Псалтыр 8 псалом
Псалтыр
Пераклад Чарняўскага 2017 → Пераклад Антонія Бокуна
Кіраўніку хору. На мелодыю песні “Выціскальні...” Псальм Давідаў.
Кіраўніку хору: на лад Гітыт. Псальм Давіда.
Госпадзе, Госпад наш, якое ж дзівоснае імя Тваё па ўсёй зямлі, бо слава Твая ўзнялася вышэй нябёсаў.
ГОСПАДЗЕ, Госпадзе наш! Якое слаўнае імя Тваё па ўсёй зямлі! Слава Твая ўзьнесеная па-над нябёсы!
Праз вусны дзяцей і немаўлят учыніў Ты хвалу дзеля ворагаў Тваіх, каб утаймаваць ворага і мсціўцу.
З вуснаў немаўлятаў і тых, што пры грудзях, Ты зрабіў умацаваньне супраць ненавісьнікаў Тваіх, каб спыніць ворага і мсьціўцу.
Калі бачу нябёсы Твае, твор пальцаў Тваіх, месяц і зоркі, якія Ты заснаваў, —
Калі я гляджу на неба Тваё, твор пальцаў Тваіх, на месяц і на зоркі, якія Ты паставіў,
то што ж ёсць чалавек, што Ты памятаеш пра яго, або сын чалавечы, што Ты адведваеш яго?
я думаю: «Што ёсьць чалавек, што Ты памятаеш пра яго, і сын чалавечы, што Ты наведваеш яго?
Мала панізіў Ты яго за анёлаў, славаю і пашанаю ўвянчаў яго,
Не нашмат Ты паменшыў яго перад багамі, і славай і веліччу Ты ўкаранаваў яго,
і паставіў яго над стварэннямі рук Тваіх, і ўсё Ты кінуў пад ногі яго, —
і даў яму панаваць над творамі рук Тваіх, і ўсё Ты паклаў пад ногі яму:
авечак і быкоў усіх, і ў дадатак звяроў палявых,
авечак і валоў усіх, і зьвяроў палявых,
птушак нябесных ды рыб марскіх, і ўсё, што ходзіць па шляхах марскіх.
птушак у небе, і рыбаў у моры, і ўсё, што ходзіць сьцежкамі марскімі».
Госпадзе, Госпад наш, якое ж дзівоснае імя Тваё па ўсёй зямлі!
ГОСПАДЗЕ, Госпадзе наш! Якое слаўнае імя Тваё па ўсёй зямлі!