Псалтыр 37 псалом
Псалтыр
Пераклад Л. Дзекуць-Малея → Пераклад Антонія Бокуна
Псальм Давідавы.Не палай гневам на злачынцаў, не завідуй тым, што беззаконнае робяць,
Давіда. Ня гневайся, [гледзячы] на злачынцаў, не зайздросьці тым, што робяць беззаконьне,
бо яны, як трава, будуць хутка скошаны й павянуць, як зельле ў полі.
бо яны, як трава, хутка ссохнуць, і павянуць, як расьліна зялёная.
Спадзявайся на Госпада й добрае роб, жыві на зямлі і цноту хавай;
Спадзявайся на ГОСПАДА і рабі добрае, жыві на зямлі, і захоўвай вернасьць.
уцяшайся Госпадам, і Ён табе дасьць, што сэрца тваё пажадае.
Насалоджвайся ў ГОСПАДЗЕ, і Ён табе дасьць прагненьні сэрца твайго.
Пакінь Госпаду лёс свой, мей надзею ў Ім, Ён усё табе зробіць,
Аддай ГОСПАДУ шлях твой і спадзявайся на Яго, і Ён [усё] зробіць,
і справядлівасьць твая ўзыйдзе, бы раніцы сьветласьць, і праўда твая — быццам сьветласьць палудня.
і выведзе праведнасьць тваю як сьвятло, і суд твой — як белы дзень.
Ціхі будзь прад Госпадам, чакай на Яго; не распальвай гневу на тога, каму шэньціць у плянах ягоных, або хто здраду куець.
Ціхі будзь перад ГОСПАДАМ і чакай на Яго, ня гневайся на таго, хто мае посьпех на шляху сваім, на чалавека, які робіць зламыснае.
Ад гневу ўхіляйся, кінь ярасьць; не распальвайся гневам, каб благога табе не зрабіць;
Ухіліся ад гневу, пакінь ярасьць, ня гневайся, каб ты ня стаўся злачынцам,
бо злосьнікі будуць зьніштожаны, тыя-ж, што чакаюць на Госпада, будуць зямлёй валадаць..
бо злачынцы будуць зьнішчаныя, а тыя, што спадзяюцца на ГОСПАДА, возьмуць у спадчыну зямлю.
Яшчэ крыху толькі, і ня станець бязбожніка; глянеш на месца ягонае, а яго й няма!
Яшчэ крыху, і ня будзе бязбожніка; глянеш на месца ягонае, а яго няма!
А ціхія возьмуць зямлю ў валаданьне і цешыцца будуць лішкам спакою.
А пакорныя зямлю ў спадчыну возьмуць і будуць насалоджвацца ў мностве супакою.
Бязбожнік ліхое куе насупраць пабожнага ды зубамі на тога скрыгоча.
Бязбожнік задумвае ліхое супраць праведнага і скрыгоча на яго зубамі сваімі.
Госпад сьмяецца з яго, бо бача, што йдзе дзень ягоны.
Госпад сьмяецца з яго, бо бачыць, што прыходзіць дзень ягоны.
Бязбожнікі меч абнажылі і лук нацягнулі, каб нешчасьлівага й беднага ім паваліці, каб высечы тых, што йдуць простай дарогай;
Бязбожнікі выцягнулі меч і нацягнулі лук свой, каб паваліць прыгнечанага і беднага, каб замардаваць тых, у каго шлях просты.
меч іх уласнае сэрца праткне ім, і лукі ў іх паламаюцца.
Меч іхні ўвойдзе ў сэрца іхняе, і лук іхні будзе зламаны.
Малое, што мае пабожны, ляпей за багацьце многіх бязбожнікаў.
Малое ў праведніка лепшае за багацьце шматлікіх бязбожнікаў.
Бо рукі бязбожных пакрышаны будуць, пабожных жа Госпад паддзержыць.
Бо рамёны бязбожнікаў будуць скрышаныя, а праведнікаў падтрымлівае ГОСПАД.
Ведае Госпад дні беззаганных, іх спадчына будзе навекі.
Ведае ГОСПАД дні беззаганных, і спадчына іхняя будзе на вякі.
Ня будуць яны ў час ліхі асаромлены, а ў дні голаду будуць насычаны.
Ня будуць яны асаромленыя ў час ліхі, а ў дні голаду будуць насычаныя.
Бо згінуць бязбожнікі, і ворагі Госпада, як палёў тых краса, счэзнуць, як дым яны счэзнуць.
Бо загінуць бязбожнікі, і ворагі ГОСПАДА зьнікнуць, як тлустасьць авечак у дыме зьнікае.
