Лукаша 3 разьдзел

 

 

А ў пятнаццаты год панаваньня цэзара Тыбэрыя, калі Понтый Пілат панаваў у Юдэі, Ірад быў тэтрархам у Галілеі, Філіп, брат ягоны, — тэтрархам у Ітурэі і раханіцкай краіне, а Лісані — тэтрархам у Абіліне,

 

На пятнаццаты год панавання цэзара Тыберыя, калі Понцкі Пілат кіраваў у Юдэі, а Ірад быў тэтрархам Галілеі, а брат яго Піліп — тэтрархам Ітурэі і Траханіцкай краіны, а Лісанія — тэтрархам Абіліны,

пры першасьвятарах Аньне і Каяфе было слова Божае да Яна, сына Захарыі, у пустыні.

 

пры першасвятарах Анну і Каяфу было слова Бога да Яна, сына Захарыі, у пустыні.

І ён праходзіў па ўсіх ваколіцах Ярданскіх, прапаведуючы хрышчэньне навяртаньня дзеля адпушчэньня грахоў,

 

І прайшоў ён усю зямлю вакол Ярдана, прапаведуючы хрост навяртання дзеля адпушчэння грахоў,

як напісана ў кнізе словаў прарока Ісаі, які кажа: «Голас таго, хто кліча ў пустыні: “Падрыхтуйце шлях Госпаду, простымі рабіце сьцежкі Яго;

 

як напісана ў кнізе прамоў Ісаі прарока: «Голас лямантуючага ў пустыні: “Рыхтуйце дарогу Госпаду, прастуйце сцежкі Яму.

усякі дол няхай напоўніцца, і ўсякая гара і ўзгорак няхай панізяцца, крывізны няхай выпрастуюцца, і няроўныя шляхі зробяцца гладкімі;

 

Хай усякая яма будзе засыпана, і кожная гара і ўзгорак хай будуць паніжаны, і крывізны хай стануць роўнымі, а церні — гладкімі дарогамі,

і ўгледзіць усякае цела збаўленьне Божае”».

 

і ўбачаць усе канцы свету збаўленне Бога нашага”».

І казаў ён натоўпам, якія прыходзілі хрысьціцца ў яго: «Спараджэньні яхідны, хто перасьцярог вас, каб уцякалі ад гневу, які надыходзіць?

 

І натоўпам, што прыходзілі да яго атрымаць хрост, гаварыў: «Змяінае племя, хто засведчыў вам, што пазбегнеце будучага гневу?

Зрабіце плады, годныя навяртаньня, і не пачынайце гаварыць у сабе: “Бацьку маем Абрагама”, бо кажу вам, што Бог можа з камянёў гэтых падняць дзяцей Абрагаму.

 

Чыніце належныя плады навяртання, і перастаньце хваліцца між сабой: “Маем бацьку Абрагама”; кажу вам, што Бог можа з гэтых камянёў падняць сыноў Абрагаму.

Ужо і сякера ля кораня дрэваў ляжыць; усякае дрэва, якое не прыносіць добрага плоду, сьсякаецца і кідаецца ў агонь».

 

Ужо вось сякера прыстаўлена да карэнняў дрэў, кожнае дрэва, што не дае добрага плода, будзе ссечана і кінута ў агонь».

І спытаўся ў яго натоўп, кажучы: «Дык што нам рабіць?»

 

Дык пыталіся ў яго натоўпы: «Што тады маем рабіць?»

А ён, адказваючы, кажа ім: «Хто мае дзьве вопраткі, няхай дасьць таму, хто ня мае; і хто мае ежу, няхай робіць тое самае».

 

Адказваючы, ён гаварыў ім: «Хто мае дзве вопраткі, хай дасць таму, хто не мае. І хто мае ежу, хай зробіць падобна».

Прыйшлі і мытнікі хрысьціцца, і сказалі яму: «Настаўнік, што нам рабіць?»

 

Прыходзілі таксама мытнікі, каб атрымаць хрост, і яны сказалі яму: «Вучыцелю, што мы маем рабіць?»

А ён сказаў ім: «Нічога не бярыце больш таго, што вам загадана».

 

А ён ім сказаў: «Нічога не рабіце больш таго, што вам прызначана».

Пыталіся ў яго таксама жаўнеры, кажучы: «А нам што рабіць?» І ён сказаў ім: «Нікога ня крыўдзьце, не абвінавачвайце фальшыва і задавальняйцеся платай сваёй».

 

Пыталіся ў яго таксама жаўнеры, кажучы: «А што мы маем рабіць?» А ён ім казаў: «Нікога не біце, не нагаворвайце і будзьце задаволены сваёю платаю».

І народу, які чакаў і разважаў у сэрцах сваіх адносна Яна, ці не Хрыстос ён,

 

А калі народ сумняваўся ды ўсе ў душы пачыналі разважаць пра Яна, ці ён часам не Хрыстос,

адказаў Ян усім, кажучы: «Я хрышчу вас вадою, але ідзе Дужэйшы за мяне, у Якога я ня варты разьвязаць рамень сандалаў Ягоных. Ён будзе хрысьціць вас Духам Сьвятым і агнём.

