1 летапісаў 16 разьдзел

 

 

Дык перанеслі каўчэг Божы і памясцілі яго ў сярэдзіне палаткі, якую расцягнуў для яго Давід, і ўсклалі цэласпаленні і ахвяры прымірэння перад Богам.

 

І прынесьлі Каўчэг Божы, і паставілі яго ў сярэдзіне Намёту, які Давід падрыхтаваў для яго, і склалі ахвяры цэласпаленьня і ахвяры мірныя перад абліччам Божым.

І калі Давід скончыў складанне цэласпаленняў ды ахвяры прымірэння, дабраславіў ён народ у імя Госпада.

 

І скончыў Давід паліць цэласпаленьні і ахвяры мірныя, і дабраславіў народ у імя ГОСПАДА.

Затым надзяліў кожнага ізраэльца ад мужчыны да жанчыны боханам хлеба, і ляпёшкай фінікаў, і фігамі.

 

І раздаў усім Ізраільцянам, як мужчынам, так і жанчынам, кожнаму па бохану хлеба, і па кавалку мяса, і па кілішку віна.

І ён устанавіў перад каўчэгам Госпадавым паслугачоў з левітаў, каб памяталі аб абавязках перад Ім, і славілі, і ўсхвалялі Госпада, Бога Ізраэля:

 

І паставіў на службу перад Каўчэгам ГОСПАДА на служэньне лявітаў, каб нагадвалі [пра Яго], славілі і хвалілі ГОСПАДА, Бога Ізраіля:

Асафа, кіраўніка, і намесніка яго Захарыю, далей Егіэля, і Сэмірамота, і Егіэля, і Матацію, і Эліяба, і Банаю, і Абэдэдома, і Егіэля для ігры на псалтэрыёнах і цытрах, а Асафа, каб граў на цымбалах,

 

Асаф — галоўны, і намесьнік ягоны Захарыя, Еіэль, Шэмірамот, Ехіэль, Матытыя, Эліяў, Баная, Абэд-Эдом і Еіэль з псалтырам і гусьлямі, Асаф — на цымбалах гучных,

Банаю ж і Яхазіэля — святароў, каб трубілі ў трубы заўсёды перад каўчэгам запавету Божага.

 

Бэная і Яхазіэль, сьвятары — заўсёды [трубіць] у трубы перад Каўчэгам Запавету Божага.

У той дзень устанавіў Давід у першы раз, каб хвалілі Госпада праз Асафа ды яго братоў:

 

У той дзень Давід упершыню загадаў славіць ГОСПАДА Асафу і братам ягоным:

«Слаўце Госпада, прызывайце Яго імя, распавядайце між народамі Яго справы;

 

«Слаўце ГОСПАДА, клічце імя Ягонае, паведамляйце між народамі дзеі Ягоныя!

спявайце Яму і спявайце псалмы і распавядайце пра ўсе Яго цуды.

 

Сьпявайце Яму, выслаўляйце Яго, размаўляйце пра ўсе цудоўныя дзеі Ягоныя.

Хваліце Яго святое імя, хай цешыцца сэрца тых, хто шукае Госпада.

 

Хваліцеся імем Ягоным сьвятым! Няхай весяліцца сэрца тых, што шукаюць ГОСПАДА.

Шукайце Госпада і магутнасці Яго, аблічча Яго шукайце заўсёды.

 

Шукайце ГОСПАДА і сілу Ягоную, шукайце аблічча Ягонае заўсёды.

Памятайце пра цуды Яго, якія ўчыніў, аб знаках Яго і судах вуснаў Яго.

 

Узгадвайце цудоўныя дзеі Ягоныя, якія Ён зрабіў, цуды Ягоныя і прысуды вуснаў Ягоных.

Нашчадкі Ізраэля — Яго паслугачы, сыны Якуба — выбраннікі Яго.

 

Насеньне Ізраіля, слугі Ягоныя, сыны Якуба, выбранцы Ягоныя!

