Псалтыр 118 псалом
Псалтыр
Пераклад Чарняўскага 2017 → Пераклад Яна Станкевіча
Алілуя. Вызнавайце Госпада, бо Ён добры, бо вечная міласэрнасць Яго.
Дзякуйце СПАДАРУ, бо добры, бо на векі міласэрдзе Ягонае.
Хай кажа цяпер дом Ізраэля, што Ён добры, што вечная міласэрнасць Яго.
Скажы ж, Ізраелю, што на векі міласэрдзе Ягонае;
Хай кажа цяпер дом Аарона, што вечная міласэрнасць Яго.
Скажыце ж, доме Ааронаў, што на векі міласэрдзе Ягонае;
Хай кажуць цяпер тыя, што шануюць Госпада, што вечная міласэрнасць Яго.
Скажыце ж тыя, што баіцеся СПАДАРА, што на векі міласэрдзе Ягонае.
У бядзе я звярнуўся да Госпада, і выслухаў мяне Госпад, Які выводзіць на прастору.
З-пад гароты свае я пагукаў да ЯГ, і пакволеньням адказаў імне ЯГ.
Госпад — Успаможца мой; не збаюся, бо што зробіць мне чалавек?
СПАДАР із імною, не баюся: што зробе імне чалавек?
Госпад са мною, і я з пагардаю зірну на непрыяцеляў маіх.
СПАДАР із імною меж памачнікоў маіх, — і я гляджу на тых, што ненавідзяць мяне.
Лепш бегчы да Госпада, чым спадзявацца на чалавека.
Валей уцякаць да СПАДАРА, чымся спадзявацца на чалавека.
Лепш бегчы да Госпада, чым давярацца князям.
Валей уцякаць да СПАДАРА, чымся спадзявацца на князёў.
Усе паганы абступілі мяне кругом, і вынішчыў я іх у імя Госпада.
Усі народы абступілі мяне; імям СПАДАРОВЫМ я зьнішчыў іх.
Абступаючы, акружаюць яны мяне, і вынішчыў я іх у імя Госпада.
Абступілі мяне, таксама акружылі мяне; але імям СПАДАРОВЫМ я зьнішчыў іх.
Акружылі мяне, як пчолы, і ўзгарэліся, як агонь у цернях; і вынішчыў я іх у імя Госпада.
Абступілі мяне, як пшчолы; згасьлі, як цяпло зь церняў; імям СПАДАРОВЫМ я зьнішчыў іх.
Піхаючы, штурхалі мяне, каб я паваліўся, і Госпад успамог мне.
Піхнулі мяне, каб я паваліўся; але СПАДАР памог імне.
Цвярдыня мая і хвала мая — Госпад, і стаўся Ён збаўленнем для мяне.
Сіла мая а песьня ЯГ, і стаў імне спасеньням.
Гоман услаўлення і збаўлення чуецца ў палатках справядлівых:
Гук радасьці а спасеньня ў буданох справядлівых: «Правіца СПАДАРОВА робе мужным;
«Правіца Госпада стварае магутнасць, правіца Госпада ўзвышае мяне, правіца Госпада стварае магутнасць!»
Правіца СПАДАРОВА высокая; правіца СПАДАРОВА робе мужным».
Не памру я, але буду жыць і раскажу пра справы Госпада.
Не памру, але буду жыў і буду абяшчаць учынкі ЯГ.
Караючы, пакараў мяне Госпад, але смерці мяне не аддаў.
Балюча казьнерыў мяне ЯГ, але на сьмерць не аддаў мяне.
Адчыніце мне брамы справядлівасці; увайшоўшы праз іх, вызнаваць буду Госпада.
Адчыніце імне брамы справядлівасьці; я ўвыйду ў іх і буду выхваляць ЯГ.
Гэта брама Госпада, справядлівыя ўвойдуць праз яе.
Гэта брама СПАДАРОВА; справядлівыя ўвыйдуць ёю.
Буду вызнаваць Цябе, бо Ты выслухаў мяне і стаўся збаўленнем для мяне.
Я буду выхваляць Цябе, бо Ты адказаў імне й стаў спасеньням маім.
Камень, які адкінулі будаўнікі, ён стаўся галавою вугла.
Камень, адкінены будаўнічымі стаў вугольным.
Ад Госпада гэта сталася, і дзіўна ў вачах нашых.
Ад СПАДАРА гэта сталася; чудоснае яно ў вачох нашых.
Вось жа дзень, які ўчыніў Госпад: давайце радавацца і весяліцца ў ім.
Гэта тый дзень, каторы ўчыніў СПАДАР; будзем цешыцца а весяліцца ў ім.
О, Госпадзе, збаў мяне, о, Госпадзе, дай шчаслівае жыццё!
Малю, СПАДАРУ! спасі ж, малю, СПАДАРУ, пашчасьці ж!
Дабраславёны, хто прыходзіць у імя Госпада. Дабраслаўляем вас з дому Госпада.
Дабраславёны прыходзячы ў імя СПАДАРОВА. Дабраславім вас із дому СПАДАРОВАГА.
Бог — Госпад, і Ён асвятліў нас. Падрыхтуйце ахвяру з густым веццем аж да рагоў ахвярніка.
Бог — СПАДАР, і засьвяціў нам. Прывяжыце сьвяточны аброк паварозам да рагоў аброчніка.
Ты — мой Бог, і я буду вызнаваць Цябе, Божа мой, і буду ўзвышаць Цябе.
Ты — Бог мой, і я буду выхваляці Цябе; Бог мой, я ўзьвялічу Цябе.
Вызнавайце Госпада, бо Ён добры, бо вечная міласэрнасць Яго.
Дзякуйце СПАДАРУ, бо добры, бо на векі міласэрдзе Ягонае.
