Ёва 22 разьдзел
Кніга Ёва
Пераклад Чарняўскага 2017 → Пераклад Васіля Сёмухі
У адказ Эліфаз Тэманіт сказаў:
І адказваў Таманіцянін і сказаў:
«Ці можа чалавек быць карысным Богу, калі ён ледзь разумее, як самому сабе быць карысным?
хіба можа чалавек рабіць карысьць Богу? Разумны робіць карысьць сабе самому.
Што за карысць Усемагутнаму, калі ты будзеш справядлівы, або што ты даеш Яму, калі б учыніў беззаганнай дарогу тваю?
Якая прыемнасьць Усеўладнаму з таго, што ты праведны? І ці будзе Яму выгода з таго, што ты трымаеш дарогі твае ў беззаганнасьці?
Ці ж за тваю пабожнасць будзе Ён дакараць цябе і пойдзе на суд з табою?
Няўжо Ён, баючыся цябе, уступіць з табою ў спаборніцтва, пойдзе судзіцца з табою?
Ды ці ж не праз ліхадзейнасць тваю шматлікую і бясконцую несправядлівасць тваю?
Праўда, злосьць твая вялікая, і беззаконьням тваім няма краю.
Бо ты ўзяў заклад ад братоў тваіх ні за што і з голых здымаў адзенне.
Праўда, ты браў заклад у братоў тваіх ні за што і з паўголых здымаў вопратку.
Ты не падаў вады спрацаванаму і галоднаму адмаўляўся даць хлеба.
Стомленаму смагаю не падаваў вады напіцца і галоднаму адмаўляўся даць хлеба;
Хіба заможнаму чалавеку ўспамогаю будзе зямля і, завалодаўшы, ён будзе жыць на ёй?
а чалавеку дужаму ты даваў зямлю, і заможны сяліўся на ёй.
Удоў адпускаў ты з пустымі рукамі, і плечы сірот абцяжарваў.
Удоваў ты адсылаў ні з чым і сіротаў пакідаў з пустымі рукамі.
Дзеля таго акружаны ты пасткамі і трывожыць цябе страх неспадзяваны.
За тое вакол цябе петлі, і скалануў цябе нечаканы жах,
І ў цемры ты не бачыш, і напор вады прыціскае цябе.
альбо цемра, у якой ты нічога ня бачыш, і мноства водаў пакрыла цябе.
Ці ж Бог не вышэйшы за неба? Паглядзі ўгару на зоркі, як яны высока!
Ці ня вышэй за нябёсы Бог? паглядзі ўгору на зоркі, як яны высока!
А ты кажаш: “Што там ведае Бог? Быццам бы Ён можа судзіць праз імглу.
І ты кажаш: што ведае Бог? ці можа Ён судзіць праз цемру?
Хмары — покрыва Яго, і не бачыць Ён нашых спраў, і ходзіць [толькі] па крузе нябесным”.
Хмары — заслона Ягоная, так што Ён ня бачыць, а ходзіць толькі па нябесным коле.
Ці ты прагнеш трымацца шляху спрадвечнага, па якім крочылі злачынцы,
Няўжо ты трымаешся шляху старажытных, па якім ішлі людзі беззаконныя,
якія заўчасна былі знішчаны, і рака падмыла іх грунт?
якія раней часу былі зьнішчаны, калі вада разьлілася пад аснову іхнюю?
Яны казалі Богу: “Адыдзіся ад нас!” і “Што можа зрабіць нам Усемагутны?”
Яны казалі: адыдзі ад нас! І што зрабіў ім Усеўладны?
Калі Ён багаццем напоўніў дамы іх, іх думкі далёка былі ад Яго.
А Ён напаўняў дамы іхнія дабром. Але рада бязбожных будзь далёка ад мяне!
Справядлівыя будуць бачыць і цешыцца, і чалавек беззаганны будзе смяяцца з іх:
Бачылі праведнікі і радаваліся, і беззаганны сьмяяўся зь яго:
“Сапраўды прапала маёмасць іх, а рэшту іх паглынуў агонь”.
вораг наш зьнішчаны, а што засталося пасьля іх, тое пажэр агонь.
Дык пагадзіся з Ім, і будзь спакойны, і праз гэта будзеш мець найлепшы плён.
Зблізіся ж зь Ім — і будзеш спакойны: праз гэта прыйдзе да цябе дабро.
Прымі з вуснаў Яго закон і пакладзі словы Яго ў сэрцы сваім.
Прымі з вуснаў Ягоных закон і пакладзі слова Ягонае ў сэрца тваё.
Калі навернешся да Усемагутнага, адновішся і адкінеш далёка несправядлівасць ад палаткі сваёй.
Калі ты зьвернешся да Ўсеўладнага, дык зноў уладзішся, адвядзеш беззаконьне ад намёта твайго
Прыпадобніш золата да парахна, а камяні Афіра — да рачнога пяску,
і будзеш кідаць у пыл бліскучы метал, і ў каменьне патокаў — золата Афірскае.
Усемагутны будзе тваёй крыніцай каштоўных металаў і накопіцца срэбрам для цябе.
І будзе Ўсеўладны тваім золатам і бліскучым срэбрам у цябе,
Тады будзеш мець дастаткова асалод ва Усемагутным і падымеш аблічча сваё да Бога.
бо тады будзеш радавацца ва Ўсеўладным і падымеш да Бога аблічча тваё.
З пакораю будзеш прасіць Яго, і Ён выслухае цябе, і ты споўніш абяцанні свае.
Памолішся Яму, і Ён пачуе цябе, і ты выканаеш абяцаньні твае.
Што пастановіш, прыйдзе да цябе, і на дарогах тваіх будзе свяціць святло.
Замысьліш намер, і ён зьдзейсьніцца ў цябе, над дарогамі тваімі будзе зьзяць сьвятло.
Бо Ён паніжае таго, хто гаворыць пыхліва, а хто апускае вочы, той будзе збаўлены.
Калі хто зьнішчаны будзе, ты скажаш: узвышэньне! і Ён уратуе таго, хто панік абліччам,
Ён уратуе нявіннага, і будзеш ты ўратаваны ў чысціні рук сваіх».
выбавіць і небязьвіннага, і ён выратуецца чысьцінёю рук тваіх.
