Псалтыр 26 псалом

Псалтыр
Пераклад Чарняўскага 2017 → Пераклад Яна Станкевіча

 
 

Давідаў. Прызнай мне, Госпадзе, справядлівасць, бо пачаў я хадзіць у бязвіннасці сваёй і не саслабею, спадзеючыся на Госпада.
 
Давідава. Судзі, СПАДАРУ, мяне, бо я хадзіў у беззаганнасьці сваёй і на СПАДАРА спадзяваўся; не пахіснуся.

Выпрабуй мяне, Госпадзе, і ўчыні мне іспыт, растапі [мне] вантробы мае і сэрца маё.
 
Выпрабуй, СПАДАРУ, мяне, спакусі мяне, пералітуй ныркі мае а сэрца мае;

Бо міласэрнасць Твая ў мяне перад вачамі, і жыву я ў праўдзе Тваёй.
 
Бо ласка Твая перад ачыма маімі, і хаджу я ў праўдзе Тваёй.

Не сядзеў я разам з мужамі марнымі, і не ўвайду разам з тымі, што дзейнічаюць спадцішка.
 
Я не сядзеў ізь сьмяротнікамі марнымі і з тымі, што прыдаюцца, не пайду.

Узненавідзеў я зборышча злачынцаў і з бязбожнікамі разам не сядаю.
 
Ненавіджу грамаду ліхадзеяў і зь нягоднымі ня сяду.

У знак нявіннасці абмыю я рукі мае і абыду кругом ахвярнік Твой, Госпадзе,
 
Абмываю ў нявіннасьці рукі свае й абходжу аброчнік Твой, СПАДАРУ,

каб адкрыць для вушэй воклічы хвалы і паведаміць пра ўсе дзівосы Твае.
 
Каб агалашаць голас удзячнасьці й абяшчаць усі дзівы Твае.

Палюбіў я прыстанішча дому Твайго і месца пражывання хвалы Тваёй.
 
СПАДАРУ, люблю я сялібу дому Твайго і месца, ідзе жывець чэсьць Твая.

Не губі з бязбожнікамі душы маёй і з мужамі крыважэрнымі — жыцця майго.
 
Ня лучы з грэшнікамі душы мае ані зь людзьмі крыві жыцьця майго,

На руках іх ліхадзействы, правіца іх поўная хабараў.
 
У чыіх руках благоцьце і чыя правіца поўная лапаноў.

Я ж пачаў хадзіць у нявіннасці сваёй, збаў мяне і пашкадуй мяне.
 
А я ў беззаганнасьці сваёй хаджу; выбаві мяне й зьмілуйся над імною.

На роўнай дарозе стаіць мая нага, славіць буду Госпада ў святынях.
 
Нага мая стаіць на роўным месцу; у зборах дабраслаўлю СПАДАРА.