1 летапісаў 16 разьдзел

 

 

Дык перанеслі каўчэг Божы і памясцілі яго ў сярэдзіне палаткі, якую расцягнуў для яго Давід, і ўсклалі цэласпаленні і ахвяры прымірэння перад Богам.

 

І прынесьлі скрыню Божую, і пастанавілі яе сярод будану, каторы Давід разапнуў дзеля яе, і абраклі ўсепаленьні а супакойныя аброкі перад відам Божым.

І калі Давід скончыў складанне цэласпаленняў ды ахвяры прымірэння, дабраславіў ён народ у імя Госпада.

 

І скончыў Давід паліць усепаленьні а супакойныя аброкі, і дабраславіў люд імям СПАДАРА,

Затым надзяліў кожнага ізраэльца ад мужчыны да жанчыны боханам хлеба, і ляпёшкай фінікаў, і фігамі.

 

І раздаў кажнаму Ізраеляніну, ад мужчыны аж да жонкі, кажнаму па букатцы хлеба, і па кавалку мяса, і па коўні віна.

І ён устанавіў перад каўчэгам Госпадавым паслугачоў з левітаў, каб памяталі аб абавязках перад Ім, і славілі, і ўсхвалялі Госпада, Бога Ізраэля:

 

І пастанавіў на службу перад скрыняю СПАДАРОВАЮ службітоў зь Левітаў, каб прыпаміналі яны, дзякавалі а выхвалялі СПАДАРА, Бога Ізраелявага:

Асафа, кіраўніка, і намесніка яго Захарыю, далей Егіэля, і Сэмірамота, і Егіэля, і Матацію, і Эліяба, і Банаю, і Абэдэдома, і Егіэля для ігры на псалтэрыёнах і цытрах, а Асафа, каб граў на цымбалах,

 

Асафа за галоўнага, наступным па ім Захару, Ееля а Шэмірамофа а Егіеля а Матыфу а Елява а Венаю а Овед-Едома а Ееля зь лірамі а гусьлямі, а Асафа да гры на цымбалах,

Банаю ж і Яхазіэля — святароў, каб трубілі ў трубы заўсёды перад каўчэгам запавету Божага.

 

А Венаю а Ягазеля сьвятароў — штачасна трубіць перад скрыняю змовы Божае.

У той дзень устанавіў Давід у першы раз, каб хвалілі Госпада праз Асафа ды яго братоў:

 

Гэтага дня Давід упяршыню даў псальму ў руку Асафа а братоў ягоных, дзякаваць Богу:

«Слаўце Госпада, прызывайце Яго імя, распавядайце між народамі Яго справы;

 

Дзякуйце СПАДАРУ, гукайце імя Ягонае, абяшчайце меж людаў учынкі Ягоныя;

спявайце Яму і спявайце псалмы і распавядайце пра ўсе Яго цуды.

 

Пейце Яму, пейце псальмы Яму, размаўляйце праз усі чудосы Ягоныя;

Хваліце Яго святое імя, хай цешыцца сэрца тых, хто шукае Госпада.

 

Хваліцеся сьвятым імям Ягоным; хай вяселіцца сэрца шукаючых СПАДАРА;

Шукайце Госпада і магутнасці Яго, аблічча Яго шукайце заўсёды.

 

Вызукайце СПАДАРА а сілы Ягоныя, шукайце віду Ягонага кажначасна;

Памятайце пра цуды Яго, якія ўчыніў, аб знаках Яго і судах вуснаў Яго.

 

Успамінайце дзіва, што Ён учыніў, знакі Ягоныя й суды вуснаў Ягоных,

Нашчадкі Ізраэля — Яго паслугачы, сыны Якуба — выбраннікі Яго.

 

Насеньне Ізраелява, слугі Ягоныя, сынове Якава, абраныя Ягоныя!

Ён, Госпад, Бог наш, Яго прысуды на ўсёй зямлі.

 

Ён СПАДАР, Бог наш; па ўсёй зямлі суды Ягоныя.

Памятайце пра Яго запавет вечна, пра Яго слова, якое загадаў на тысячу пакаленняў,

 

Памятуйце заўсёды змову Ягоную, слова расказанае тысячам пакаленьняў,

пра запавет, які заключыў з Абрагамам, і пра прысягу Яго Ізааку.

 

Каторую Ён учыніў із Абрагамам, і прысягу Ягоную Ісаку,

І ўстанавіў яго Якубу як закон, і Ізраэлю як Вечны Запавет,

 

І ўстанавіў Якаву права, Ізраелю змоваю вечнаю,

кажучы: “Дам табе зямлю Ханаана, як долю вашай спадчыны”,

 

Кажучы: «Табе дам зямлю Канаанскую, павароз спадку вашага».

калі былі вы яшчэ нямногімі, нямногія і чужыя ў ёй.

 

Як вашы людзі былі нячысьленыя, як штось малое, і чужаземцы ў ёй,

І пераходзілі вы з пакалення ў пакаленне, ды ад царства — да другога народа.

 

І пераходзілі яны ад народу да народу, і ад каралеўства да іншага люду;

І не дазволіў нікому крыўдзіць іх, але за іх караў цароў:

 

Ён не дазволіў людзіне крыўдзіць іх і ганіў каралёў за іх:

“Не кранайце маіх намашчэнцаў дый прарокам маім не рабіце зла”.

 

«Не чапайце памазанцаў Маіх, і прарокам Маім не рабіце ліха!»

Спявайце Госпаду, уся зямля, дзень пры дні абвяшчайце Яго збаўленне,

 

Пейце СПАДАРУ, уся зямля, агалашайце дзень у дзень спасеньне Ягонае.

