Ёва 39 разьдзел
Кніга Ёва
Пераклад Чарняўскага 2017 → Пераклад Васіля Сёмухі
Ці ведаеш ты час народзін дзікіх коз у скалах, або сачыў за родамі ланей?
Ці ведаеш ты час, калі нараджаюць дзікія козы на скалах, і ці заўважаў роды казуль?
Ці лічыш ты месяцы цяжарнасці іх або ведаеш час іх нараджэння?
Ці можаш разьлічыць месяцы цяжарнасьці іхняй? і ці ведаеш час родаў іхніх?
Выгінаюцца яны дзеля плода і выпускаюць плод свой на святло.
Яны згінаюцца, нараджаючы дзяцей сваіх, выкідваючы свае ношы;
Іх дзеці набіраюць сілы і растуць у полі, і выходзяць, і не вяртаюцца да іх.
дзеці іхнія ўбіраюцца ў сілу, растуць на полі, сыходзяць і не вяртаюцца да іх.
Хто пусціў дзікага асла на свабоду, і хто развязаў путы яго?
Хто пусьціў дзікага асла на волю, і хто разьвязаў повязі кулану,
Я даў яму дом на пустыні, і на салёнай зямлі — жытло яго.
якому стэп Я прызначыў домам і саланчакі — жытлішчам?
Ён пагарджае гармідарам горада і не чуе крыку паганятага,
Ён сьмяецца з гарадскога шматлюдства і ня чуе крыкаў паганятага,
выведвае ён горы выгану свайго і шукае ўсякую зеляніну.
па горах шукае ежы сабе і ганяецца за ўсякаю зелянінаю.
Ці захоча дзікі бык служыць табе або ці пераначуе ён пры яслях тваіх?
Ці захоча аднарог служыць табе і ці заначуе каля ясьляў тваіх?
Ці можаш прывязаць дзікага быка вяроўкаю сваёй дзеля ўзорвання або ці стане ён рассякаць глебу лагчын за табою?
Ці можаш вяроўкаю прывязаць аднарога да баразны, і ці будзе ён за табою баранаваць тваё поле?
Ці ты паверыш у вялікую сілу яго і даручыш яму работу сваю?
Ці паспадзяваешся на яго, таму што ў яго вялікая сіла, і ці дасі яму працу тваю?
Ці паверыш яму, што ён вернецца і збярэ зерне тваё на ток?
Ці паверыш яму, што ён насеньне тваё верне і складзе на гумно тваё?
Ці ты даў прывабныя крылы паўліну ды пер’я і пух страусу?
Ці ты даў прыгожыя крылы паве і пер’е і пух страўсу?
Калі ён пакідае яйкі свае на зямлі, яны грэюцца ў пяску,
Ён пакідае яйкі свае на зямлі і на пяску грэе іх,
забываецца ён, што можа нага іх стаптаць або дзікі звер струшчыць.
і забывае, што нага можа раздушыць іх і польны зьвер можа растаптаць іх;
Не чулы ён да дзяцей сваіх, быццам яны не яго, і не трывожыцца аніякім страхам, дарэмна працуючы,
ён жорсткі да дзяцей сваіх, як бы не да сваіх, і не баіцца, што праца ягоная будзе марная,
бо пазбавіў яго Бог мудрасці і не даў яму розуму.
таму што Бог ня даў яму мудрасьці і не ўдзяліў яму глузду;
А калі прыйдзе час і падыме ён крылы дагары, тады смяяцца будзе з каня ды яго вершніка.
а калі падымаецца на вышыню, сьмяецца з каня і вершніка ягонага.
Ці ты даў каню сілу або ці ты ахінуў шыю яго грывай?
Ці ты даў каню сілу і апрануў шыю ягоную ў грыву?
Ці ты ўзрушыш яго, як саранчу? Іржанне яго — страх.
Ці можаш ты спалохаць яго, як саранчу? Храп ноздраў ягоных — жудасьць;
Рые ён зямлю капытом, скача смела насустрач зброі.
капае нагамі зямлю і захапляецца сілаю; ідзе насустрач зброі;
Пагарджае ён страхам, не палохаецца, і не саступае мечу.
ён сьмяецца зь небясьпекі і не палохаецца і не адварочваецца ад меча;
Загучыць над ім калчан, заблішчыць дзіда і шчыт,
калчан гучыць над ім, бліскае кап’ё і дзіда;
палаючы, з фырканнем глытае ён зямлю і не спыняецца, калі загучыць гранне трубы.
у парыве і лютасьці ён глытае зямлю і ня можа стаяць пры гуку трубы;
Калі пачуе ён трубу, іржэ: “І-га-га!”, і здалёк чуе ён бой, воклічы ваяводаў і голас.
пры трубным гуку ён падае голас: гу! гу! і здалёк чуе бітву, зычныя галасы правадыроў і крык.
Ці па тваёй мудрасці лётае ястраб і накіроўвае крылы свае на поўдзень?
Ці тваёю мудрасьцю лётае каршук і кіруе крылы свае на поўдзень?
Ці па тваім загадзе падымецца арол і на недасяжных месцах будзе ладзіць гняздо сваё?
Ці па тваім слове ўзносіцца арол і кладзе на вышыні гняздо сваё?
Ён жыве на скалах і начуе на скрытых камянях і на непрыступных скалах.
Ён жыве на скале і начуе на зубцы ўцёсаў і на месцах недаступных;
Адтуль выследжвае ён сабе пажыву і вочы яго бачаць здалёк.
адтуль выглядвае сабе ежу: вочы яго глядзяць далёка;
Птушаняты яго будуць піць кроў, і дзе толькі з’явіцца труп, там і ён».
птушаняты ягоныя п’юць кроў, і дзе труп, там і ён.
І прамовіў Госпад Ёву ў адказ:
І гаварыў Гасподзь далей і сказаў Ёву:
«Ці спрачаецца супраціўнік з Усемагутным? Хто вінаваціць Бога, павінен адказаць на гэтыя пытанні».
ці будзе спаборнік з Усеўладным яшчэ вучыць? Выкрывальнік Бога хай адказвае Яму.
Ёў жа адказаў Госпаду:
І адказваў Ёў Госпаду, і сказаў:
«Вось, я неразумна гаварыў, што магу Табе адказаць? Я кладу руку сваю на вусны свае.
вось, я нікчэмны; што буду я адказваць Табе? Руку маю кладу на вусны мае.
Раз я гаварыў — і гэтага не паўтару, і другі раз, але да гэтага нічога не дадам».
Аднойчы я казаў, — цяпер адказваць ня буду, нават двойчы, але болей ня буду.
