1 летапісаў 16 разьдзел
Першая кніга летапісаў
Пераклад Чарняўскага 2017 → Пераклад Васіля Сёмухі
Дык перанеслі каўчэг Божы і памясцілі яго ў сярэдзіне палаткі, якую расцягнуў для яго Давід, і ўсклалі цэласпаленні і ахвяры прымірэння перад Богам.
І прынесьлі каўчэг Божы, і паставілі яго сярод скініі, якую зладзіў яму Давід, і ўзьнесьлі Богу цэласпаленьні і мірныя ахвяры.
І калі Давід скончыў складанне цэласпаленняў ды ахвяры прымірэння, дабраславіў ён народ у імя Госпада.
Калі Давід закончыў цэласпаленьні і прынашэньне мірных ахвяр, дык дабраславіў народ імем Госпада.
Затым надзяліў кожнага ізраэльца ад мужчыны да жанчыны боханам хлеба, і ляпёшкай фінікаў, і фігамі.
І раздаў усім Ізраільцянам, і мужчынам і жанчынам, па адным хлебе і па кавалку мяса і па кубку віна,
І ён устанавіў перад каўчэгам Госпадавым паслугачоў з левітаў, каб памяталі аб абавязках перад Ім, і славілі, і ўсхвалялі Госпада, Бога Ізраэля:
і паставіў на службу перад каўчэгам Гасподнім некаторых зь лявітаў, каб яны славасловілі, дзякавалі і ўсхвалялі Госпада Бога Ізраілевага:
Асафа, кіраўніка, і намесніка яго Захарыю, далей Егіэля, і Сэмірамота, і Егіэля, і Матацію, і Эліяба, і Банаю, і Абэдэдома, і Егіэля для ігры на псалтэрыёнах і цытрах, а Асафа, каб граў на цымбалах,
Асафа галоўным, другім пасьля яго Захара, Еела, Шэмірамофа, Ехііла, Мататыю, Эліяфа, і Ванэю, Авэд-Эдома і Еела з псалтырамі і цытрамі, і Асафа для ігры на кімвалах,
Банаю ж і Яхазіэля — святароў, каб трубілі ў трубы заўсёды перад каўчэгам запавету Божага.
а Ванэю і Азііла, сьвятароў, каб пастаянна трубілі перад каўчэгам запавета Божага.
У той дзень устанавіў Давід у першы раз, каб хвалілі Госпада праз Асафа ды яго братоў:
У гэты дзень Давід першы раз даў псальму для ўсхваленьня Госпада праз Асафа і братоў ягоных:
«Слаўце Госпада, прызывайце Яго імя, распавядайце між народамі Яго справы;
слаўце Госпада, узносьце імя Яго; абвяшчайце ў народах дзеі Ягоныя;
спявайце Яму і спявайце псалмы і распавядайце пра ўсе Яго цуды.
сьпявайце Яму, барабаньце Яму; раскажэце пра ўсе цуды Ягоныя;
Хваліце Яго святое імя, хай цешыцца сэрца тых, хто шукае Госпада.
хвалецеся імем Ягоным сьвятым: хай радуецца сэрца тых, што шукаюць Госпада;
Шукайце Госпада і магутнасці Яго, аблічча Яго шукайце заўсёды.
знайдзеце Госпада і сілы Яго, шукайце няспынна аблічча Яго;
Памятайце пра цуды Яго, якія ўчыніў, аб знаках Яго і судах вуснаў Яго.
спамінайце цуды, якія Ён стварыў, азнакі Яго і суды вуснаў Ягоных,
Нашчадкі Ізраэля — Яго паслугачы, сыны Якуба — выбраннікі Яго.
вы, семя Ізраілевае, рабы Ягоныя, сыны Якава, выбранцы Яго!
Ён, Госпад, Бог наш, Яго прысуды на ўсёй зямлі.
Ён Гасподзь Бог наш, суды Яго па ўсёй зямлі.
Памятайце пра Яго запавет вечна, пра Яго слова, якое загадаў на тысячу пакаленняў,
Памятайце вечна запавет Яго, слова, якое Ён наказаў ў тысячы родаў,
пра запавет, які заключыў з Абрагамам, і пра прысягу Яго Ізааку.
тое, што наказваў Абрагаму, і ў чым запрысягаўся Ісаку,
І ўстанавіў яго Якубу як закон, і Ізраэлю як Вечны Запавет,
і што паставіў Якаву ў закон, і Ізраілю ў запавет вечны,
кажучы: “Дам табе зямлю Ханаана, як долю вашай спадчыны”,
кажучы: табе дам Я зямлю Ханаанскую, у спадчынны надзел вам.
калі былі вы яшчэ нямногімі, нямногія і чужыя ў ёй.
Яны былі тады малалікія і мізэрныя, і прыхадні ў ёй,
І пераходзілі вы з пакалення ў пакаленне, ды ад царства — да другога народа.
і пераходзілі ад народу да народу, і з аднаго царства да другога народу;
І не дазволіў нікому крыўдзіць іх, але за іх караў цароў:
але Ён нікому не дазволіў крыўдзіць іх і выкрываў за іх цароў:
“Не кранайце маіх намашчэнцаў дый прарокам маім не рабіце зла”.
не дакранайцеся да памазаных Маіх, і прарокам Маім не рабеце ліха.
Спявайце Госпаду, уся зямля, дзень пры дні абвяшчайце Яго збаўленне,
Сьпявайце Госпаду, уся зямля, дабравяшчайце дзень у дзень выратаваньне Яго.
