Псалтыр 26 псалом

Псалтыр
Пераклад Чарняўскага 2017 → Пераклад Антонія Бокуна

 
 

Давідаў. Прызнай мне, Госпадзе, справядлівасць, бо пачаў я хадзіць у бязвіннасці сваёй і не саслабею, спадзеючыся на Госпада.
 
Давіда. Судзі мяне, ГОСПАДЗЕ, бо хадзіў я ў беззаганнасьці маёй і на ГОСПАДА спадзяваўся, не хістаючыся.

Выпрабуй мяне, Госпадзе, і ўчыні мне іспыт, растапі [мне] вантробы мае і сэрца маё.
 
Выпрабуй мяне, ГОСПАДЗЕ, і дасьведчы; ачысьці ныркі мае і сэрца маё!

Бо міласэрнасць Твая ў мяне перад вачамі, і жыву я ў праўдзе Тваёй.
 
Бо міласэрнасьць Твая перад вачыма маімі, і я хаджу ў праўдзе Тваёй.

Не сядзеў я разам з мужамі марнымі, і не ўвайду разам з тымі, што дзейнічаюць спадцішка.
 
Я не сяджу з людзьмі марнымі, і з крывадушнымі ня буду хадзіць.

Узненавідзеў я зборышча злачынцаў і з бязбожнікамі разам не сядаю.
 
Я ненавіджу сходы злачынцаў, і з бязбожнікамі ня буду сядзець [разам].

У знак нявіннасці абмыю я рукі мае і абыду кругом ахвярнік Твой, Госпадзе,
 
Я абмыю ў нявіннасьці рукі мае і абыйду вакол ахвярніку Твайго, ГОСПАДЗЕ,

каб адкрыць для вушэй воклічы хвалы і паведаміць пра ўсе дзівосы Твае.
 
каб голасна дзякаваць Табе і абвяшчаць усе цуды Твае.

Палюбіў я прыстанішча дому Твайго і месца пражывання хвалы Тваёй.
 
ГОСПАДЗЕ, я палюбіў сядзібу Дому Твайго і месца Сялібы славы Тваёй.

Не губі з бязбожнікамі душы маёй і з мужамі крыважэрнымі — жыцця майго.
 
Не забяры душы маёй з грэшнікамі, ані жыцьця майго з людзьмі крывавымі,

На руках іх ліхадзействы, правіца іх поўная хабараў.
 
у руках якіх брыдота, правіца якіх напоўнена хабарамі.

Я ж пачаў хадзіць у нявіннасці сваёй, збаў мяне і пашкадуй мяне.
 
А я буду хадзіць у беззаганнасьці маёй. Вызвалі Ты мяне і зьлітуйся нада мною!

На роўнай дарозе стаіць мая нага, славіць буду Госпада ў святынях.
 
Нага мая на роўным [месцы] стаіць; у зграмаджэньнях я буду дабраслаўляць ГОСПАДА.