Выслоўяў Саламонавых 8 разьдзел
Кніга выслоўяў Саламонавых
Пераклад Чарняўскага 2017 → Пераклад Антонія Бокуна
Няўжо гэта не мудрасць усклікае і не разважлівасць падымае голас свой?
Ці ж мудрасьць ня кліча? Ці ж розум ня ўзносіць голас свой?
На найвышэйшых вяршынях і на дарозе, на сярэдзіне сцежак стоячы,
На вяршынях гораў, пры дарозе, на ростанях стаіць яна,
ля брам пры ўваходзе ў горад, у саміх дзвярах усклікае:
каля брамаў, пры ўваходзе ў горад, пры дзьвярах кліча яна.
«О людзі, да вас заклікаю, і кліч мой да сыноў чалавечых.
«Да вас, людзі, я клічу, да сыноў чалавечых голас мой!
Пазнайце, прастакі, мудрасць, а неразумныя — звярніце ўвагу;
Навучыцеся, неразумныя, цьвярозаму мысьленьню, і вы, бязглуздыя, прыдбайце сэрца разумнае.
слухайце, бо буду гаварыць пра справы важныя і расчыняцца вусны мае, каб сказаць праўду.
Слухайце, бо буду гаварыць пра рэчы важныя, і расчыняцца вусны мае, каб сказаць рэчы справядлівыя.
Праўду выкажа горла маё, а вусны мае праклянуць бязбожніка.
Бо праўду выкажа язык мой, і няправасьць — брыдота для вуснаў маіх.
Усе размовы вуснаў маіх — справядлівыя, няма ў іх ніякай ілжы і крывадушнасці;
Выслоўі вуснаў маіх справядлівыя, няма ў іх хлусьні́ і крывадушнасьці.
усе яны ясныя для разумных і справядлівыя для тых, хто здабывае веды.
Усе яны простыя для разумнага і пра́выя для тых, што знайшлі веданьне.
Прыміце настаўленне маё, а не грошы, лепш навучанне, чым адборнае золата.
Прыйміце настаўленьне маё, а ня срэбра; лепш веды, чым чыстае золата,
Бо мудрасць лепшая за самацветы, і ўсё, што жадаеш, не можа параўнацца з ёю.
бо мудрасьць лепшая за пэрлы, і ніякія каштоўнасьці не параўнаюцца з ёю.
Я, Мудрасць, жыву з Разважлівасцю і знаходжу дасканаласць ведаў.
Я, мудрасьць, жыву разам з цьвярозым мысьленьнем і шукаю веданьня з разважнасьцю.
Страх Госпадаў — ненавідзець высакамер’е, пыхлівасць, ліхую дарогу, зло, ненавідзець і крывадушныя вусны.
Страх перад ГОСПАДАМ — ненавідзець ліхоту, пыху і фанабэрыстасьць; шляхі ліхія і вусны крывадушныя я ненавіджу.
Маё — гэта розум і разважлівасць, разважлівасць — мая, мужнасць — мая.
У мяне рада і сапраўдная мудрасьць, я — розум, у мяне сіла.
Праз мяне цары царуюць і валадары выносяць справядлівыя рашэнні;
Дзякуючы мне валадары валадараць і князі дзейнічаюць справядліва.
праз мяне кіраўнікі загадваюць, а магутныя людзі справядлівасць чыняць.
Дзякуючы мне начальнікі кіруюць, і магнаты, і ўсе судзьдзі зямлі.
Я люблю тых, хто любіць мяне; і тыя, хто зранку пільнуе мяне, знойдуць мяне.
Я люблю тых, якія мяне любяць, і тыя, што мяне шукаюць, знойдуць мяне.
Са мною — багацце і слава, незнішчальныя скарбы і справядлівасць.
У мяне багацьце і слава, незьнішчальныя скарбы і праведнасьць.
Бо плод мой даражэйшы за золата і золата вышэйшага гатунку, а народжанае мною — за адборнае срэбра.
