1 да Фесаланікійцаў 5 разьдзел
Першае пасланьне да Фесаланікійцаў
Пераклад Сабілы і Малахава → Пераклад Васіля Сёмухі
А пра тэрміны і канец часоў, браты, вы ня маеце патрэбы, каб вам (пра іх) пісаць.
А пра часы і часіны няма патрэбы пісаць вам, браты,
Бо вы самі дакладна ведаеце, што дзень Госпада прыйдзе так, як злодзей уначы.
бо самі вы дакладна ведаеце, што дзень Гасподні так прыйдзе, як злодзей уначы.
Бо калі будуць казаць: «мір і бясьпека», тады зьнянацку спасьцігне іх загуба, гэтак жа як родавыя мукі спасьцігаюць цяжарную, — і ня змогуць унікнуць (ад адказнасьці).
Бо, калі будуць казаць: «мір і бясьпека», тады зьнянацку спасьцігне іх пагібель, як мука родамі спасьцігае цяжарную, і ня ўнікнуць.
Вы ж, браты, ня ў цемры, каб дзень той спасьціг вас, як злодзей.
Але вы, браты, ня ў цемры, каб дзень застаў вас, як злодзей;
Усе вы ёсьць сыны сьвятла і сыны дня: мы ня зьяўляемся дзецьмі ночы, ані цемры.
бо ўсе вы — сыны сьвятла і сыны дня: мы — ня сыны ночы, ні цемры.
Дык, ня будзем спаць, як і астатнія, але будзьма пíльнымі і разумнаразважнымі.
Дык вось, ня будзем спаць, як іншыя, а будзем чуваць і цьвярозіцца.
Бо тыя, хто спяць — уначы спяць, і тыя, хто упіваюцца — уначы ўпіваюцца.
Бо, хто сьпіць, сьпіць уночы, і хто ўпіваецца, упіваецца ўночы.
А мы зьяўляючыся дзяцьмі дня, будзьма разумнаразважнымі, апрануўшыся ў панцыр веры і любові, і шалом надзеі выратаваньня,
Мы ж як сыны дня, будзем цьвярозіцца, апрануўшыся ў браню веры і любові і ў шалом надзеі на збавеньне,
таму што ня прызначыў нас Бог на гнеў, але для атрыманьня збаўленьня праз Госпада нашага Ісуса Хрыста,
таму што Бог вызначыў нас не на гнеў, а на атрыманьне збавеньня праз Госпада нашага Ісуса Хрыста,
Які памёр за нас, каб мы ці то сьпім, ці то ня сьпім, але каб мы жылі разам зь Ім.
Які памёр за нас, каб мы, ці то чуваем, ці то сьпім, жылі разам зь Ім.
Таму суцяшайце адзін аднаго і навучайце адзін аднаго, як вы гэтае і робіце.
Таму ўмаўляйце адно аднаго і навучайце адно аднаго, як вы і робіце.
Просім жа вас, браты, паважаць тых, што (духова) працуюць сярод вас, і тых, якія пастаўлены над вамі ў Госпадзе, і настаўляюць вас,
Просім жа вас, браты, паважаць тых, якія працуюць у вас, і якія пастаўлены над вамі ў Госпадзе, і якія на розум вас настаўляюць,
і шанаваць іх вельмі высока з любоўю за працу іхную. Жывіце ў міры між сабою.
і шанаваць іх пераважна зь любоўю за справу іхнюю; будзьце ў згодзе паміж сабою.
Молім жа вас, браты, настаўляйце бясчынных, падбадзёрвайце маладушных, падтрымлівайце слабых, будзьце доўгацярплівыя да ўсіх.
Молім вас таксама, браты, настаўляйце на розум бясчынцаў, суцяшайце маладушных, падтрымлівайце слабых, будзьце цярплівыя з усімі.
Глядзеце, каб ніхто нікому ня адплачваў злом за зло; але заўсёды шукайце дабра і адзін аднаму, і ўсім.
Глядзеце, каб хто каму не плаціў злом за зло; а заўсёды шукайце дабра і адно аднаму і ўсім.
Заўсёды радуйцеся.
Заўсёды радуйцеся.
Нясупынна маліцеся.
Бесьперастанку малецеся.
За ўсё дзякуйце: бо гэткая воля Бога ў Хрысьце Ісусе дзеля вас.
За ўсё дзякуйце: бо такая за вас воля Божая ў Ісусе Хрысьце.
Духа ня згашайце.
Духа не гасеце.
Прароцтвамі ня пагарджайце.
Прароцтваў не прыніжайце.
Усё выпрабоўвайце, добрага трымайцеся.
Усё выпрабоўвайце, добрага трымайцеся.
Высьцерагайцеся ўсякага роду зла.
Ухіляйцеся ад ліхаты ў любым яе выглядзе.
Сам жа Бог Міру хай асьвяціць вас ва ўсёй поўніцы, і цалкам ваш дух і душа, і цела хай будуць захаванымі бяззаганнымі ў прыход Госпада нашага Ісуса Хрыста.
Сам жа Бог міру няхай асьвеціць вас ва ўсёй поўніцы, і ваш дух і душа і цела ва ўсёй цэласьці няхай захаваюцца без пахібы ў прышэсьце Госпада нашага Ісуса Хрыста.
Верны Той, Хто прыклікае вас, Ён і зробіць гэта.
Верны Той, Хто заклікае вас, Які і зьдзейсьніць гэта.
Браты! Маліцеся за нас.
Браты! малецеся за нас.
Вітайце ўсіх братоў сьвятым пацалункам.
Вітайце ўсіх братоў цалаваньнем сьвятым.
Запрысягаю вас Госпадам прачытаць гэтае Пасланьне ўсім сьвятым братом.
Заклікаю вас Госпадам прачытаць гэта пасланьне ўсім сьвятым братам.
Багадаць Госпада нашага Ісуса Хрыста з вамі. Амін.
Мілата Госпада нашага Ісуса Хрыста з вамі. Амін.