распавядайце між паганамі Яго славу, ва ўсіх народах Яго цуды.
Абвяшчайце язычнікам славу Яго, усім народам цуды Ягоныя,
Бо Госпад Магутны і вельмі слаўны і страшны для ўсіх багоў;
бо вялікі Гасподзь і варты хвалы, страшны больш за ўсіх багоў.
бо ўсе багі паганаў — нікчэмныя, Госпад жа нябёсы стварыў.
Бо ўсе багі народаў нішто, а Гасподзь нябёсы стварыў.
Слава і веліч перад абліччам Яго, моц і радасць — у Яго месцы.
Слава і веліч перад абліччам Ягоным, магутнасьць і радасьць на месцы Ягоным.
Аддавайце Госпаду, сем’і народаў, аддавайце Госпаду славу і ўладу;
Узьнясеце Госпаду, плямёны народаў, узьнясеце Госпаду славу і гонар,
аддавайце Госпаду славу імю Яго, ускладайце ахвяру і прыходзьце перад аблічча Яго, і ў адзенні святочным пакланіцеся Госпаду.
узьнясеце Госпаду славу імю Ягонаму. Вазьмеце дар, ідзеце прад аблічча Яго, пакланецеся Госпаду і хараству сьвятыні Яго.
Хай уздрыгвае перад Ім уся зямля; Ён бо аснаваў свет непарушны.
Трымці перад ім, уся зямля, бо Ён запачаткаваў сусьвет, ён не пахісьнецца.
Хай цешацца нябёсы і радуецца зямля і хай кажуць усе народы: “Госпад валадарыць!”
Хай весяляцца нябёсы, хай радуецца зямля, і хай скажуць у народах: Гасподзь валадарыць!
Хай шуміць мора і ўсё, што яго запаўняе, хай цешацца палі і ўсё, што на іх існуе,
Хай плешча мора і што напаўняе яго, хай радуецца поле і ўсё, што на ім.
тады хай перад Госпадам славяць Яго дрэвы лясныя, Ён бо прыйшоў судзіць зямлю.
Хай пераможна радуюцца ўсе дрэвы дуброўныя прад абліччам Госпада, бо Ён ідзе судзіць зямлю.
Слаўце Госпада, бо Ён добры, бо вечная Яго міласэрнасць.
Слаўце Госпада, бо навечна міласьць Яго,
І кажыце: “Ратуй нас, Божа, Збаўца наш, і збяры нас, і вырві ад народаў, каб славілі мы святое імя Тваё і каб цешыліся песнямі Тваімі.
і скажэце: выратуй, Божа, Выратавальнік наш! зьбяры нас і выбаві нас ад народаў, хай жа ўславім сьвятое імя Тваё і хай жа пахвалімся славаю Тваёю!
Дабраславёны Госпад, Бог Ізраэля, на векі вечныя”». Дый увесь народ сказаў: «Амін!» і «Слава Госпаду!»
Дабраславёны Гасподзь Бог Ізраілеў ад веку і да веку! І сказаў увесь народ: амін! алілуя!
Так пакінуў Давід там, перад каўчэгам запавету Госпада, Асафа і братоў яго, каб спаўнялі паслугу пастаянна перад каўчэгам па рытуале кожнага дня.
Давід пакінуў там, перад каўчэгам запавета Гасподняга, Асафа і братоў ягоных, каб яны служылі перад каўчэгам пастаянна, кожны дзень,
Потым Абэдэдома з шасцюдзесяццю васьмю яго братамі, і Абэдэдома, сына Ідытуна, ды Госу паставіў прыдзвернымі.
і Авэд-Эдома і братоў ягоных, шэсьцьдзясят восем чалавек; Авэд-Эдома, сына Ідытунавага, і Хосу — брамнікамі,
А святара Садока і братоў яго, святароў, паставіў перад скініяй Госпада на ўзгорку, што ў Габаоне,
а Садока сьвятара і братоў сьвятароў перад жытлішчам Гасподнім, што на вышыні ў Гаваоне,
каб ускладалі Госпаду на ахвярніку цэласпаленні заўсёды: раніцай і вечарам, паводле ўсяго таго, што напісана ў законе Госпада, які паручыў Ізраэлю.
для прынашэньня цэласпаленьняў Госпаду на ахвярніку цэласпаленьня пастаянна, раніцай і ўвечары, і дзеля ўсяго, што напісана ў законе Госпада, які Ён наказаў Ізраілю;
І з імі былі Геман і Ідытун і астатнія выбраныя, па імю вызначаныя, каб дзякавалі Госпаду: «Бо навек міласэрнасць Яго».
і зь імі Эмана і Ідытуна і іншых выбраных якія назначаны паіменна, каб славіць Госпада, бо вечная міласьць Ягоная.
І з імі Геман і Ідытун славілі Бога, граючы на трубах, і ўдараючы моцна ў цымбалы і іншыя музычныя інструменты; сыноў жа Ідытуна паставіў прыдзвернымі.
Пры іх Эман і Ідытун праслаўлялі Бога, іграючы на трубах, кімвалах і розных музычных спарудах; а сыноў Ідытуна паставіў пры браме.
Затым вярнуўся ўвесь народ, кожны ў свой дом, і таксама Давід, каб дабраславіць свой дом.
І пайшоў увесь народ, кожны ў свой дом; вярнуўся і Давід, каб дабраславіць дом свой.