Псалтыр 44 псалом
Псалтыр
Пераклад Чарняўскага 2017 → Пераклад Яна Станкевіча
Кіраўніку хору. Сыноў Корэ. Маскіль.
Кіраўніку хору. Сыноў Корыных навука.
Божа, на свае вушы мы пачулі; нашы бацькі нам расказалі пра справу, якую ўчыніў Ты ў дні іх, у дні даўнейшыя.
Божа, мы чулі вушамі сваімі, айцове нашы маўлялі нам, што за ўчынкі Ты зьдзеяў за дзён іхных, за дзён старавечных;
Ты рукой Тваёю прагнаў паганаў і насадзіў іх, вынішчыў народы і памножыў іх.
Ты рукою Сваёю выгнаў народы, але іх Ты насадзіў; патрышчыў люды і адаслаў іх;
Бо яны не сваім мячом завалодалі зямлёю і не іх плячо збавіла іх, а Твая правіца, і плячо Тваё, і святло аблічча Твайго, бо Ты іх узлюбіў.
Бо не мячом іхным спала ім зямля, ані плячо іхнае ўратавала іх, але правіца Твая а плячо Твае а сьвятліня віду Твайго; бо Ты прыяў ім.
Ты — Валадар мой і Бог мой, Які даруеш збаўленне Якубу.
Ты тый, Каторы кароль мой, Божа! раскажы спасеньне Якаву.
З Табою мы праганялі непрыяцеляў нашых і ў імя Тваё стапталі паўстаючых супраць нас.
Табою мы збадзем варагоў сваіх, зь імям Тваім патопчам паўстаючых на нас;
Бо не ў сваім луку я ўпэўнены быў, і не меч мой збаўляў мяне.
Бо не на лук свой я спадзяюся, і меч мой не ўратуе мяне;
Але Ты збавіў нас ад нападнікаў нашых і тых, што ненавідзелі нас, Ты пасарамаціў.
Але Ты вывальніў нас ад варагоў нашых і ненавідзячых нас Ты засароміў.
Цэлы дзень мы будзем пахваляцца Богам і будзем вызнаваць імя Тваё вечна.
Богам мы хвалімся цэлы дзень, і імені Твайму на векі будзем дзякаваць. Сэля.
Цяпер жа адпіхнуў Ты нас і пасарамаціў нас і не будзеш выступаць, Божа, побач з дабрадзейнасцямі нашымі.
Ты, адылі, пакінуў, засарамаціў нас, і ня выходзіш у войсках нашых;
Павярнуў Ты нас на ўцёкі перад непрыяцелямі нашымі; і тыя, што ўзненавідзелі нас, разрабавалі для сябе.
Ты павярнуў нас назад ад непрыяцеля, і ненавідзячыя глабаюць нас сабе;
На ўбой выдаў Ты нас, быццам авечак, ды між народаў расцерушыў Ты нас.
Ты аддаў нас, як авечкі, на емя, і меж народаў рассыпаў нас;
Народ Свой прадаў Ты за марную плату і не шмат здабыў Ты, прадаўшы яго.
Прадаў люд Свой задарма, не павялічыў цаны іх;
Ты выставіў нас на ганьбу нашым суседзям, на пагарджанне і на пасмешышча тым, што жывуць навокал нас.
Ты зрабіў нас зьдзекам у суседзяў нашых, пасьмехам а грэбаваньням тых, што навокал нас;
Ты выставіў нас, як прыказку між паганамі, на пагардлівае ківанне галавою між народамі.
Зрабіў нас прыказяй у народаў, ківам у людаў.
Няслава мая цэлы дзень перада мною, і сорам твару майго агарнуў мяне
Цэлы дзень ганьба мая перад імною, і сорам віду майго пакрывае мяне,
ад голасу таго, хто ўпікае мне і ўзводзіць паклёп на мяне, ад аблічча непрыяцеля і ката.
Ад голасу лаючага а вернучага, ад паглядаў непрыяцеля а помсьніка.
Усё гэта найшло на нас, мы, аднак, не забыліся пра Цябе і не ўчынілі несправядлівасці ў адносінах да запавету Твайго.
Усе гэта прышло на нас; а мы не забыліся Цябе ані схвальшавалі змовы Твае;
Усё ж не адступілася назад сэрца наша і ногі нашыя не збочылі са сцежкі Тваёй;
Сэрца нашае не адступіла назад, не адхінуліся й сігі нашыя ад сьцежкі Твае,
але Ты ўпакорыў нас у месцы лісіным і прыкрыў нас ценем смерці.
Як Ты паражаў нас на месцу шакалоў і пакрыў нас сьмяротным сьценям;
Калі б мы забыліся імя Бога нашага і калі б працягнулі рукі да боства чужога,
Калі б мы забыліся імя Бога нашага альбо выцягнулі рукі нашы да чужога бога,
ці ж бы Бог не спытаў бы з нас за гэта? Ён жа пазведаў таямніцы сэрца.
Ці не прасачыў бы Бог гэтага? бо Ён ведае тайны сэрца.
Бо дзеля Цябе забіваюць нас увесь дзень, лічаць нас авечкамі на зарэз.
За Цябе забіваюць нас кажны дзень, уважаюць нас за авечкі на зарэз.
Прабудзіся, чаму дрэмлеш, Госпадзе? Прачніся і не пакідай [нас] да канца!
Прачхніся, чаму сьпіш, Спадару? Устань, не пакінь нас назаўсёды.
Чаму адварочваеш аблічча Сваё, забываешся пра гора наша і бяду нашую?
Нашто хаваеш Ты від Свой? нашто забываешся гароту нашу а ўціск наш?
Бо ўпакорана ў попеле душа наша, цесна звязана з зямлёю чэрава наша.
Бо душа наша ўгнулася да пылу, прыліп да зямлі жывот наш.
Паўстань, Госпадзе, падтрымай нас і адкупі нас дзеля міласэрнасці Тваёй.
Устань, памажы нам, выкупі нас дзеля ласкі Свае.