 

Ян адказваў, кажучы ўсім: «Я хрышчу вас вадою. Але прыйдзе дужэйшы за мяне, Катораму я не варты развязаць рамень Яго пасталоў. Ён будзе вас хрысціць Духам Святым і агнём.

Веялка Ягоная ў руцэ Яго, і Ён ачысьціць ток Свой, і зьбярэ пшаніцу ў сьвіран Свой, а салому спаліць агнём незгасальным».

 

Ён трымае ў руцэ Сваёй веялку і ачысціць ток Свой, ды збярэ пшаніцу ў свіран Свой, а салому спаліць у агні незгасальным».

І шмат іншага дабравесьціў ён народу, навучаючы яго.

 

Многаму таксама іншаму навучаючы, абвяшчаў народу добрую вестку.

А Ірад тэтрарх, дакараны ім за Ірадыяду, жонку Філіпа, брата ягонага, і за ўсё, што Ірад зрабіў злога,

 

Але Ірад, тэтрарх, які дакараўся Янам дзеля Ірадыяды, жонкі брата яго, ды дзеля іншых ліхіх учынкаў, якія ўчыніў Ірад,

дадаў да ўсяго і тое, што замкнуў Яна ў вязьніцу.

 

дадаў да ўсяго і тое, што пасадзіў Яна ў вязніцу.

І сталася, калі хрысьціўся ўвесь народ, і Ісус, ахрысьціўшыся, маліўся, адчынілася неба,

 

І сталася, калі ўвесь народ хрысціўся і Ісус быў ахрышчаны і маліўся, адкрылася неба,

і Дух Сьвяты зыйшоў на Яго ў цялесным выглядзе, як голуб, і быў голас з неба, які казаў: «Ты — Сын Мой Улюбёны; у Табе Я маю ўпадабаньне».

 

і Дух Святы цялесна ў выглядзе голуба сышоў на Ісуса. І азваўся голас з неба: «Ты — Сын Мой улюбёны, у Табе Маё ўпадабанне».

І меў Ісус, пачынаючы [служэньне], гадоў каля трыццаці, і быў, як думалі, сын Язэпаў, Гэліяў,

 

Ісус меў каля трыццаці гадоў, калі пачынаў Сваё служэнне, і быў, як лічылася, сынам Язэпа, сынам Гэлі,

Мататаў, Левіяў, Мэльхіяў, Янаяў, Язэпаў,

 

сынам Матата, сынам Леві, сынам Мэльха, сынам Яная, сынам Язэпа,

Мататыяў, Амосаў, Навумаў, Эсьліяў, Нагеяў,

 

сынам Мататыі, сынам Амоса, сынам Навума, сынам Эслі, сынам Нагі,

Магатаў, Мататыяў, Сэмэяў, Язэпаў, Юдаў,

 

сынам Маата, сынам Мататыі, сынам Сямэя, сынам Язэха, сынам Ёды,

Яанаяў, Рэсаеў, Зэрубабэляў, Салятыэляў, Нэрыяў,

 

сынам Ёана, сынам Рэсы, сынам Зарабабэля, сынам Салатыэля, сынам Нэра,

Мэльхіяў, Аддыяў, Касамаў, Эльмадамаў, Іраў,

 

сынам Мэльха, сынам Адзі, сынам Касама, сынам Эльмадама, сынам Гэра,

Ёсіяў, Эліезэраў, Ярымаў, Мататаў, Левіяў,

 

сынам Ешуа, сынам Эліязэра, сынам Ярыма, сынам Матата, сынам Леві,

Сымонаў, Юдаў, Язэпаў, Янанаў, Эліякімаў,

 

сынам Сімяона, сынам Юды, сынам Язэпа, сынам Ёны, сынам Эліякіма,

Мэлеаяў, Маінанаў, Мататаў, Натанаў, Давідаў,

 

сынам Мэлея, сынам Мэны, сынам Матата, сынам Натана, сынам Давіда,

Есэяў, Абэдаў, Боазаў, Сальмонаў, Наасонаў,

 

сынам Ясэя, сынам Абэда, сынам Баоза, сынам Салмона, сынам Наасона,

Амінадабаў, Арамаў, Эсромаў, Пэрэсаў, Юдаў,

 

сынам Амінадаба, сынам Адміна, сынам Арні, сынам Эсрома, сынам Пэрэса, сынам Юды,

Якубаў, Ісаакаў, Абрагамаў, Тэрахаў, Нахораў,

 

сынам Якуба, сынам Ізаака, сынам Абрагама, сынам Тэраха, сынам Нахора,

Сэрухаў, Рагаваў, Фалекаў, Гэбэраў, Салаў,

 

сынам Сэруга, сынам Рагава, сынам Пэлега, сынам Гебэра, сынам Салы,

Каінанаў, Арфаксадаў, Сэмаў, Нояў, Лямэхаў,

 

сынам Кайнана, сынам Арпаксада, сынам Сэма, сынам Ноя, сынам Ламэха,

Мэтушаляхаў, Энохаў, Ярэдаў, Магалялеэляў, Кейнанаў,

 

сынам Мэтусалаха, сынам Гэноха, сынам Ярэда, сынам Малаліэля, сынам Кайнана,

Эносаў, Сэтаў, Адамаў, Божы.

 

сынам Эноса, сынам Сэта, сынам Адама, сынам Бога.