Ён, Госпад, Бог наш, Яго прысуды на ўсёй зямлі.

 

Ён — ГОСПАД, Бог наш; па ўсёй зямлі суды Ягоныя.

Памятайце пра Яго запавет вечна, пра Яго слова, якое загадаў на тысячу пакаленняў,

 

Ён памятае на вякі Запавет Свой, слова, якое загадаў на тысячу пакаленьняў,

пра запавет, які заключыў з Абрагамам, і пра прысягу Яго Ізааку.

 

якое заключыў з Абрагамам, і прысягу Сваю Ісааку.

І ўстанавіў яго Якубу як закон, і Ізраэлю як Вечны Запавет,

 

Ён паставіў Якубу як пастанову, Ізраілю — запавет вечны,

кажучы: “Дам табе зямлю Ханаана, як долю вашай спадчыны”,

 

кажучы: “Табе Я дам зямлю Ханаан, [пракладу] шнур спадчыны вашай”.

калі былі вы яшчэ нямногімі, нямногія і чужыя ў ёй.

 

Калі было ў вас людзей мала на лік, вельмі мала і [вы былі] чужынцы ў ёй,

І пераходзілі вы з пакалення ў пакаленне, ды ад царства — да другога народа.

 

і пераходзілі ад народу да народу, і ад [аднаго] валадарства да іншага народу,

І не дазволіў нікому крыўдзіць іх, але за іх караў цароў:

 

Ён не дазволіў нікому прыгнятаць іх, і караў дзеля іх валадароў:

“Не кранайце маіх намашчэнцаў дый прарокам маім не рабіце зла”.

 

[кажучы]: “Не чапайце памазанцаў Маіх, і прарокам Маім не рабіце благога!”

Спявайце Госпаду, уся зямля, дзень пры дні абвяшчайце Яго збаўленне,

 

Сьпявайце ГОСПАДУ, уся зямля, дабравесьціце з дня на дзень збаўленьне Ягонае.

распавядайце між паганамі Яго славу, ва ўсіх народах Яго цуды.

 

Абвяшчайце між народамі славу Ягоную, між усімі людзьмі — цуды Ягоныя.

Бо Госпад Магутны і вельмі слаўны і страшны для ўсіх багоў;

 

Бо вялікі ГОСПАД і годны хвалы, годны страху больш за ўсіх багоў.

бо ўсе багі паганаў — нікчэмныя, Госпад жа нябёсы стварыў.

 

Бо ўсе богі народаў — ідалы, а ГОСПАД нябёсы ўчыніў.

Слава і веліч перад абліччам Яго, моц і радасць — у Яго месцы.

 

Слава і велічнасьць перад абліччам Ягоным, моц і краса — на месцы Ягоным.

Аддавайце Госпаду, сем’і народаў, аддавайце Госпаду славу і ўладу;

 

Аддайце ГОСПАДУ, плямёны народаў, аддайце ГОСПАДУ славу і моц.

аддавайце Госпаду славу імю Яго, ускладайце ахвяру і прыходзьце перад аблічча Яго, і ў адзенні святочным пакланіцеся Госпаду.

 

Аддайце ГОСПАДУ славу імя Ягонага. Прынясіце дары і ідзіце перад аблічча Ягонае. Пакланіцеся ГОСПАДУ ў велічы сьвятыні.

Хай уздрыгвае перад Ім уся зямля; Ён бо аснаваў свет непарушны.

 

Дрыжы перад абліччам Ягоным, уся зямля. Ён сусьвет умацаваў, не пахісьнецца.

Хай цешацца нябёсы і радуецца зямля і хай кажуць усе народы: “Госпад валадарыць!”

 

Няхай узрадуюцца нябёсы, няхай узьвесяліцца зямля, і няхай скажуць між народамі: “ГОСПАД валадарыць!”

