Выхад 25 разьдзел

 

 

І сказаў Госпад Майсею, кажучы:

 

І прамовіў ГОСПАД да Майсея, кажучы:

«Скажы сынам Ізраэля, каб сабралі для Мяне дары; прыміце іх ад кожнага чалавека, які прапануе дар добраахвотна.

 

«Прамоў да сыноў Ізраіля, і няхай яны зьбяруць для Мяне дары. Ад кожнага чалавека, у якога сэрца ягонае дабраахвотна [пажадае] даць, бярыце дар Мой.

А вось тыя рэчы, якія вы павінны прыняць: золата, срэбра і медзь,

 

І вось дары, якія вы будзеце зьбіраць ад іх: золата, срэбра і медзь,

і пурпур, і гіяцынт, і чырвань, і вісон, казіную поўсць,

 

і блакіт, і пурпур, і барвовы кармазын, і вісон, і казіную [поўсьць],

і шкуры бараноў, пафарбаваныя ў чырвоны колер, і шкуры сінія, і дрэва акацыі,

 

і скуры бараноў, фарбаваныя на чырвона, і скуры тахаш, і дрэва акацыі,

алей для каганцоў, вострыя духмяныя рэчывы, каб прыгатаваць алейкі і найсаладзейшае курэнне,

 

алей для асьвятленьня, пахошчы для алею памазаньня і для пахкага каджэньня,

камяні оніксавыя і самацветы на аздабленне эфода і нагрудніка.

 

камяні оніксу і камяні для аздабленьня эфоду і нагрудніку.

І хай зробяць Мне святыню, і Я буду жыць паміж іх.

 

І няхай зробяць для Мяне сьвятыню, і Я буду жыць сярод іх.

Усё цалкам адносна скініі, як Я табе пакажу, і ўсе пасудзіны на служэнне ў ёй, зрабіць такім чынам.

 

Усё, як Я пакажу табе, паводле ўзору сялібы і паводле ўзору ўсяго начыньня яе, так і зрабіце.

Хай зробяць яны каўчэг з дрэва акацыі; даўжыня яго хай мае два локці з паловаю, шырыня — паўтара локця, вышыня таксама паўтара локця.

 

І няхай зробяць каўчэг з дрэва акацыі; два з паловаю локці даўжыня яго, і паўтары локці шырыня яго, і паўтары локці вышыня яго.

І пакрыйце яго найчысцейшым золатам знутры і звонку; і зрабі вакол яго залаты вянок,

 

І пакрыеш яго шчырым золатам; знутры і звонку пакрыеш яго; і зробіш наверсе наўкола вянок залаты.

і адальеце да яго чатыры залатыя кольцы, якія ўмацуйце на чатырох ніжніх вуглах каўчэга: два кольцы хай будуць на адным яго баку, і два — на другім.

 

І выльеш да яго чатыры колцы залатыя, і прыладзіш [іх] на чатырох кутах яго, два колцы на адным баку яго, і два колцы на другім баку яго.

Зрабі таксама з дрэва акацыі жэрдкі і пацягні іх золатам.

 

І зробіш насілы з дрэва акацыі, і пакрыеш іх золатам.

І прасунь іх у кольцы, што на абодвух баках каўчэга, каб несці яго з іх дапамогаю.

 

І ўложыш насілы ў колцы па баках каўчэгу, каб на іх насіць каўчэг.

Яны заўсёды будуць заставацца ў кольцах і не будуць ніколі з іх вымацца.

 

У колцах каўчэгу маюць быць насілы, ня будуць іх вымаць адтуль.

І ўкладзі ў каўчэг сведчанне, якое Я дам табе.

 

І ўложыш у каўчэг Сьведчаньне, якое Я дам табе.

Зрабі таксама перамольню з найчысцейшага золата: даўжыня яе хай мае два з паловаю локці, а шырыня — паўтара локця.

 

І зробіш накрыўку са шчырага золата, два локці з паловаю даўжыня яе, і паўтары локці шырыня яе.

Зрабі таксама двух херубінаў, з золата і чаканнай працы, з абодвух бакоў перамольні,

 

І зробіш двух херувімаў з золата, каванымі зробіш іх з абодвух бакоў накрыўкі.

адзін херубін хай будзе на адным баку, а другі — на другім; зрабі херубінаў на перамольні, на абодвух баках яе.

 

І зробіш аднаго херувіма на тым баку, і аднаго херувіма на гэтым баку; разам з накрыўкай зробіце херувімаў на абодвух баках яе.

Хай узнімаюць крылы ўгору і закрываюць сваімі крыламі перамольню; і хай яны глядзяць адзін на аднаго, і твары іх будуць звернуты да перамольні,

 

І будуць херувімы, распусьціўшы крылы ўгару, захінаць крыламі сваімі накрыўку, а абліччамі сваімі [будуць зьвернуты] адзін да аднаго; да накрыўкі будуць [зьвернутыя] абліччы херувімаў.

якою павінен закрывацца каўчэг, у які пакладзі сведчанне, якое Я дам табе.

 

І паложыш накрыўку на каўчэг зьверху, і ў каўчэг паложыш Сьведчаньне, якое Я дам табе.

І буду сустракацца там з табою, па-над перамольняй, паміж двух херубінаў, якія будуць над каўчэгам сведчання, буду гаварыць з табою пра ўсё, што загадаю праз цябе сынам Ізраэля.

