Псалтыр 92 псалом

Псалтыр
Пераклад Чарняўскага 2017 → Пераклад Антонія Бокуна

 
 

Псальм. Песня. На дзень шабату.
 
Псальм. Сьпеў на дзень суботы.

Як жа добра вызнаваць Госпада і спяваць псальмы імю Твайму, Найвышэйшы!
 
Добра славіць ГОСПАДА і выслаўляць імя Тваё, Найвышэйшы!

Раніцай абвяшчаць Тваю міласэрнасць, і праўду Тваю — уначы.
 
Апавядаць раніцаю міласэрнасьць Тваю, і вернасьць Тваю — уначы,

На дзесяціструнным, і на гуслях, са спевам пад цытру.
 
на дзесяціструнным псалтыры і на гусьлях граючы.

Бо пацешыў Ты мяне, Госпадзе, Сваім стварэннем, і я буду радавацца справам рук Тваіх.
 
Бо Ты ўзьвесяліў мяне, ГОСПАДЗЕ, справамі Тваімі, творам рук Тваіх буду радавацца.

Якія ж велічныя справы Твае, Госпадзе: надзвычай глыбокімі сталіся задумы Твае!
 
Якія вялікія ўчынкі Твае, ГОСПАДЗЕ; вельмі глыбокія думкі Твае.

Неразумны чалавек не спазнае і бязглузды не зразумее гэтага.
 
Чалавек бязглузды ня будзе ведаць, і дурань не зразумее гэтага.

Няхай грэшныя разрастуцца, як трава, і будуць квітнець усе тыя, што чыняць несправядлівасць, аднак гэта будзе [ім] на згубу на векі вечныя;
 
Калі бязбожнікі зелянеюць, як трава, і ўсе ліхадзеі квітнеюць, няхай будуць яны зьнішчаны на вякі!

а Ты, Госпадзе, вечна Найвышэйшы.
 
А Ты, ГОСПАДЗЕ, узвышаны на вякі!

Бо вось, непрыяцелі Твае, Госпадзе, бо вось, непрыяцелі Твае загінуць і расцярушацца ўсе, што чыняць несправядлівасць.
 
Бо вось ворагі Твае, ГОСПАДЗЕ, бо вось ворагі Твае загінуць, і будуць расьцярушаныя ўсе ліхадзеі.

Ты ўзвысіш рог мой, як у адзінарога, атрымаў я багатае намашчэнне алейкам.
 
І Ты ўзнясеш рог мой, як у аднарога, я буду памазаны сьвежым алеем.

Вока маё з пагардаю глядзела на непрыяцеляў маіх, ды пра загубу ліхотнікаў, што паўстаюць на мяне, пра ліхадзеяў радасна слухала вуха маё.
 
Будуць глядзець вочы мае на ворагаў маіх, і пра злачынцаў, якія паўсталі супраць мяне, пачуюць вушы мае.

Справядлівы будзе квітнець, як пальма; быццам кедр лібанскі, узрасце.
 
Праведнік быццам пальма зелянее, ён расьце, як той кедр на Лібане.

Пасаджаныя ў Госпадавым доме, у дзядзінцы Бога нашага заквітнеюць.
 
Насаджаныя ў Доме ГОСПАДА зелянеюць на панадворках Бога нашага.

Будуць прыносіць плады ў старасці, сакавітыя будуць і поўныя свежасці,
 
Яны плод свой даюць і ў старасьці, яны сакавітыя і сьвежыя,

Каб вясціць, што Госпад справядлівы, прыстанішча маё, і няма несправядлівасці ў Ім.
 
каб абвяшчаць, што ГОСПАД справядлівы, Скала мая, і няма ў Ім беззаконьня.