Хай шуміць мора і ўсё, што яго запаўняе, хай цешацца палі і ўсё, што на іх існуе,

 

Няхай мора гудзе і тое, што ў ім, няхай усьцешыцца поле і ўсё, што на ім.

тады хай перад Госпадам славяць Яго дрэвы лясныя, Ён бо прыйшоў судзіць зямлю.

 

Тады будуць усклікаць дрэвы лясныя перад абліччам ГОСПАДА, бо Ён прыходзіць судзіць зямлю.

Слаўце Госпада, бо Ён добры, бо вечная Яго міласэрнасць.

 

Выслаўляйце ГОСПАДА, бо Ён добры, бо на вякі міласэрнасьць Ягоная.

І кажыце: “Ратуй нас, Божа, Збаўца наш, і збяры нас, і вырві ад народаў, каб славілі мы святое імя Тваё і каб цешыліся песнямі Тваімі.

 

І кажыце: “Збаў нас, Божа збаўленьня нашага! І зьбяры нас, і выбаў нас ад паганаў, каб мы маглі славіць імя Тваё сьвятое і хваліліся славай Тваёй!”

Дабраславёны Госпад, Бог Ізраэля, на векі вечныя”». Дый увесь народ сказаў: «Амін!» і «Слава Госпаду!»

 

Дабраслаўлёны ГОСПАД, Бог Ізраіля, ад веку і аж на вякі!» І сказаў увесь народ: «Амэн!», і славіў ГОСПАДА.

Так пакінуў Давід там, перад каўчэгам запавету Госпада, Асафа і братоў яго, каб спаўнялі паслугу пастаянна перад каўчэгам па рытуале кожнага дня.

 

І [Давід] пакінуў там, перад Каўчэгам Запавету ГОСПАДА, Асафа і братоў ягоных, каб яны служылі перад Каўчэгам заўсёды, паводле патрэбы кожнага дня,

Потым Абэдэдома з шасцюдзесяццю васьмю яго братамі, і Абэдэдома, сына Ідытуна, ды Госу паставіў прыдзвернымі.

 

і Абэд-Эдома і братоў ягоных, шэсьцьдзясят восем; а Абэд-Эдома, сына Едутуна, і Хосу прыдзьвернікамі,

А святара Садока і братоў яго, святароў, паставіў перад скініяй Госпада на ўзгорку, што ў Габаоне,

 

а Цадока, сьвятара, і братоў ягоных, сьвятароў — перад Сялібай ГОСПАДА, на ўзгорку, які ў Гібэоне,

каб ускладалі Госпаду на ахвярніку цэласпаленні заўсёды: раніцай і вечарам, паводле ўсяго таго, што напісана ў законе Госпада, які паручыў Ізраэлю.

 

каб складалі цэласпаленьні ГОСПАДУ на ахвярніку цэласпаленьня заўсёды, раніцаю і ўвечары, паводле ўсіх пастановаў Закону ГОСПАДА, які Ён загадаў Ізраілю.

І з імі былі Геман і Ідытун і астатнія выбраныя, па імю вызначаныя, каб дзякавалі Госпаду: «Бо навек міласэрнасць Яго».

 

І з імі Гэмана і Едутуна і іншых выбраных, якія прызначаныя па імёнах, каб славіць ГОСПАДА, бо на вякі міласэрнасьць Ягоная.

І з імі Геман і Ідытун славілі Бога, граючы на трубах, і ўдараючы моцна ў цымбалы і іншыя музычныя інструменты; сыноў жа Ідытуна паставіў прыдзвернымі.

 

Пры іх Гэман і Едутун з трубамі і цымбаламі, каб граць, і з інструмэнтамі для сьпеваў Божых; а сыны Едутуна — пры браме.

Затым вярнуўся ўвесь народ, кожны ў свой дом, і таксама Давід, каб дабраславіць свой дом.

 

І адыйшоў увесь народ, кожны ў дом свой, і вярнуўся Давід, каб дабраславіць дом свой.