Псалтыр 48 псалом

Псалтыр
Пераклад Чарняўскага 2017 → Пераклад Антонія Бокуна

 
 

Песня. Псальм. Сыноў Корэ.
 
Сьпеў. Псальм сыноў Караха.

Вялікі Госпад і праслаўлены вельмі ў горадзе нашага Бога.
 
Вялікі ГОСПАД і вельмі хвалёны ў горадзе Бога нашага, на гары сьвятасьці Сваёй.

Святая гара Яго, прыгожы ўзгорак — радасць усёй зямлі. Гара Сіён, скрай поўначы, горад вялікага Валадара.
 
Прыгожае ўзьнясеньне, аздоба ўсёй зямлі, гара Сыён на схілах паўночных, горад вялікага Валадара.

Бог у дамах яго вядомы зрабіўся як прыстанішча.
 
Бог у палацах ягоных вядомы як умацаваны замак [яго].

Бо сышліся цары, сабраліся, як адзін.
 
Бо вось, валадары сабраліся, падыйшлі грамадою,

Калі ж самі ўбачылі, так здзівіліся, што стрывожыліся і ўцяклі.
 
але, угледзеўшы, аслупянелі, спалохаліся, зьбянтэжыліся.

Страх напаў там на іх і боль, быццам у парадзіхі.
 
Дрыжаньне ахапіла іх, болі, як у жанчыны, што нараджае.

Ветрам усходнім скрышыў Ты караблі Тарсіскія.
 
Ты ветрам усходнім скрышыў караблі з Таршышу.

Так, як мы спачулі, так і пабачылі ў горадзе Бога Магуццяў, у горадзе нашага Бога, Бог заснаваў яго навек.
 
Як чулі мы гэта, гэтак і бачылі ў горадзе ГОСПАДА Магуцьцяў, у горадзе Бога нашага. Бог умацаваў яго на вякі. (Сэлях)

Мы разважаем, Божа, пра Тваю міласэрнасць пасярод святыні Тваёй.
 
Мы разважаем, Божа, пра міласэрнасьць Тваю пасярод сьвятыні Тваёй.

Як імя Тваё, Божа, так і хвала Твая — да ўскрайкаў зямлі. Правіца Твая поўная справядлівасці.
 
Як імя Тваё, Божа, так і хвала Твая — аж да ўзьмежкаў зямлі; правіца Твая напоўнена праведнасьцю.

Хай весяліцца гара Сіён, хай радуюцца дочкі Юды з прычыны Тваіх судоў.
 
Весяліцца гара Сыён, радуюцца дочкі Юды дзеля судоў Тваіх.

Абыдзіце Сіён наўкола і абдыміце яго, палічыце яго вежы.
 
Станьце наўкола Сыёну, абыйдзіце вакол яго, палічыце вежы ягоныя,

Адчуйце сэрцам вашым магуцце яго і прабяжыцеся ўздоўж дамоў яго, каб расказаць іншаму пакаленню.
 
прылажыце сэрца сваё да валоў ягоных, агледзьце палацы ягоныя, каб абвясьціць пакаленьням, якія будуць,

Бо гэта і ёсць Бог, Бог наш навечна і на векі вечныя; Ён павядзе нас праз вякі.
 
што гэты Бог ёсьць Бог наш на вякі вечныя, і Ён будзе весьці нас аж да сьмерці.