Плод мой лепшы за золата, і золата найчысьцейшае; і карысьць ад мяне лепшая за срэбра адборнае.
Я хаджу па дарогах справядлівасці і пасярэдзіне сцежак законнасці,
Я хаджу сьцежкамі праведнасьці і шляхамі правасудзьдзя,
каб абагаціць тых, хто любіць мяне, і напоўніць іх скарбніцы.
каб даць тым, што любяць мяне, у спадчыну даброцьці, і скарбніцы іх я напоўню.
Госпад валодае мною ад пачатку дарог Сваіх, перш чым стварыць што-небудзь, спакон вякоў;
ГОСПАД меў мяне на пачатку шляху Свайго, раней стварэньняў Сваіх, спакон вякоў.
ад вечнасці ўзнікла я і ад старадаўніх часоў, перш чым зямля ўзнікла.
Спрадвеку я пастаўлена, ад пачатку, перш, чым зямля паўстала.
Яшчэ не існавалі бездані, а я ўжо ўтварылася; яшчэ крыніцы не былі цяжкімі ад водаў;
Я нарадзілася, калі яшчэ не было бяздоньняў, калі не было крыніцаў, напоўненых водамі.
перш, чым узвысіліся горы, раней за ўзгоркі я нарадзілася.
Перш, чым горы былі асаджаны, перад узгоркамі я нарадзілася,
Дагэтуль Ён не стварыў зямлю, і палі, і пачатак зямлі ў сусвеце.
калі Ён яшчэ не стварыў ані зямлі, ані палёў, ані пачатковых пылінак сусьвету.
Калі асноўваў нябёсы, я была там, калі цвёрдым законам і кругам абводзіў бездані,
Калі Ён прыгатоўваў нябёсы, я была там. Калі Ён крэсьліў скляпеньне над абліччам бяздоньня,
калі воблакі ўстанаўліваў угары, калі ўмацаваліся вытокі бездані,
калі засноўваў аблокі ўгары́, калі ўмацоўваў крыніцы бяздоньня,
калі мору вызначаў Ён яго мяжу і водам, каб з рубяжоў сваіх не выходзілі, калі паклаў асновы зямлі,
калі вызначаў для мора статут ягоны, каб воды не перакрочвалі рубяжы свае, калі заклада́ў падвалі́ны зямлі,
я разам з Ім усё рашала ў захапленні, гуляючы перад Ім штодзень,
я была ў Яго дойлідам і была пацехай [Яго] кожны дзень, радуючыся перад абліччам Яго кожны час,
гуляючы па крузе зямлі, і радасці мае — быць з сынамі чалавечымі.
радуючыся на заселенай зямлі Яго, і пацеха мая — з сынамі чалавечымі.
Такім чынам, цяпер, сыны, слухайце мяне: шчасныя тыя, хто зберагае дарогі мае,
І цяпер, дзеці, паслухайце мяне, і шчасьлівыя тыя, якія трымаюцца шляхоў маіх.
слухайце настаўленне і будзеце мудрымі, і не адкідайце яго.
Слухайце настаўленьне, і будзеце мудрымі, і не адкідайце яго.
Шчасны чалавек, які слухае мяне, і які штодзень пільнуе пры дзвярах маіх, і хто пільнуе каля вушака дзвярэй маіх.
Шчасьлівы чалавек, які слухае мяне, чуваючы кожны дзень пры брамах маіх, стоячы на варце пры парозе дзьвярэй маіх.
Хто мяне знойдзе, той жыццё знойдзе і атрымае радасць ад Госпада.
Бо хто знойдзе мяне, знойдзе жыцьцё і атрымае ласку ад ГОСПАДА,
А хто адносна мяне зграшыць, той пакалечыць душу сваю: усе, хто ненавідзіць мяне, — смерць любяць».
а хто грашыць супраць мяне, шкодзіць душы сваёй; усе, якія ненавідзяць мяне, любяць сьмерць».
