі збаўлення.

⁹ Бо не прызначыў нас Бог на гнеў, але на атрыманне збаўлення праз Госпада нашага Ісуса Хрыста,

¹⁰ Які памёр за нас, каб мы, ці чуваем, ці спім, жылі з Ім заўсёды.

¹¹ Таму пацяшайце адзін аднаго і падтрымлівайце ўзаемна, як вы і робіце.

¹² Просім вас, браты, каб паважалі тых, якія працуюць у вас і кіруюць вамі ў Госпадзе ды навучаюць вас,

¹³ каб больш паважалі і любілі іх дзеля працы іх. Жывіце ў згодзе між сабою.

¹⁴ Просім вас, браты: спыняйце свавольных, пацяшайце маладушных, апякуйцеся над хворымі, будзьце цярплівымі да ўсіх.

¹⁵ Глядзіце, каб нікому ліхам за ліха не адгаджаць, але імкніцеся заўсёды да дабра, як адзін для аднаго, так і для ўсіх.

¹⁶ Заўжды радуйцеся,

¹⁷ несупынна маліцеся,

¹⁸ за ўсё дзякуйце; бо такая ёсць воля Божая ў Ісусе Хрысце для вас.

¹⁹ Духа не гасіце,

²⁰ прароцтвамі не пагарджайце,

²¹ усё выпрабоўвайце, добрага трымайцеся.

²² Высцерагайцеся усякага роду зла.

²³ Хай жа Сам Бог супакою ўсвячае вас ва ўсім, каб дух ваш, і душа, і цела захаваліся беззаганнымі на прыход Госпада нашага Ісуса Хрыста.

²⁴ Верны Той, Які паклікаў вас, Які зробіць [гэта].

²⁵ Браты, маліцеся за нас.

²⁶ Прывітайце ўсіх братоў пацалункам святым.

²⁷ Заклікаю вас Госпадам, каб гэты ліст быў прачытаны ўсім святым братам.

²⁸ Ласка Госпада нашага Ісуса Хрыста з вамі. Амін.