Марка 3 разьдзел
Паводле Марка Сьвятое Дабравесьце
Пераклад Антонія Бокуна → Дабравесце паводле Марка. З аўдыёкасет
І зноў увайшоў у сынагогу. І быў там чалавек, які меў сухую руку.
І Ён зноў увайшоў у сінагогу. І быў у ёй чалавек, што меў усохлую руку.
І сачылі за Ім, ці не аздаровіць яго ў суботу, каб абвінаваціць Яго.
І сачылі за Ім, ці вылечыць яго ў суботу, каб потым мець паставы абвінаваціць Яго.
І Ён кажа сухарукаму чалавеку: «Стань на сярэдзіне!»
І сказаў Ён чалавеку, з сусохлай рукой: «Стань пасярэдзіне».
І кажа ім: «Ці належыць у суботу рабіць добрае, ці рабіць благое? Душу выратаваць ці загубіць?» Але яны маўчалі.
І Ён сказаў: «Ці дазваляецца ў суботу дабро рабіць ці ліха тварыць, душу ўратаваць ці забіць?» Яны ж маўчалі.
І, глянуўшы на іх з гневам, смуткуючы дзеля скамяненьня сэрца іхняга, кажа чалавеку гэтаму: «Выцягні руку тваю!» І ён выцягнуў, і зрабілася рука яго здаровая, як і другая.
І агледзеўшы іх з гневам, засмучаны акамянеласцю іх сэрцаў, сказаў чалавеку: «Працягні руку». І той працягнуў, і яго рука ажыла.
Фарысэі ж, выйшаўшы, зрабілі адразу нараду з ірадыянамі супраць Яго, каб Яго загубіць.
Фарысеі ж, выйшаўшы адразу, з ірадыянамі, пачалі згаворывацца на злачынства супроць Яго, як Яго загубіць.
І Ісус разам з вучнямі Сваімі адыйшоў да мора, і вялікае мноства пайшло за Ім з Галілеі, і з Юдэі,
А Ісус са Сваімі вучнямі накіраваўся да мора, і вялікае мноства з Галілеі [пайшло ўслед за Ім] і з Іудзеі,
і з Ерусаліму, і з Ідумеі, і з-за Ярдану, і з ваколіцаў Тыру і Сідону, вялікае мноства, пачуўшы, што Ён рабіў, прыйшло да Яго.
і з Іерусаліма, і з Ідумеі, і з Заіярдання, і з ваколіц Ціра і Сідона, — вялікае мноства, пачуўшы пра ўсё, што Ён робіць, прыйшло да Яго.
І сказаў вучням Сваім, каб быў падрыхтаваны для Яго човен дзеля натоўпу, каб ня ціснулі Яго.
І сказаў Ён Сваім вучням, каб падрыхтавалі Яму човен з-за натоўпу, каб не напіралі на Яго;
Бо многіх Ён аздаравіў, таму пхаліся да Яго ўсе, што мелі немачы, каб дакрануцца да Яго.
бо многіх Ён вылечыў, так што ўсе, каго даймала ліха, кідаліся да Яго, каб дакрануцца да Яго.
І духі нячыстыя, калі бачылі Яго, падалі перад Ім і крычалі, кажучы: «Ты — Сын Божы!»
Нячыстыя духі, калі Яго бачылі, падалі перад Ім і крычалі, кажучы: «Ты — Сын Божы».
Але Ён строга забараняў ім, каб не выяўлялі Яго.
Ды Ён ім сурова забараніў, каб яны не раскрывалі Яго.
І ўзыходзіць на гару, і кліча тых, якіх Сам хацеў, і прыйшлі да Яго.
Ён узыйшоў на гару і паклікаў да Сябе, каго Сам жадаў; і яны пайшлі да Яго.
І вызначыў Дванаццаць, каб былі з Ім і каб пасылаць іх абвяшчаць,
І вызначыў Дванаццаць, каб былі з Ім, і каб пасылаць іх для багавяшчання,
і каб мелі ўладу аздараўляць хваробы і выганяць дэманаў:
і каб мелі яны ўладу выганяць дэманаў;
Сымона, і даў яму імя Пётар,
[і вызначыў гэтых Дванаццаць], даў імя Сіману — Пётра,
і Якуба Заўдыявага, і Яна, брата Якуба, і даў ім імя Боанэргес, што значыць “Сыны грому”,
і Якава Завядзеевага, і Іаана, Якавага брата, і даў імя Ваанергес, гэта значыць «Громавы сыны»;
і Андрэя, і Філіпа, і Барталамея, і Мацьвея, і Тамаша, і Якуба Алфеявага, і Тадэвуша, і Сымона Кананіта,
і Андрэя, і Філіпа, і Варфаламея, і Мацвея, і Фаму, і Якава Алфеевага, і Фадзея, і Сімана Кананіта,
і Юду Іскарыёта, які выдаў Яго.