распавядайце між паганамі Яго славу, ва ўсіх народах Яго цуды.

 

Павядайце меж паган чэсьць Ягоную, меж усіх людаў чудосы Ягоныя;

Бо Госпад Магутны і вельмі слаўны і страшны для ўсіх багоў;

 

Бо вялікі СПАДАР а вельмі славуты, і страшнейшы Ён над усі багі,

бо ўсе багі паганаў — нікчэмныя, Госпад жа нябёсы стварыў.

 

Бо ўсі багі людаў — балваны, але СПАДАР нябёсы ўчыніў.

Слава і веліч перад абліччам Яго, моц і радасць — у Яго месцы.

 

Слава а вялічча перад відам Ягоным, магутнасьць а радасьць на месцу Ягоным.

Аддавайце Госпаду, сем’і народаў, аддавайце Госпаду славу і ўладу;

 

Прызнайце СПАДАРУ, радзімы людаў, прызнайце СПАДАРУ чэсьць а моц.

аддавайце Госпаду славу імю Яго, ускладайце ахвяру і прыходзьце перад аблічча Яго, і ў адзенні святочным пакланіцеся Госпаду.

 

Прызнайце СПАДАРУ чэсьць імені Ягонага. Прынясіце дар, ды йдзіце перад від Ягоны, сьціце СПАДАРА ў харашыні сьвятасьці.

Хай уздрыгвае перад Ім уся зямля; Ён бо аснаваў свет непарушны.

 

Дрыжы перад Ім, уся зямля: нават сьвет Ён умацаваў, непахісьнецца.

Хай цешацца нябёсы і радуецца зямля і хай кажуць усе народы: “Госпад валадарыць!”

 

Хай радуюцца нябёсы, хай вяселіцца зямля, і хай скажуць меж народаў: «СПАДАР гаспадарствуе!»

Хай шуміць мора і ўсё, што яго запаўняе, хай цешацца палі і ўсё, што на іх існуе,

 

Раві, мора а паўніня яго, хай цешыцца поле а ўсе, што на ім.

тады хай перад Госпадам славяць Яго дрэвы лясныя, Ён бо прыйшоў судзіць зямлю.

 

Тады запяюць дзервы лесавыя перад СПАДАРОМ, бо Ён прыходзе судзіць зямлю.

Слаўце Госпада, бо Ён добры, бо вечная Яго міласэрнасць.

 

Выхваляйце СПАДАРА, бо добры, бо на векі міласэрдзе Ягонае.

І кажыце: “Ратуй нас, Божа, Збаўца наш, і збяры нас, і вырві ад народаў, каб славілі мы святое імя Тваё і каб цешыліся песнямі Тваімі.

 

І кажыце: «Спасі нас, Божа спасеньня нашага! і зьбяры нас, і выбаў нас ад паган, каб мы маглі славіць сьвятое імя Твае і хваліцца ў хвале Тваёй!

Дабраславёны Госпад, Бог Ізраэля, на векі вечныя”». Дый увесь народ сказаў: «Амін!» і «Слава Госпаду!»

 

Дабраславёны СПАДАР, Бог Ізраеляў, ад веку і аж на векі!» І ўвесь люд сказаў: «Амін!», і хваліў СПАДАРА.

Так пакінуў Давід там, перад каўчэгам запавету Госпада, Асафа і братоў яго, каб спаўнялі паслугу пастаянна перад каўчэгам па рытуале кожнага дня.

 

Давід пакінуў там, перад скрыняю змовы СПАДАРОВАЕ, Асафа а братоў ягоных, каб яны служылі перад скрыняю кажначасна, подле патрэбы кажнага дня,

Потым Абэдэдома з шасцюдзесяццю васьмю яго братамі, і Абэдэдома, сына Ідытуна, ды Госу паставіў прыдзвернымі.

 

І Овед-Едома а братоў ягоных, шасьцьдзясят асьмёх; Овед-Едома Ідуфунёнка а Госу — за брамнікаў,

А святара Садока і братоў яго, святароў, паставіў перад скініяй Госпада на ўзгорку, што ў Габаоне,

 

А Садока сьвятара а братоў ягоных сьвятароў — перад вітальняю СПАДАРОВАЮ, на ўзвышшу, што ў Ґівеоне,

каб ускладалі Госпаду на ахвярніку цэласпаленні заўсёды: раніцай і вечарам, паводле ўсяго таго, што напісана ў законе Госпада, які паручыў Ізраэлю.

 

Да абраканьня ўсепаленьняў СПАДАРУ на аброчніку ўсепаленьня кажначасна, нараніцы і ўвечары, подле ўсёга, што напісана ў Законе СПАДАРОВЫМ, каторы Ён расказаў Ізраелю;

І з імі былі Геман і Ідытун і астатнія выбраныя, па імю вызначаныя, каб дзякавалі Госпаду: «Бо навек міласэрнасць Яго».

 

І зь імі Гэмана а Ідуфуна і іншых абраных, каторыя прызначаны наймя, каб славіць СПАДАРА, бо на векі міласэрдзе Ягонае.

І з імі Геман і Ідытун славілі Бога, граючы на трубах, і ўдараючы моцна ў цымбалы і іншыя музычныя інструменты; сыноў жа Ідытуна паставіў прыдзвернымі.

 

Пры іх Гэман а Ідуфун з трубамі а цымбаламі, каб граць, і із снадзямі да песьняў Божых; сыноў жа Ідуфуна — ля варот.

Затым вярнуўся ўвесь народ, кожны ў свой дом, і таксама Давід, каб дабраславіць свой дом.

 

І адышоў кажны чалавек да дому свайго; зьвярнуўся й Давід, каб дабраславіць дом свой.