1 И вышолъ оттуле, и прішол в отчізну Свою, а за Німъ шлі ученики Его •
2 И будучи суботе, почалъ в зъгромаженью учиті, а многие слухаючіе дивілисе, мовечи: откуль Тому тое, и што (то) за мудросьть даная Ему, (ижъ) и моцы таковые рукамі Его бывають?[1]
3 Не Тотъ ли Ест тесьля, сынъ Мариинъ, а братъ Якову, и Осии, и Юде, и Симону, и не сестри ль Его се зде суть у насъ, и горшилися с Него • [2]
4 И мовилъ имъ Исусъ: ижъ не ест пророкъ без чести, только въ отчизне своей, и в родине, и въ дому своемъ •
5 И не могъ тамъ, ни одное моцы учинити, только мало немоцных взкладываючи (на нихъ) руки уздоровилъ •
6 И дівільсе для недоверъства ихъ, и обходилъ веси около учачи • [3]
7 И пъризъвалъ дъванадцать, и почалъ их посылати два (а) два, и далъ имъ владъность надъ духи нечистыми • [4]
8 И пріказалъ им, бы нічого не взяли на дорогу, только посох одинъ, ні тайстри, ні хлеба, ни в чересълехъ грошей • [5]
9 Але обуты в черевікі, и (тежъ) не оболокатисе въ две одежи • [6]
10 И мовилъ имъ: где колвекъ въвойдете в домъ, тамъ змешкайте докуль выйдете оттуль • [7]
11 И которие кольвекъ не пріймуть васъ, а ні услухают васъ, выходечі оттуль, отресіте порох которій под ногамі вашими на сведецтво имъ, правдіве мовлю вамъ, отрадъней будеть Содомамъ и Гоморамъ в день судъный, нижъли городу тому • [8]
12 И вышодши проповедали бы покаялися • [9]
13 И бесы многіе выгоняли, и мазали оливою, мъногих немоцныхъ, и оздоровляли • [10]
14 И услышалъ король Иродъ, (слух о Исусе)[11] явно бо было имя Его, и мовілъ: ижъ Иоанъ Кресьтечий, з мертвыъ всталъ, и того деле моцы деются в Немъ •
15 Иные (зась) мовили: ижъ Илья есьть, а иные мовили ижъ пророкъ есьть, (або) якъ одинъ з пророковъ •
16 И услышавъши Иродъ, рекъ: ижъ которого я стяломъ Иоана, тотъ есьть, тоть всталъ з мертвыхъ •
17 Тотъ бо Иродъ пославши, поймалъ Иоана, и звязалъ его (и посадилъ) в темницы, Иродияды деле жоны Филипа бърата своего, ижъ (былъ) оженілсе ею •
18 Мовілъ бо Иоанъ Ироду: негодітьсе тобе мети жоны бърата тъвоего •
19 Иродия тежъ гневалася на него, и хотела его забити, и не могла •
20 Иродъ бо боялъсе Иоана, ведаючі его мужа справеливого и светого, и стерегсе его, и слухаючи его много чинилъ, и вдячне его слухивалъ • [12]
21 И пригодівшися дню потребному,[13] гды Иродъ на именіны съвои вечеру чинилъ княземъ своимъ и тисечникомъ, и старшимъ Галилейскимъ •
22 И (гды тежъ) увошодши дочка тое Иродияды, и плясала и угодила Ироду, и седячи с німъ, рекъ король (тойто) девце: проси у мене чого кольвекъ хочешь, и дамъ тобе •
23 И присегнулъ ей, ижъ есьли попросишь ме, дамъ ти и до пол королевства моего •
24 Она пакъ вышодши, рекла матце своей: чого просить, а она рекла: головы Иоана Кресьтителя •
25 И вшодъши на тых местъ с квапеньемъ до короля, просила мовечи: хочу бы ми далъ оттятую[14] на мисе голову Иоана Кресьтителя •
26 И засмучонъ былъ королъ, лечъ присеги деле и для седячихъ с нимъ, не хотелъ отмовитьсе ей •
27 И на тых местъ пославши король ката, велелъ принесьти голову его, а онъ шодши, сьтялъ его в темніцы •
28 И прінесъ голову его на місе, и далъ ее девце, а девъка дала ее матце своей •
29 И услышавши ученики его, пришлі и взяли трупъ его, и положили его в гробе •
30 И собралися Апостоли к Исусу, и взвесьтили Ему все, и што учинили и (чого) научили • [15]
31 И рекъ имъ: пойдите вы сами в пустое месцо одны, и отпочіньте мало, былі бо приходячие и отходячие многіе, и ні есьті имъ (не) было коли • [16]
32 И шли в пустое месцо лодьею одны •
33 И видели ихъ идучихъ, и познали ихъ многие, и пеши зо всих городовъ збегалисе тамъ, и упереділъ ихъ, и зошлісе к Нему •
