Псалтыр 64 псалом

Псалтыр
Пераклад Чарняўскага 2017 → Пераклад Антонія Бокуна

 
 

Кіраўніку хору. Псальм. Давідаў.
 
Кіраўніку хору. Псальм Давіда.

Выслухай, Божа, голас мой у роздуме маім; ад страху непрыяцеля ўсцеражы душу маю.
 
Пачуй, Божа, голас мой у смутку маім! Ад страху [перад] ворагам захавай жыцьцё маё!

Захавай мяне ад зборышча ліхадзеяў, ад мноства тых, што чыняць несправядлівасць.
 
Схавай мяне ад таемных [намераў] злачынцаў, ад грамады тых, што чыняць нягоднае,

Яны востраць, быццам меч, языкі свае, накіравалі стрэлы свае, атрутныя словы,
 
якія навастрылі як меч язык свой, нацягнулі [лук са] стрэламі сваімі — горкімі словамі,

каб употай працяць стралой беззаганнага. Знянацку стрэляць яны ў яго і не пабаяцца.
 
каб страляць з засады ў беззаганнага; зьнянацку страляюць яны ў яго і не баяцца.

Умацавалі яны ў сабе нягодны намер. Змовіліся яны, каб патаемна наставіць сеці, сказалі: «Хто ўбачыць іх?»
 
Яны ўмацоўваюць сябе ў справах ліхіх; змаўляюцца пастку [наставіць] таемна; яны кажуць: «Хто гэта ўбачыць?»

Выдумляюць яны злачынствы, ажыццяўляюць прыдуманыя намеры. Унутранае чалавека і сэрца яго — бездань.
 
Яны шукаюць беззаконьня, мы гінем праз задумы беззаконныя! Бо нутро чалавека і сэрца — глыбокія [воды].

І Бог паб’е іх стрэламі; знянацку з’явяцца раны Яго.
 
І стрэліць Бог у іх стралою, зьнянацку атрымалі яны ўдар,

І зрабіў Ён бяссільнымі языкі іх. Адвернуць галовы ўсе, хто ўбачыць іх.
 
і яны спатыкнуліся праз язык свой; і ўцякаюць усе, хто іх убачыў.

І кожны чалавек будзе баяцца; і будуць абвяшчаць справы Божыя і будуць асэнсоўваць учынкі Яго.
 
І будуць баяцца ўсе людзі, і будуць апавядаць пра справы Божыя, і будуць разважаць пра тое, што Ён учыніў.

Узвесяліцца справядлівы ў Госпадзе і будзе мець у Ім надзею, і ўслаўлены будуць усе праўдзівыя сэрцам.
 
Узрадуецца праведнік у ГОСПАДЗЕ і будзе мець надзею ў Ім, і будуць хваліць Яго ўсе шчырыя сэрцам.