Возьме бязбожнік у доўг — і доўгу ня верне; пабожны-ж — ён, шчодры й дае.
Бярэ бязбожнік у доўг — і [доўгу] ня верне; а праведнік літуецца і дае.
Багаслаўлёныя Госпадам зямлю ў спадчыну возьмуць, а хто выкляты Ім, тыя будуць загублены.
Бо дабраслаўлёныя [Богам] зямлю ў спадчыну возьмуць, а тыя, што праклятыя Ім, будуць зьнішчаныя.
Умацоўвае Госпад крокі чалавека, калі ўпадабае дарогі ягоныя.
ГОСПАД умацоўвае крокі чалавека, калі шлях ягоны даспадобы Яму.
Калі часам упадзе, не заб’ецца, бо Госпад руку яго падтрымае.
Калі ўпадзе, не заб’ецца, бо Госпад падтрымлівае руку ягоную.
Я быў малады й пастарэў, ды ніколі ня бачыў, каб пабожны быў кінены, каб род яго хлеба прасіў.
Я быў малады і стаўся стары, і ня бачыў, каб праведнік быў пакінуты, каб насеньне ягонае шукала хлеба.
Заўсёды ён шчодры й пазыкі дае, і род яго будзе багаслаўлёны.
Кожны дзень ён літуецца і пазычае, і насеньне ягонае мае дабраслаўленьне.
Ухіляйся ад зла і роб добрае, дык будзеш жыці навекі.
Аддаліся ад зла і рабі добрае, і будзеш жыць на вякі.
Бо Госпад любіць праўду й сьвятых Сваіх не пакіне навекі. Несправядлівыя зьнішчаны будуць, і нашчадзь бязбожных выгублена будзе.
Бо ГОСПАД любіць суд, і Ён не пакіне багабойных Сваіх, на вякі захавае іх, а насеньне бязбожнікаў будзе зьнішчана.
Пабожныя возьмуць зямлю ў валаданьне і жыць на ёй будуць навекі.
Праведнікі возьмуць у спадчыну зямлю і будуць жыць у ёй вечна.
Вусны пабожнага мудрасьць выказваюць, і язык яго праўду гаворыць.
Вусны праведніка выказваюць мудрасьць, і язык ягоны гаворыць суд.
Закон Бога ў сэрцы ягоным; яго крокі хістацца ня будуць.
Закон Бога ягонага ў сэрцы ягоным; ня будуць хістацца крокі ягоныя.
Бязбожнік сочыць за пабожным і шукае, каб зьвесьці са сьвету яго.
Бязбожнік сочыць за праведнікам і шукае, каб прывесьці да сьмерці яго.
Госпад ня дасьць яго ў рукі ягоныя, не дапусьціць, каб быў ён засуджан, як будуць з яго спаганяць.
ГОСПАД не пакіне яго ў руцэ ягонай, не асудзіць яго, калі ён будзе суджаны.
Спадзявайся на Госпада, ідзі шляхам Ягоным, дык узвысіць цябе, каб узяў ты зямлю ў валаданьне; і бязбожных загубу ты ўбачыш.
Спадзявайся на ГОСПАДА, і захоўвай шлях Ягоны, і Ён узвысіць цябе, каб ты ўзяў у спадчыну зямлю; і калі будуць зьнішчаныя бязбожнікі, ты ўбачыш.
Я бачыў бязбожніка, гордага й моцнага, быццам Ліванскія кедры,
Я бачыў бязбожніка, моцнага і разгалінаванага, быццам галінастае тутэйшае дрэва,
калі-ж (потым) праходзіў, яго ня было; шукаў я яго, але нельга было адшукаці.
але прамінуў ён, няма яго, і я шукаў яго, і не знайшоў.
Зважай на беззаганнага і ўзірайся на цнатлівага, бо будучына такога чалавека ёсьць супакой.
Зважай на беззаганнага і глядзі на правага, бо канец [гэтага] чалавека ёсьць супакой.
А адступнікі ўсе будуць зьнішчаны чыста; і насеньне бязбожных счэзьне.
А адступнікі будуць зьнішчаны чыста; і канец бязбожных — зьнішчэньне.
Збаўленьне пабожным ад Госпада, Ён — абарона іх у час бяды;
Выратаваньне праведнікаў — ад ГОСПАДА, Ён — апора іхняя ў час трывогі.
і Госпад ім памагае й спасе іх; Ён вызваліць іх ад бязбожных ды іх успаможа, бо ў Яго шукалі патолі.
ГОСПАД дапаможа ім і вызваліць іх; Ён вызваліць іх ад бязбожнікаў і збавіць іх, бо яны ў Ім маюць надзею.
