Псалтыр 21 псалом

Псалтыр
Пераклад Л. Дзекуць-Малея → Пераклад Язэпа Германовіча

 
 

Кіраўніку хору: псальм Давідавы.
 
Кіраўніку хору. Псальм Давідавы.(а)

Госпадзе! З моцы Тваёй радуецца цар, падмогай Тваёй ён вельмі ўсьцешаны.
 
Твая моц радуе цара, Госпадзе: о, як помач твая яго цешыць!

Ты даў яму, чаго сэрца яго пажадала, і, чаго вусны прасілі, Ты не адмовіў. (Зэля)
 
Ты даў яму, чаго жадала сэрца ягонае, і не адмовіў яму, чаго прасіў вуснамі сваімі.

Бо Ты сустрэў яго багаслаўленьнем і ласкаю, вянок із шчырага золата ўзлажыў яму на галаву.
 
Бо Ты аперадзіў яго памысным благаславенствам, карону з чыстага золата узлажыў на галаву яго.

Жыцьця ён прасіў у Цябе, — Ты даў жыцьцё даўгое на вечныя вякі.
 
Ты даў яму жыцьцё, якога ён прасіў і доўгае жыцьцё — аж навекі!

Вялікая слава ягоная праз помач Тваю; чэсьць і веліч Ты ўзлажыў на яго.
 
Вялікая слава яго — праз тваю помач: Ты ўзлажыў на яго чэсьць і бляск (веліч).

Бо багаслаўленьне вялікае даў Ты яму навекі, разьвесяляеш яго радасьцяй перад абліччам Тваім.
 
Бо Ты ўчыніў яго благаслаўлёным навекі: Ты ўзвесяліў яго шчасьцем перад сваім абліччам.

Цар спадзяецца на Госпада і праз ласку Найвышэйшага не пахісьнецца,
 
Бо цар спадзяецца на Госпада і не пахісьнецца ён праз ласку Найвышэйшага.

Рука Твая дасягне ўсіх ворагаў Тваіх, правіца Твая дасягне тых, што ненавідзяць Цябе.
 
Рука твая знайдзе ўсіх праведнікаў тваіх, правіца твая дасягне тваіх ворагаў.

Ты зробіш з іх печ агністую, як зьявішся; Госпад у гневе Сваім выгубіць іх, і агонь іх пажрэць.
 
Ты ўкінеш іх у агністую печ у дзень твайго зьяўленьня. Госпад іх выгубіць у гневе сваім, і агонь іх пажрэць.

Ты вынішчыш плод іхні на зямлі і насеньне іх спасярод сыноў чалавечых.
 
Ты вынішчыш плод іх на зямлі, — насеньне іх паміж сыноў чалавечых.

Пачынаючы ліхое супраць Цябе, надумываючы хітрыкі свае, яны ня зробяць нічога,
 
Пачыналі яны ліхое супраць Цябе, укладалі пляны, — ня перамогуць!

бо Ты іх павернеш наўцекі, із луку Твайго пусьціш стрэлы ў твар іхні.
 
Бо Ты іх прымусіш уцякаці, нацягнеш лук свой у твар іхні.

Узьніміся, Госпадзе, у сіле Тваёй! Мы будзем выслаўляць і хваліць магутнасьць Тваю.
 
Госпадзе, паўстань у моцы тваей! Мы будзем сьпяваці і славіць тваю магутнасьць.