Псалтыр 29 псалом

Псалтыр
Пераклад Чарняўскага 2017 → Пераклад Антонія Бокуна

 
 

Давідаў. Прыносьце Госпаду, сыны Божыя, прыносьце Госпаду хвалу і магутнасць.
 
Псальм Давіда. Аддайце ГОСПАДУ, сыны Божыя, аддайце ГОСПАДУ славу і моц!

Прыносьце Госпаду хвалу імя Яго, услаўляйце Госпада ў святым ззянні.
 
Аддайце ГОСПАДУ славу імя Ягонага, пакланіцеся ГОСПАДУ ў велічы сьвятасьці!

Голас Госпада над водамі, загрымеў Бог велічы: Госпад над бязмежнымі водамі.
 
Голас ГОСПАДА над водамі; Бог славы загрымеў, ГОСПАД над водамі шматлікімі.

Голас Госпада магутны! Голас Госпада велічны.
 
Голас ГОСПАДА магутны, голас ГОСПАДА велічны.

Голас Госпада, Які ламае кедры; і паламае Госпад кедры Лібана,
 
Голас ГОСПАДА крышыць кедры, ГОСПАД крышыць кедры Лібанскія,

змушае скакаць Лібан, нібы цялятка, а Сірыён, нібы маладога адзінарога.
 
і прымушае іх скакаць, быццам цялятаў, Лібан і Сірыён, як маладых аднарогаў.

Голас Госпада, Які выкрасае агністае полымя.
 
Голас ГОСПАДА выкрасае полымя агню.

Голас Госпада, Які трасе пустыню, і патрасе Госпад пустыню Кадэс.
 
Голас ГОСПАДА ўстрасае пустыняй, ГОСПАД устрасае пустыняй Кадэш.

Голас Госпада, Які хутка дасць абрадзініцца аленіхам і аголіць гушчары, і ў святыні Яго ўсе прамовяць: «Хвала!»
 
Ад голасу ГОСПАДА лані зьлягаюць і лясы асыпаюцца, і ў сьвятыні Ягонай усё кажа: «Слава!»

Госпад трывае па-над патопам, і будзе сядзець Госпад як Валадар вечна.
 
Над патопам сядзеў ГОСПАД, і будзе сядзець ГОСПАД, як Валадар, на вякі!

Госпад дасць сілу Свайму народу, Госпад дасць дабраславенне народу Свайму ў супакоі.
 
ГОСПАД дасьць сілу народу Свайму, ГОСПАД дабраславіць народ Свой супакоем.