Псалтыр 33 псалом

Псалтыр
Пераклад Чарняўскага 2017 → Пераклад Антонія Бокуна

 
 

Весяліцеся, справядлівыя, у Госпадзе; справядлівым належыцца пахвала.
 
Весяліцеся ў ГОСПАДЗЕ, праведнікі; правым пасуе хвала.

Вызнавайце Госпада на гуслях, грайце Яму на псалтыры дзесяціструннай.
 
Слаўце ГОСПАДА на гусьлях, выслаўляйце Яго на псалтыры дзесяціструнным!

Спявайце Яму новую песню, стройна Яму грайце з ускліканнямі.
 
Сьпявайце Яму новы сьпеў; спраўна грайце [Яму] пад трубныя гукі.

Бо праўдзівае слова Божае, і ўсе справы Яго верныя.
 
Бо слушнае слова ГОСПАДА, і ўсе творы Ягоныя верныя.

Ён любіць справядлівасць і закон, зямля поўная міласэрнасці Госпада.
 
Ён любіць праведнасьць і суд; міласэрнасьцю ГОСПАДА напоўнена зямля.

Словам Госпадавым створаны нябёсы і дыханнем вуснаў Яго кожная сіла іх.
 
Словам ГОСПАДА зроблены нябёсы, а подыхам вуснаў Ягоных — усе войскі іхнія.

Быццам у мяшок, збірае Ён воды марскія, у скарбніцах складае бяздонні.
 
Ён сабраў як капу воды марскія, Ён склаў іх у скарбніцу бяздоньняў.

Хай уся зямля баіцца Бога, перад абліччам Яго хай трымцяць усе жыхары свету.
 
Няхай баіцца ГОСПАДА ўся зямля, няхай дрыжаць перад Ім усе жыхары сусьвету.

Бо Ён сказаў, і сталася; Ён загадаў і стварылася.
 
Бо Ён сказаў — і сталася, Ён загадаў — і паўстала.

Госпад разбурае намеры паганаў, пустымі робіць задумы людзей.
 
ГОСПАД разьбіў намеры паганаў, запярэчыў думкам народаў.

Намер Госпада трывае павечна, задумы Яго сэрца з роду ў род.
 
Намер ГОСПАДА будзе трываць на вякі, думкі сэрца Ягонага — з пакаленьня ў пакаленьне.

Шчасны той народ, для якога Госпад — гэта Бог, і той народ, які Ён выбраў Сабе ў спадчыну.
 
Шчасьлівы народ, у якога ГОСПАД ёсьць Бог, народ, які Ён выбраў на спадчыну для Сябе.

Госпад глядзіць з неба, бачыць усіх сыноў чалавечых.
 
З неба ГОСПАД глядзіць, Ён бачыць усіх сыноў чалавечых;

Зірнуў Ён з месца Свайго пражывання на ўсіх тых, што насяляюць зямлю.
 
з месца, дзе Ён жыве, Ён паглядае на ўсіх жыхароў зямлі.

Ён, Які ўтварыў кожнаму паасобку сэрцы іх, Які разумее ўсе справы іх.
 
Ён уфармаваў сэрца кожнага з іх, Ён зважае на ўсе ўчынкі іхнія.

Не бывае вызвалены цар вялікай сілай і не вызваліцца волат дзякуючы вялікай сіле сваёй.
 
Ня будзе збаўлены валадар войскам вялікім, волат ня вызваліцца праз вялікую сілу сваю;

Ненадзейны конь для выратавання, і вялізнай сілай сваёй не ўратуе.
 
ненадзейны конь для выратаваньня, і вялікая сіла ягоная ня дасьць выбаўленьня.

Вось вочы Госпада над тымі, што Яго баяцца, і да тых, якія спадзяюцца на Яго ласку.
 
Вось, вока ГОСПАДА над тымі, якія баяцца Яго, якія спадзяюцца на міласэрнасьць Ягоную,

Каб вырваў Ён у смерці душы іх і каб карміў іх у час голаду.
 
што Ён вызваліць ад сьмерці душы іхнія, і захавае жыцьцё ў [час] голаду.

Душа наша мае надзею на Госпада. Ён — наш памочнік і абарона,
 
Душа нашая чакае на ГОСПАДА; Ён — дапамога наша і шчыт наш.

бо ў Ім узрадуецца наша сэрца, і ў імю Яго мы знайшлі надзею.
 
Бо ў Ім радуецца сэрца нашае; бо мы на імя Яго сьвятое спадзяемся.

Дык няхай жыве міласэрнасць Твая, Госпадзе, да нас, як і мы ўскладаем надзею на Цябе.
 
Няхай будзе міласэрнасьць Твая, ГОСПАДЗЕ, над намі, як мы на Цябе спадзяемся!