Псалтыр 103 псалом
Псалтыр
Пераклад Л. Дзекуць-Малея → Пераклад Антонія Бокуна
Псальм Давідавы.Багаслаў, душа мая, Госпада, і ўсё нутро маё — імя Яго сьвятое!
Псальм Давіда. Дабраславі, душа мая, ГОСПАДА, і ўсё нутро маё — імя Ягонае сьвятое!
Багаслаў, душа мая, Госпада і не забывайся аб тым, што Ён табе зрабіў!
Дабраславі, душа мая, ГОСПАДА і не забывайся пра ўсё, што Ён зрабіў!
Ён, Каторы дароўвуе табе ўсе грахі тваі, вылечвае ўсякую немач тваю,
Ён даруе табе ўсе беззаконьні твае, вылечвае ўсякую немач тваю,
Каторы жыцьцё тваё ад магілы спасае, ласкай і міласэрдзем вянчае цябе,
вызваляе ад магілы жыцьцё тваё, літасьцю вялікай і міласэрнасьцю карануе цябе,
Каторы тваю старасьць дабром насычае, тваю моладасьць, як у арла, аднаўляе.
насычае дабром старасьць тваю, аднаўляе, як у арла, маладосьць тваю.
Справядлівасьць робіць Госпад і суд для ўсіх прыгнечаных.
Праведнасьць чыніць ГОСПАД і суд для ўсіх прыгнечаных.
Ён паказаў шляхі Свае Майсею, сыном Ізраілявым учынкі Сваі.
Ён зрабіў вядомымі шляхі Свае Майсею, сынам Ізраіля — учынкі Свае.
Міласэрны Госпад і добры, да гневу няскоры й шчодры на ласку.
Спагадлівы і літасьцівы ГОСПАД, павольны да гневу і багаты на міласэрнасьць.
Не назаўсёды Ён гневам палае і не навекі помніць ліхое.
Не назаўсёды Ён гневам палае і ня вечна памятае ліхое.
Ня водле грахоў нашых нам Ён дае і не адплачвае па правіннасьцям нашым,
Не паводле грахоў нашых нам Ён дае і не ўчыняе з намі паводле беззаконьняў нашых,
але, як высака неба над зямлёю, так вяліка ласка Яго дзеля тых, што баяцца Яго.
бо як высока неба над зямлёю, так вялікая міласэрнасьць Ягоная да тых, што баяцца Яго,
Як далёкі ад захаду ўсход, так далёка Ён нашы праступкі ад нас аддаліў.
як далёкі ад захаду ўсход, так [далёка] Ён нашыя правіны ад нас аддаліў,
Як літуецца бацька над дзяцьмі, гэтак Госпад літуецца над тымі, што баяцца Яго.
як літуецца бацька над сынамі, так ГОСПАД літуецца над тымі, што баяцца Яго.
Бо ведае Ён, з чаго зьлеплены мы, памятае, што мы — толькі пыл.
Бо ведае Ён настаўленьне нашае, памятае, што мы — [толькі] пыл.
Чалавек — як трава, яго дні; як краска ў полі, так ён цьвіце.
Дні чалавечыя — як трава; як кветка ў полі, так ён квітнее,
Праляціць подмух ветру, і няма ўжо яго, і ўжо месца ягонае не пазнае яго.
бо пройдзе над ім вецер, і няма яго, і ўжо месца ягонае больш не пазнае яго.
Але ласка Гасподня ад веку й да веку над тымі, што баяцца Яго, і справядлівасьць Ягоная над сынамі сыноў
Але міласэрнасьць ГОСПАДА ад веку і на вякі над тымі, што баяцца Яго, і праведнасьць Ягоная — над сынамі сыноў
тых, што хаваюць запавет Яго ды закон Яго памятаюць, каб спаўняці яго.
тых, якія захоўваюць запавет Ягоны і загады Ягоныя памятаюць, каб выконваць іх.
Госпад паставіў пасад Свой на нябёсах, і царства Ягонае над усім пануе.
ГОСПАД умацаваў пасад Свой на нябёсах, і валадарства Ягонае над усім пануе.
Багаслаўце Госпада вы, Ангелы Яго, вы, волаты сільныя, што загады Яго выпаўняеце, пакорныя голасу слова Ягонага!
Дабраславіце ГОСПАДА, анёлы Ягоныя, магутныя моцаю, што выконваеце слова Ягонае, чуючы голас слова Ягонага!
Багаслаўце Госпада ўсе войскі Ягоныя, слугі Яго, што волю Яго выпаўняеце!
Дабраславіце ГОСПАДА, усе войскі Ягоныя, служыцелі Ягоныя, што выконваеце волю Ягоную!
Багаслаўце Госпада ўсе творы Ягоныя па ўсіх месцах валадарства Яго! Багаслаў Госпада ты, мая душа!
Дабраславіце ГОСПАДА, усе творы Ягоныя па ўсіх месцах панаваньня Ягонага! Дабраславі, душа мая, ГОСПАДА!
