Псалтыр 83 псалом
Псалтыр
Пераклад Л. Дзекуць-Малея → Пераклад Антонія Бокуна
Песьня. Псальм Асапавы.
Сьпеў. Псальм Асафа.
Божа! Не маўчы й не аставайся моўчкі ды ў супакоі, о Божа!
Божа! Не маўчы, і ня будзь у маўчаньні і ў супакоі, Божа!
Бо вось узварухнуліся ворагі Тваі, і ненавісьнікі Тваі паднялі галаву.
Бо вось, узварухнуліся ворагі Твае, і ненавісьнікі Твае паднялі галаву.
Проці народу Твайго куюць яны замыслы здрадніцкія і змаўляюцца проці тых, каго Ты ахоўваеш.
Супраць народу Твайго яны кнуюць [намеры] таемныя і радзяцца супраць тых, каго Ты ахоўваеш.
Яны сказалі: Вось, зьніштожым мы іх, каб яны ня былі больш народам, каб імя Ізраіля не ўспаміналася болей.
Яны сказалі: «Хадзіце і сатрэм іх між народамі, і імя Ізраіля ня будзе ўзгадвацца болей».
Бо ўрадзілі яны аднадушна і змову супраць Цябе ўчынілі:
Бо радзіліся яны аднадумна, супраць Цябе заключылі запавет
палаткі Эдомавы ды Ізмайліты, Моаб і Агаране,
намёты Эдому і Ізмаэльцы, Мааў і Агаране,
Гэбал і Аммон і Амаліх, Хвілістыны й жыхары Тыру;
Геваль і Амон, і Амалек, Філістынцы і жыхары Тыру.
і Ассур далучыўся да іх: яны падаюць руку сваю сыном Лотавым.
І Асур далучыўся да іх, стаўся ён рамяном для сыноў Лота. (Сэлях)
Зрабі-ж Ты ім тое самае, што Мадыяму, што Сысары, што Ябіну ля патоку Кіссону,
Зрабі ж Ты ім як Мадыяну, як Сісэры, як Явіну каля ручая Кішон,
якія зьніштожаны каля Эндору, сталіся гноем дзеля зямлі.
якія зьнішчаныя каля Эндору, сталіся як гной на зямлі.
Зрабі Ты з імі, з старшынямі іхнімі, як з Арэбам і Зэбам, ды з усімі князямі іх, як з Зэбам і Салманам,
Учыні з імі, з магнатамі іхнімі як з Арэвам і Зэвам, і з усімі князямі іхнімі, як з Зэвахам і Сальмунам,
якія казалі: Заўладаем загонамі Божымі!
якія казалі: «Возьмем сабе ў спадчыну сялібы Божыя!»
Мой Божа! Зрабі іх, як пыл у віхры, як салома пад ветрам!
Божа мой! Зрабі іх як [пыл у] віхуры, як салому пад ветрам!
Як агонь лясы пажырае і полымя горы апальвае,
Як агонь паліць лясы і як полымя апальвае горы,
гэтак жані Ты іх бурай Тваёю і віхрам Тваім напалохай!
гэтак Ты перасьледуй іх бурай Тваёю і віхурай Тваёй напалохай!
Напоўні сорамам твар іх, каб іменьня, о Госпадзе, шукалі Твайго.
Напоўні сорамам абліччы іхнія, і будуць шукаць імя Тваё, ГОСПАДЗЕ.
Асаром Ты іх ды спалохай навекі, каб у сораме згінулі,
Няхай будуць асаромленыя і спалоханыя навечна, няхай будуць у сораме і загінуць,
каб пазналі, што імя Тваё — Госпад, ды што Сам Ты над усёй зямлёй Найвышэйшы.
і даведаюцца, што імя Тваё — ГОСПАД, і толькі Ты — Найвышэйшы над усёй зямлёю.