і Юду Іскарыёта, які і прадаў Яго.
І прыходзяць у дом; і зноў зыходзіцца натоўп, так што не маглі яны нават хлеба паесьці.
І прыходзіць Ён у дом; і сходзіцца зноў натоўп, так што яны не маглі і хлеба з’есці.
І, пачуўшы [гэта], сваякі Ягоныя пайшлі ўзяць Яго, бо казалі, што Ён зьдзівачэў.
А блізкія Яго лачуўшыся выйшлі забраць Яго; бо казалі: Ён не ў Сабе.
А кніжнікі, што прыйшлі з Ерусаліму, гаварылі, што мае Бэльзэбула і што моцай князя дэманаў выганяе дэманаў.
І кніжнікі гаварылі, якія прыйшлі з Ерусаліма: «Ён мае Вельзевула і праз уладара дэманаў выганяе дэманаў».
І, паклікаўшы іх, гаварыў да іх [Ісус] у прыповесьцях: «Як можа шатан выганяць шатана?
І паклікаў Ён іх, і праз прыповесці казаў: «Як можа сатана сатану выганяць?»
І калі валадарства разьдзеліцца ў сабе, ня можа ўтрымацца валадарства тое.
І калі царства падзеліцца само ў сябе, не можа ўтрымацца тое царства;
І калі дом разьдзеліцца ў сабе, ня можа ўтрымацца дом той.
і калі дом падзеліцца сам супроць сябе, не можа ўтрымацца дом той.
І калі шатан паўстаў на сябе самога і разьдзяліўся, ня можа ўтрымацца, але канец яму.
Так і сатана, калі паўстаў сам супроць сябе і падзяліўся, не можа ён утрымацца, канец яму.
Ніхто, увайшоўшы ў дом асілка, ня можа захапіць маёмасьць ягоную, калі перш ня зьвяжа асілка, і тады абрабуе дом ягоны.
Але ніхто не можа, увайшоўшы ў дом моцнага, абрабаваць яго дабро, калі спярша не звяжа моцнага і тады яго дом абрабуе.
Сапраўды кажу вам, што будуць адпушчаны сынам чалавечым усе грахі і блюзьнерствы, якімі б яны ні блюзьнілі,
Папраўдзе кажу вам: «Усё будзе даравана сынам чалавечым: грахі і блюзнерствы, якім б яны не блюзнілі;
але хто будзе блюзьніць на Духа Сьвятога, ня будзе яму адпушчана ў вякі, але падлягае асуджэньню вечнаму».
А хто зблюзніць на Духа Святога, няма яму адпушчэння навекі, і будзе вінаваты ў вечным граху.
Бо яны гаварылі: «Мае духа нячыстага».
Ды яны казалі: «Ён мае нячыстага духа».
І прыходзяць браты Ягоныя і маці Ягоная, і, стоячы вонкі, паслалі да Яго клікаць Яго.
І прыходзяць Яго Маці, і Яго браты, і стоячы звонку, паслалі да Яго паклікаць Яго,
І сядзеў кругом Яго натоўп, і сказалі Яму: «Вось, маці Твая і браты Твае вонкі, яны шукаюць Цябе».
І сядзеў вакол Яго натоўп; і кажуць Яму: «Вось Твая Маці і Твае браты [і Твае сёстры] звонку, шукаюць Цябе».
І, адказваючы ім, гаворыць: «Хто маці Мая і браты Мае?»
І ў адказ ім Ён кажа: «Хто Мая Маці і [Мае] браты?»
І, агледзеўшы наўкола тых, што каля Яго сядзелі, кажа: «Вось маці Мая і браты Мае!
І агледзеўшы тых, што сядзелі вакол Яго, кажа: «Вось Мая Маці і Мае браты!
Бо хто выконвае волю Божую, той Мне брат, і сястра, і маці».
[Бо] хто выконвае Божую волю, той Мне брат, і сястра, і Маці».