 

І Я буду сустракацца з табою там, і гаварыць з табою з-над накрыўкі, паміж двух херувімаў, якія над Каўчэгам Сьведчаньня, пра ўсё, што буду загадваць табе для сыноў Ізраіля.

Зрабі таксама стол з дрэва акацыі, што мае два локці даўжыні, і локаць у шырыню, і паўтара локця ў вышыню.

 

І зробіш стол з дрэва акацыі, два локці даўжыня яго, локаць шырыня яго, і паўтары локці вышыня яго.

І пакрый яго найчысцейшым золатам; і зрабі на ім вакол залаты вянок.

 

І пакрыеш яго шчырым золатам, і зробіш яму вянок залаты наўкола.

Таксама зрабі для яго ліштву вышынёю ў чатыры пальцы навокал; зрабі і залаты вянок над ёю.

 

І зробіш яму наўкола ліштву [шырынёю] ў далонь, і зробіш наўкола вянок залаты да ліштвы ягонай.

Падрыхтуй чатыры залатыя кольцы і ўмацуй іх на чатырох вуглах для кожнай ножкі таго стала.

 

І зробіш для яго чатыры колцы залатыя, і прыладзіш колцы да чатырох рагоў, якія пры чатырох ножках ягоных.

На ліштве хай будуць залатыя кольцы, каб прасунуць у іх жэрдкі і каб стол можна было насіць.

 

Пры ліштвах маюць быць колцы, каб укладаць насілы і насіць стол.

А самі жэрдкі зрабі з дрэва акацыі і аздобі іх золатам, і будуць насіць з іх дапамогаю стол.

 

І зробіш насілы з дрэва акацыі, і пакрыеш іх золатам, і будуць насіць на іх стол.

Прыгатуй і чары, і фіялы, і кратэры, і кіяфы, у якіх патрэбна прыносіць узліванні — з найчысцейшага золата.

 

І зробіш да яго місы, і чашы, і збаны, і кубкі для складаньня ахвяраў вадкіх; са шчырага золата зробіш іх.

І кладзі на стол хлябы пакладныя перад абліччам Маім заўсёды.

 

І будзеш класьці на стол хлябы пакладныя перад абліччам Маім заўсёды.

Зрабі таксама падсвечнік чаканны з найчысцейшага золата. Падножжа і стрыжань яго, чары і яблыкі з кветкамі хай будуць адлітыя ў адно цэлае.

 

І зробіш сьвечнік з золата шчырага, каваным будзе зроблены сьвечнік; падстава яго, і сьцябло яго, чарачкі яго, яблыкі яго і кветкі яго маюць [выходзіць] з яго.

Шэсць галін павінны выходзіць з бакоў, тры галіны з адного боку, і тры — з другога боку.

 

І шэсьць сьцяблінаў маюць выходзіць з бакоў яго: тры сьцябліны сьвечніка з аднаго боку яго, і тры сьцябліны сьвечніка з другога боку яго.

Тры чары ў форме міндалевага дрэва з яблыкамі і з кветкамі на адной галіне; такім жа чынам тры чары ў форме міндалевага дрэва — на другой галіне, таксама з яблыкамі і кветкамі: хай гэта будзе твор з шасці галін, што павінны выходзіць са стрыжня.

 

Тры чарачкі, [падобныя] да мігдалу, з яблыкам і кветкаю, на адной сьцябліне, і тры чарачкі, [падобныя] да мігдалу, на другой сьцябліне, з яблыкам і кветкаю. Гэтак на шасьці сьцяблінах, што выходзяць са сьвечніка.

А на самім стрыжні свечніка павінны быць чатыры чары у форме міндалёвага дрэва, з яблыкамі і кветкамі.

 

А на [камлі] сьвечніка маюць быць чатыры чарачкі, падобныя да мігдалу, з яблыкам і кветкаю.

Па адным яблыку — пад кожнымі дзвюмя галінамі ў трох месцах; усіх іх, што выходзяць з аднаго стрыжня, атрымліваецца шэсць.

 

І яблык пад двума сьцяблінамі, [што выходзяць] з яго, і яблык пад двума сьцяблінамі, [што выходзяць] з яго, і яблык пад двума сьцяблінамі, [што выходзяць] з яго, на ўсіх шасьці сьцяблінах, што выходзяць са сьвечніка.

Такім чынам, яблыкі і галіны будуць з ім адным цэлым, і ўсё вычаканена з найчысцейшага золата.

 

Яблыкі іхнія і сьцябліны іхнія будуць [выходзіць] з яго; ён увесь суцэльна [мае быць] каваны са шчырага золата.

Таксама зрабі да яго сем лямп і пастаў іх на падсвечнік, каб асвятлялі пярэдні яго бок.

 

І зробіш сем лямпаў для яго, і будуць прыладжаны лямпы ягоныя, і будуць сьвяціць на пярэдні бок яго.

Таксама да яго зробіш шчыпцы для зняцця нагару, і пасудзіны, дзе збіраецца нагар, хай будуць з найчысцейшага золата.

 

І абцужкі да яго, і папяльнічкі да яго [зробіш] са шчырага золата.

З талента найчысцейшага золата трэба зрабіць падсвечнік і ўсе яго прыналежнасці.

 

З таленту золата шчырага няхай зробяць яго з усімі гэтымі прыладамі.

Глядзі, каб зрабіў паводле ўзору, які быў табе паказаны на гары.

 

І глядзі, і зрабі паводле ўзору іхняга, які Я паказаў табе на гары.