1 да Цімафея 4 разьдзел

Першае пасланьне да Цімафея
Пераклад Чарняўскага 2017 → Пераклад Яна Станкевіча

 
 

Дух, вось, адкрыта кажа, што ў апошнія часы некаторыя адступяцца ад веры і прыхіляцца да духаў спакусы і да навук дэманавых,
 
Дух жа выразьліва кажа, што ў вапошнія дні адступяць некатрыя ад гэтае веры, зважаючы на ашукных духоў і навукі дзявальскія,

крывадушна падманваючых і са спаленым сумленнем сваім,
 
У двудушнасьці ману гукаючых, із спаленым сумленьням сваім,

забараняючых жаніцца, ужываць у ежу стравы, якія стварыў Бог і даў тым, што пазналі праўду, каб дзякавалі Богу.
 
Што бароняць жаніцца, расказуюць узьдзержавацца ад ежы, каторую Бог стварыў, каб верныя й пазналыя праўду прыймалі з падзякаю.

Бо любое стварэнне Бога добрае, і нічога не трэба адкідаць, што з падзякаю прымаецца;
 
Бо кажнае стварэньне Божае добрае, і нішто ня мае быць адхінена, будучы прыймана з падзякаю,

бо ўсвячаецца яно праз слова Божае і малітву.
 
Бо пасьвячаецца словам Божым і маленьням.

Выясняючы гэта братам, будзеш добрым паслугачом Хрыста Ісуса ў словах веры і добрай навукі, якой ты заўсёды трымаўся.
 
Пакладаючы гэта перад братамі, будзеш добры слугачы Хрыста Ісуса, гадаваны словамі веры і добрай навукаю, за каторай ты пайшоў.

Недарэчных і бабскіх плётак высцерагайся. Практыкуй сябе ў пабожнасці.
 
Сьвецкіх жа а старых бабаў байкаў чурайся, але ўкладайся ў набожнасьці.

Бо цялесныя практыкаванні мала карысныя, пабожнасць жа да ўсяго прыдатная, маючы абяцанне жыцця цяперашняга і будучага.
 
Бо цялеснае ўкладаньне мала карыснае, але набожнае карыснае да ўсёга, маючы абятніцу жыцьця цяперашняга й прыйдучага.

Праўдзівае гэтае слова і вартае ўсякай увагі.
 
Слова гэтае вернае й кажнага прыйма годнае.

Бо дзеля гэтага мы працуем і ганьбаванне церпім, што спадзяёмся на Бога жывога, Які ёсць Збаўца ўсіх людзей, а ў першую чаргу верных.
 
Бо мы дзеля таго гарапашнічаем а труднімся, што спадзяемся на Бога жывога, Каторы ё Спас усіх людзёў, асабліва ж вернікаў.

Загадвай гэта і вучы.
 
Загадуй гэта й вучы.

Няхай ніхто не пагарджае тваёй маладосцю, але будзь прыкладам верным у слове, у паводзінах, у любові, у духу, у веры, у чысціні.
 
Ніхто няхай ня мае ўлегцы маладосьці твае, але будзь зразаю вернікам у слове, у паступку, у міласьці, у веры, у чысьціні.

Пакуль прыбуду, займіся чытаннем, суцяшэннем, навукаю.
 
Пакуль ня прыйду, зважай на чытаньне, навучаньне, вучэньне.

Не занядбай даравання, якое ў табе, якое дадзена табе праз прароцтва з ускладаннем рук старэйшых.
 
Не занедбавай дару ў сабе, данага табе подле прароцтва з ускладам рук старшых.

Аб гэтым думай, будзь у гэтым, каб поспех твой усім быў бачны.
 
Праз гэта рупся, будзь увесь у гэтым, каб дасьпех твой быў відавочны ўсім.

Углядайся ў сябе і тое, чаму навучаеш, трывай у гэтым; бо, так робячы, і сябе збавіш, і тых, каторыя слухаюць цябе.
 
Глядзі самога сябе й навучаньня, трывай у гэтым, бо, так робячы, спасеш самога сябе і тых, што слухаюць цябе.