Псалтыр 33 псалом
Псалтыр
Пераклад Л. Дзекуць-Малея → Пераклад Антонія Бокуна
Псальм Давідавы.Радуйцеся ў Госпадзе, пабожныя; справядлівым выпадае выхваляць Яго.
Весяліцеся ў ГОСПАДЗЕ, праведнікі; правым пасуе хвала.
Слаўце Госпада на гусьлях, іграйце Яму на арфе дзесяціструннай!
Слаўце ГОСПАДА на гусьлях, выслаўляйце Яго на псалтыры дзесяціструнным!
Сьпявайце Яму новую песьню; крэпка ўдарайце па струнах пры радасных гуках!
Сьпявайце Яму новы сьпеў; спраўна грайце [Яму] пад трубныя гукі.
Бо праўдзівае слова Гасподняе, і ўсе ўчынкі Ягоныя верныя.
Бо слушнае слова ГОСПАДА, і ўсе творы Ягоныя верныя.
Праўду і справядлівасьць любіць Ён; ласкай Гасподняй напоўнена зямля.
Ён любіць праведнасьць і суд; міласэрнасьцю ГОСПАДА напоўнена зямля.
Словам Гасподнім створаны нябёсы, подыхам вуснаў Ягоных усе войскі іх.
Словам ГОСПАДА зроблены нябёсы, а подыхам вуснаў Ягоных — усе войскі іхнія.
Ён воды марскія зьбірае, быццам у мех, Ён кладзе іх на схоў.
Ён сабраў як капу воды марскія, Ён склаў іх у скарбніцу бяздоньняў.
Няхай усенька зямля баіцца Госпада, няхай усе жыхары сусьвету дрыжаць перад Ім.
Няхай баіцца ГОСПАДА ўся зямля, няхай дрыжаць перад Ім усе жыхары сусьвету.
Бо Ён даў загад — і сталася, Ён сказаў — і зьявілася.
Бо Ён сказаў — і сталася, Ён загадаў — і паўстала.
Госпад разьбіў мяркаваньні паганаў, зьнішчыў замыслы народаў.
ГОСПАД разьбіў намеры паганаў, запярэчыў думкам народаў.
Прысуд Гасподні вякі трывае, думкі сэрца Ягонага із роду ды ў род.
Намер ГОСПАДА будзе трываць на вякі, думкі сэрца Ягонага — з пакаленьня ў пакаленьне.
Шчасьлівы народ, Богам якога ёсьць Госпад, — народ, што Ён выбраў на ўласнасьць Сабе.
Шчасьлівы народ, у якога ГОСПАД ёсьць Бог, народ, які Ён выбраў на спадчыну для Сябе.
З неба Госпад паглядае і бачыць усіх сыноў чалавечых;
З неба ГОСПАД глядзіць, Ён бачыць усіх сыноў чалавечых;
з пасаду Свайго Ён глядзіць на ўсіх жыхараў зямлі.
з месца, дзе Ён жыве, Ён паглядае на ўсіх жыхароў зямлі.
Сэрца кожнага з іх Ён стварыў, на ўсе ўчынкі іх Ён зважае.
Ён уфармаваў сэрца кожнага з іх, Ён зважае на ўсе ўчынкі іхнія.
Ня множствам войска цар перамагае, ня сіла вялікая бароніць волата:
Ня будзе збаўлены валадар войскам вялікім, волат ня вызваліцца праз вялікую сілу сваю;
ашукаецца той, што жджэ ад каня перамогі, і ня выратуе яго веліч сілы ягонай.
ненадзейны конь для выратаваньня, і вялікая сіла ягоная ня дасьць выбаўленьня.
Запраўды, вока Гасподняе над тымі, хто баіцца Яго, хто спадзяецца на ласку Ягоную,
Вось, вока ГОСПАДА над тымі, якія баяцца Яго, якія спадзяюцца на міласэрнасьць Ягоную,
што іх душы ад сьмерці Ён вызваліць, а падчас галадухі жывымі іх захавае.
што Ён вызваліць ад сьмерці душы іхнія, і захавае жыцьцё ў [час] голаду.
Чакае душа наша Госпада: Ён — помач нам і Ён — шчыт паш.
Душа нашая чакае на ГОСПАДА; Ён — дапамога наша і шчыт наш.
Але, у Ім радуецца сэрца нашае; але, мы на імя Яго сьвятое спадзяемся.
Бо ў Ім радуецца сэрца нашае; бо мы на імя Яго сьвятое спадзяемся.
Ласка Твая, Госпадзе, хай так будзе над намі, як мы на Цябе спадзяемся!
Няхай будзе міласэрнасьць Твая, ГОСПАДЗЕ, над намі, як мы на Цябе спадзяемся!
