Псалтыр 129 псалом

Псалтыр
Пераклад Чарняўскага 2017 → Пераклад Антонія Бокуна

 
 

Песня ўзыходжання. Часта нападалі на мяне з маладосці маёй; хай кажа цяпер Ізраэль,
 
Сьпеў узыходжаньня. Шмат уціскалі мяне з маладосьці маёй, — няхай скажа Ізраіль, —

часта нападалі на мяне з маладосці маёй, але не перамаглі мяне.
 
шмат уціскалі мяне з маладосьці маёй, але мяне не перамаглі.

На маёй спіне аратаі аралі, праклалі яны доўгія барозны свае.
 
На хрыбце маім аралі аратыя, праганяючы доўгія барозны свае.

Справядлівы ж Госпад разбіў каркі грэшнікаў.
 
ГОСПАД праведны, Ён расьсек вяроўкі бязбожнікаў.

Хай пасаромяцца і абернуцца назад ўсе тыя, што ненавідзяць Сіён.
 
Няхай будуць асаромленыя і адступяцца назад усе, што ненавідзяць Сыён!

Хай стануцца яны падобныя да травы на страсе, якая высахла раней, чым яе вырвуць,
 
Няхай будуць яны, як трава на даху, якая раней, чым вырвуць яе, засыхае,

не напоўніць ёю рукі сваёй касец, ані пазухі той, хто збірае снапы.
 
і жнец не напоўніць ёю рукі сваёй, і вязальнік снапоў — жменяў сваіх.

І не скажуць праходзячыя міма: «Дабраславенне Госпада вам! Дабраслаўляем вас у імя Госпада!»
 
І ня скажа той, што міма праходзіць: «Дабраслаўленьне ГОСПАДА няхай будзе над вамі! Дабраслаўляем вас імем ГОСПАДА!»