1 І вшол засе в згромаженье и былъ тамъ чоловекъ сухую маючи руку • [1]
2 И нагледали Его, есьли в суботу уздоровіть его, бы Его объжаловали •
3 И мовилъ чоловеку сухую маючому руку, сътань впосредку •
4 И мовилъ имъ: годиться ль въ суботы добъре чинити, або лихо чинити, душу збавити, або зъгубити, лечъ оні молчали •
5 И позъревши на нихъ зъ гневомъ, смутечісе озакамененью серцъ ихъ, мовілъ чоловеку: розъпостри руку твою, и розъпосьтеръ и утьверъдилася рука его здорова якъ другая •
6 И вышедъши фарисеи на тых местъ зъ иродияны раду (у)чинілі на Него якъ Его згубіті •
7 Лечъ Исусъ отышолъ зъ ученики Своими къ мору, а мъногая тижба от Галилеи за Нимъ шла, и от Юдеи •
8 И от Ерусолима, и от Идумеи, и зъ оного берега Еръдана и от Тира и Сидона мънозство многое, услышавши што чинилъ, и пъришълі къ Нему • [2]
9 И рекъ ученікомъ Своим, бы лодья была у Него тижбы деле, бы не стиснули Его •
10 Многіхъ бо узъдоровилъ, ижъ прыпадывали они, бы Его дотъкнулися, которие мели разы •
11 А духі нечістые гды віделі Его, падали перед Нимъ, и верещали мовечи: ижъ Ты еси Сынъ Божий •
12 И мъного заказывалъ имъ, бы не явънымъ Его чинили •
13 И взышолъ на гору, и пъризъвалъ которихъ хотелъ Самъ, и пъришъли къ Нему • [3]
14 И учінілъ дъванадъцать, бы были с Нимъ и бы посълалъ ихъ пъроповедати •
15 Имети владность уздоровъяти немоцы, и выгоняти бесы •
16 И нарекъ Симану имя Петръ • [4]
17 И Якова Заведеова, и Иоана брата Яковова и нарекъ имъ имена, Волнергесъ, што ест сыны громовы •
18 И Анъдрея, и Филипа, и Варфъломея, и Матьфея, и Фому, и Якова Альфеова, и Фаддея, и Симона Кананита •
19 И Юду Искариотского, который и выдалъ Его •
20 И пришли в домъ • И собраласе засе тіжба ижъ (тежъ) не могълі оні ни хлеба ести •
21 И услышавши, которие были (къровные) у Него, вышъли бы и нялі Его, мовили бо ижъ шаленъ ест •
22 А учоные которие з Ерусолима вышодшие, мовіли, ижъ вельзевула мае,и ижъ черезъ князя бесовъского выгонаеть бесы • [5]
23 И прізвавши ихъ, в подобенъствахъ мовилъ имъ, яко можеть сатана сатану выгонити?
24 И есьли королевъсътво на себе розделиться, не можеть стояти королевъство тое •
25 И есьли домъ на себе розделиться, не можеть стоять домъ тотъ •
26 И если сатана повсталъ на себе самъ и розъделилъсе, не можеть стояти, але конецъ мает •
27 Нихто тежъ (не) можеть судье моцного вшодши в домъ его розъдрапежить, если не первей моцного свяжеть, и тогды домъ его роздрапежить •
28 Правъдиве мовълю вамъ, ижъ въсе отпуститьсе зъгрешенье сыномъ человечімъ, и блюзнерства, которімі колвекъ блюзнять • [6]
29 А которий блюзнить противъ Духу Светому, не маеть отпущенья на векі, але віненъ ест вечного суду •
30 Же мовили духа нечистого маеть •
31 И пришли матка и братья Его, и на дворе стоячи, послали к Нему зовучи Его • [7]
32 А седела тижба окъругъ Его, и рекъли Ему: ото матъка Твоя и братья Твои и сесътры Твои, на дворе ищуть Тебе •
33 И отповедилъ имъ, мовечи: хто есьть матъка Моя, або братья Мои?
34 И огледевъши около Себе седями, мовилъ: ото матка Моя и братья Мои •
35 Которий бо кольвекъ учиніть волю Божъю, то братъ Мой и сесътра Моя, и матка Ми есьть •
Каментары ці зноскі:
1 [1] Мат 12:9; Лук 6:6.
8 [2] Мат 4:25.
13 [3] Мат 10:1; Лук 9:1.
16 [4] Мат 4:25.
22 [5] Мат 12:25.
28 [6] Мат 12:31; Лук 12:10; 1 Иоан 5:16.
31 [7] Мат 12:46; Лук 8:20.
Тяпінскі па рознаму выкарыстоўвае — королевъсътво / королевъство (24); стояти / стоять (24/25); есьли / если (25/26); розъдрапежить / роздрапежить (27); матъка / матка (32/34).
Знайшлі памылку ў тэксце? Вылучыце яе і націсніце:
Ctrl + Enter
Евангелия напісанная черезъ Марка, 3 разьдзел
Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў. Паспрабуйце, магчыма, вы будзеце прыемна здзіўлены.
Public Domain — народны здабытак.
2024, Алічбованне — Сяргей Шобік, biblia.by.