34 И вышодши увиделъ Исусъ тижбу многую, и умилосердилъсе ихъ, же были якъ овъцы не маючи пастыря, и почалъ ихъ учити много •
35 И ужо године многой будучи, приступивши к Нему ученики Его, мовили: ижъ пусто есьть месцо, и ужо година многая • [17]
36 Отъпусти ихъ, бы шодши в околичныхъ селахъ и весяхъ купили собе хлебовъ, не мають бо чого есьти •
37 А Онъ отповелаючи рекъ имъ: дайте вы имъ есьти, и мовіли Ему, нехай (же) шодши купимъ за двесте грошей хлебовъ, и дадимъ имъ есьті •
38 Онъ пакъ рекъ имъ: колько хлебовъ маете, идите и огледите, и доведавшисе, мовили: пять и дьве рибы •
39 И велелъ имъ посадити всихъ, редами редами, на траве зеленой •
40 И сели лехами лехами, по сту и по петидесять •
41 И взявши пять хлебовъ, и дьве рибы, и возревши на небо, блогославилъ, и поламалъ хлебы, и давалъ ученикомъ Своимъ, бы покладали перед ними, и обедьве рибы розъделилъ всимъ •
42 И ели въси и насытилисе •
43 И взяли крохъ, дванадъцать кошовъ полныхъ, и (остаткі) з рибъ •
44 А было едшихъ хлебы, пять тисечей мужовъ •
45 И на тых местъ прінутилъ ученики Свои ввойти в лодью, и упережаті Его на ономъ берегу к Вифсаиде, докуль Самъ отпусьтить тижбы • [18]
46 И отмовившисе имъ, шолъ на гору молитисе •
47 А вечору будучи, была лодья посередъ моря, а (Онъ) Самъ одинъ на земъли • [19]
48 И виделъ ихъ (непогоду) терпечих в плаванью, былъ бо ветръ противный имъ, и о четьвертой сторожи ночной, пришолъ к німъ по морю ходечі, и хотелъ мінути ихъ •
49 Лечъ они увидевъши Его ходячого по морю, домънимали облуду быти, и закричали •
50 Вси бо Его видели, и стривожилися, и на тых местъ мовилъ с ними, и рекъ имъ: уфаите, Я естомъ не бойтесе • [20]
51 И въшолъ к нимъ в лодью, и улегсе ветръ, и вельми (ажъ) назбыть в собе злеклисе и дивилисе •
52 Не зрозумелі бо о хлебохъ, было бо серце ихъ закаменено •
53 И перешодши, пришли в землю Генесаретскую и пристали •
54 И вышодшимъ имъ з лодьи, на тых местъ познавши Его •
55 Обегши всю сторону тую, почали на короватяхъ пріносити хорихъ, где слышали ижъ тамъ есьть • [21]
56 И кудова кольвекъ входилъ в веси, або в городы, або села, на дорогахъ покладали немоцные, и просили Его, бы хотя краю одежи Его дотыкалисе, и которие кольвекъ дотыкалісе Его оздоровлялі •
Каментары ці зноскі:
2 [1] Мат 13:54; Лук 4:16; Иоан 4:43; Выше (Мар) 1:27.
3 [2] Мат 13:55,57; Лук 4:22; Иоан 6:42.
6 [3] Мат 9:35; Лук 13:22.
7 [4] Мат 10:1; Выше (Мар) 3:14; Лк 9:1.
8 [5] Мат 10:9; Лк 9:3 и 10:4.
9 [6] Деи 12:8; Ефес 6:15.
10 [7] Мат 10:11; Лк 9:4.
11 [8] Мат 10:14; Лк 9:5; Деи 13:51 и 18:6.
12 [9] Лк 9:6.
13 [10] Яков 5:14.
14 [11] Ест то и в некоторих словенских в строце на : край в кажъломъ ест.
20 [12] Мат 14:5.
21 [13] В иныхъ перекладахъ: потому.
25 [14] В иныхъ перекладахъ: ужо.
30 [15] Лк 9:10.
31 [16] Лк 9:10; Мат 14:13; Иоан 6:1; Выше (мар) 3:20.
35 [17] Мат 14:15; Лк 9:12; Иоан 6:5.
45 [18] Мат 14:22.
47 [19] Мат 14:24; Иоан 6:17.
50 [20] Мат 14:27.
55 [21] Мат 14:25.
Тяпінскі па рознаму выкарыстоўвае — колвекъ / кольвекъ (10/11); Иродия / Иродияды (19/22); німъ / нимъ (22/26); мисе / місе (25/28); редами / лехами (39/40); дивілисе / дивилисе (2/51); дотыкалисе / дотыкалісе (56).
У Архангельскім асобніке пераблытаны старонкі у разьдзелах 5−7.
Знайшлі памылку ў тэксце? Вылучыце яе і націсніце:
Ctrl + Enter
Евангелия напісанная черезъ Марка, 6 разьдзел
Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў. Паспрабуйце, магчыма, вы будзеце прыемна здзіўлены.
Public Domain — народны здабытак.
2024, Алічбованне — Сяргей Шобік, biblia.by.