Псалтыр 103 псалом
Псалтыр
Пераклад Л. Дзекуць-Малея → Пераклад Яна Станкевіча
Псальм Давідавы.Багаслаў, душа мая, Госпада, і ўсё нутро маё — імя Яго сьвятое!
Давідава. Дабраслаў, душа мая, СПАДАРА, і ўвесь нутр мой — сьвятое імя Ягонае;
Багаслаў, душа мая, Госпада і не забывайся аб тым, што Ён табе зрабіў!
Дабраслаў, душа мая, СПАДАРА і не забудзься ўсіх дабрадзействаў Ягоных;
Ён, Каторы дароўвуе табе ўсе грахі тваі, вылечвае ўсякую немач тваю,
Каторы даруе ўсі бяспраўі твае, Каторы леча ўсі хваробы твае,
Каторы жыцьцё тваё ад магілы спасае, ласкай і міласэрдзем вянчае цябе,
Каторы адкупляе жыцьцё твае ад зьнішчэньня, Каторы карануе цябе ласкаю а спагадлівасьцяй,
Каторы тваю старасьць дабром насычае, тваю моладасьць, як у арла, аднаўляе.
Каторы сыце дабром век твой і, як арліную, аднаўляе маладосьць тваю.
Справядлівасьць робіць Госпад і суд для ўсіх прыгнечаных.
Дзее справядлівасьць СПАДАР і суды ўсім уцісьненым.
Ён паказаў шляхі Свае Майсею, сыном Ізраілявым учынкі Сваі.
Ён паведаміў Масею дарогі Свае, сыном Ізраеля — учынкі Свае.
Міласэрны Госпад і добры, да гневу няскоры й шчодры на ласку.
СПАДАР спагадлівы а ласкучынюшчы, памальны да гневу а вельмі міласэрны;
Не назаўсёды Ён гневам палае і не навекі помніць ліхое.
Ня будзе заўсёды гневацца ані сердаваць вечна.
Ня водле грахоў нашых нам Ён дае і не адплачвае па правіннасьцям нашым,
Ня подле грахоў нашых зрабіў нам ані подле бяспраўяў вашых адплаціў нам;
але, як высака неба над зямлёю, так вяліка ласка Яго дзеля тых, што баяцца Яго.
Бо як высака неба над зямлёю, так дужая ласка Ягоная да тых, што баяцца Яго.
Як далёкі ад захаду ўсход, так далёка Ён нашы праступкі ад нас аддаліў.
Як далёкі ўсход ад захаду, так здаліў ад нас выступы нашы.
Як літуецца бацька над дзяцьмі, гэтак Госпад літуецца над тымі, што баяцца Яго.
Як айцец спагадае дзяцём, спагадае СПАДАР тым, што баяцца Яго;
Бо ведае Ён, з чаго зьлеплены мы, памятае, што мы — толькі пыл.
Бо Ён ведае ўхармаваньне нашае, помне, што пыл мы.
Чалавек — як трава, яго дні; як краска ў полі, так ён цьвіце.
Людзіна — як трава, дні ейныя; як кветка палявая, так яна квіціць;
Праляціць подмух ветру, і няма ўжо яго, і ўжо месца ягонае не пазнае яго.
Бо павее вецер на яе, і яе няма, і месца ейнага не пазнаюць.
Але ласка Гасподня ад веку й да веку над тымі, што баяцца Яго, і справядлівасьць Ягоная над сынамі сыноў
Але міласэрдзе СПАДАРОВА ад веку да веку да тых, што баяцца Яго, і справядлівасьць Ягоная да сыноў сыноў,
тых, што хаваюць запавет Яго ды закон Яго памятаюць, каб спаўняці яго.
Да такіх, што дзяржаць змову Ягоную, і да тых, што памятуюць прызначаньні Ягоныя, каб паўніць іх.
Госпад паставіў пасад Свой на нябёсах, і царства Ягонае над усім пануе.
СПАДАР на нябёсах прыгатаваў пасад Свой, і гаспадарства Ягонае ўсе радзе.
Багаслаўце Госпада вы, Ангелы Яго, вы, волаты сільныя, што загады Яго выпаўняеце, пакорныя голасу слова Ягонага!
Дабраслаўце СПАДАРА, ангілы Ягоныя, дужыя сілаю, поўнячыя слова Ягонае, каб слухаць гуку слова Ягонага!
Багаслаўце Госпада ўсе войскі Ягоныя, слугі Яго, што волю Яго выпаўняеце!
Дабраслаўце СПАДАРА, усі войскі Ягоныя, службіты Ягоныя, што поўніце волю Ягоную!
Багаслаўце Госпада ўсе творы Ягоныя па ўсіх месцах валадарства Яго! Багаслаў Госпада ты, мая душа!
Дабраслаўце СПАДАРА, усі творы Ягоныя, на ўсіх месцах дзяржавы Ягонае! Дабраслаў, душа мая, СПАДАРА!
