Выслоўяў Саламонавых 18 разьдзел

Кніга выслоўяў Саламонавых
Пераклад Антонія Бокуна → Пераклад Чарняўскага 2017

 
 

Свавольны шукае жаданьня [свайго] і кожнай цьвярозай думцы працівіцца.
 
Зручных выпадкаў шукае той, хто жадае пазбавіцца сябра; раздражняе яго ўсякая парада.

Дурань ня хоча застанаўляцца, а толькі каб выявіць розум свой.
 
Бязглузды не адчувае асалоду ад разважлівасці — а толькі ад паказу ўласнага розуму.

Калі прыходзіць бязбожнік, прыходзіць пагарда, і разам з сорамам — ганьба.
 
Калі прыйдзе бязбожнік — прыйдзе і пагарда, а з ганьбай — знявага.

Словы вуснаў чалавечых — глыбокія воды, крыніца мудрасьці — бурлівы ручай.
 
Словы з вуснаў чалавека — глыбокая вада, а крыніца мудрасці — багатая плынь.

Нядобра зважаць на аблічча бязбожнага, каб паваліць праведнага на судзе.
 
Нядобра прымаць чалавека бязбожнага, каб пахіснуць справядлівага ў законнасці яго.

Словы дурня прыводзяць да спрэчкі, і вусны ягоныя выклікаюць бойку.
 
Вусны бязглуздага змешваюцца са сваркамі, а рот яго выклікае пабоі.

Вусны дурня — загуба ягоная, а мова ягоная — пастка для душы яго.
 
Рот бязглуздага — яго пагібель, а вусны яго — пастка для душы яго.

Словы пляткара — як прысмакі, яны зыходзяць у глыб нутра.
 
Словы плеткара — быццам салодкія, і самі даходзяць да глыбіні чэрава.

Нядбайны ў рабоце сваёй — брат нішчыцеля.
 
Той, хто ў працы сваёй млявы і нядбайны, той — брат знішчыцеля.

Імя ГОСПАДА — магутная вежа, пабяжыць туды праведнік і будзе ў бясьпецы.
 
Наймацнейшая цытадэль — імя Госпада; да яе спяшаецца справядлівы, і там ён узвысіцца.

Маёмасьць багатага — умацаваны горад для яго, уяўляецца яна яму як муры высокія.
 
Маёмасць багатага — трывалы горад яго, яна — быццам мур высокі ў думцы яго.

Перад загубай вывышаецца сэрца чалавека, а ўпакораньне папераджае славу.
 
Перад знішчэннем узвышаецца сэрца чалавечае, і перад услаўленнем — уціхамірваецца.

Хто дае адказ раней, чым выслухае, той неразумны, і сорам яму.
 
Хто спярша гаворыць, а потым слухае, — таму бязглуздасць і ганьба.

Дух чалавека пераносіць немач сваю, але дух маркотны хто можа ўзьняць.
 
Дух чалавечы пераносіць немач сваю, але хто зможа падтрымаць зруйнаваны дух?

Сэрца разважнае набывае веды, і вуха мудрых шукае веданьня.
 
Сэрца разважлівае будзе валодаць ведамі, і вуха мудрых шукае ведаў.

Падарунак чалавека дае яму прастору і да вялікіх прывядзе яго.
 
Дар чалавека пашырае дарогу яго і да кіраўнікоў даводзіць яго.

Першы ў спрэчцы сваёй [падаецца] справядлівым, але прыйдзе бліжні ягоны і выспрабуе яго.
 
Хто першы гаворыць у спрэчцы — лічыцца справядлівым, а прыходзіць сябар яго і выкрые яго.

Жэрабя спыняе сваркі і дзеліць між магутнымі.
 
Жэрабя спыняе спрэчкі і таксама вырашае паміж магутнымі.

Пакрыўджаны брат — як умацаваны горад, а сваркі — як завалы ў замку.
 
Брат, якога абражаюць, мацнейшы за моцны горад, а сваркі — як крэпасці гарадоў.

З плоду вуснаў сваіх насыціць чалавек нутро сваё, з прыбыткаў губаў сваіх насыціцца.
 
З плода вуснаў чалавека насыціцца чэрава яго, а спараджэнні ўласных вуснаў уволю накормяць яго.

Сьмерць і жыцьцё ў руцэ языка; хто любіць яго, будзе есьці плады ягоныя.
 
Смерць і жыццё ў руцэ языка; хто яго любіць — будзе есці плады яго.

Хто знайшоў жонку, той знайшоў добрае і атрымаў ласку ад ГОСПАДА.
 
Хто знайшоў добрую жонку — знайшоў дабро і атрымаў ласку ад Госпада.

Бедны гаворыць, умольваючы, а багаты адказвае груба.
 
Калі бедны гаворыць з маленнямі, то багаты будзе гаварыць жорстка.

Чалавек, які мае сяброў, сам павінен быць сяброўскі, і бывае, што сябар больш любіць, чым брат.
 
Чалавек можа быць паранены сябрамі, але ёсць сябар, які бліжэй за брата.