Псалтыр 21 псалом
Псалтыр
Пераклад Антонія Бокуна → Пераклад Язэпа Германовіча
Кіраўніку хору. Псальм Давіда.
Кіраўніку хору. Псальм Давідавы.(а)
ГОСПАДЗЕ! У моцы Тваёй будзе радавацца валадар, у збаўленьні Тваім ён вельмі ўсьцешыцца.
Твая моц радуе цара, Госпадзе: о, як помач твая яго цешыць!
Ты даў яму жаданьне сэрца ягонага, і просьбам вуснаў ягоных Ты не адмовіў. (Сэлях)
Ты даў яму, чаго жадала сэрца ягонае, і не адмовіў яму, чаго прасіў вуснамі сваімі.
Бо Ты сустрэў яго дабраслаўленьнем дабра, усклаў яму на галаву карону з найчысьцейшага золата.
Бо Ты аперадзіў яго памысным благаславенствам, карону з чыстага золата узлажыў на галаву яго.
Жыцьцё ён прасіў у Цябе, Ты даў яму доўгасьць дзён на вякі вечныя.
Ты даў яму жыцьцё, якога ён прасіў і доўгае жыцьцё — аж навекі!
Вялікая слава ягоная ў збаўленьні Тваім; годнасьць і веліч Ты ўзлажыў на яго.
Вялікая слава яго — праз тваю помач: Ты ўзлажыў на яго чэсьць і бляск (веліч).
Бо Ты даў яму дабраслаўленьне вечнае, Ты разьвесяліў яго радасьцю перад абліччам Тваім.
Бо Ты ўчыніў яго благаслаўлёным навекі: Ты ўзвесяліў яго шчасьцем перад сваім абліччам.
Бо валадар спадзяецца на ГОСПАДА і праз міласэрнасьць Найвышэйшага не пахісьнецца.
Бо цар спадзяецца на Госпада і не пахісьнецца ён праз ласку Найвышэйшага.
Рука Твая знойдзе ўсіх ворагаў Тваіх, правіца Твая знойдзе тых, якія ненавідзяць Цябе.
Рука твая знайдзе ўсіх праведнікаў тваіх, правіца твая дасягне тваіх ворагаў.
Ты зробіш з іх печ вогненную ў час [зьяўленьня] аблічча Твайго; ГОСПАД у гневе Сваім выгубіць іх, і агонь зжарэ іх.
Ты ўкінеш іх у агністую печ у дзень твайго зьяўленьня. Госпад іх выгубіць у гневе сваім, і агонь іх пажрэць.
Ты зьнішчыш плод іхні на зямлі і насеньне іхняе — спасярод сыноў чалавечых.
Ты вынішчыш плод іх на зямлі, — насеньне іх паміж сыноў чалавечых.
Бо яны кнулі ліхое супраць Цябе, надумалі зламыснае, якое не змаглі [зьдзейсьніць],
Пачыналі яны ліхое супраць Цябе, укладалі пляны, — ня перамогуць!
бо Ты павернеш іх наўцёкі, нацягнеш лук Твой супраць аблічча іхняга.
Бо Ты іх прымусіш уцякаці, нацягнеш лук свой у твар іхні.
Узьніміся, ГОСПАДЗЕ, у моцы Тваёй! Мы будзем сьпяваць і выслаўляць магутнасьць Тваю.
Госпадзе, паўстань у моцы тваей! Мы будзем сьпяваці і славіць тваю магутнасьць.