Псалтыр 124 псалом

Псалтыр
Пераклад Чарняўскага 2017 → Пераклад Яна Станкевіча

 
 

Песня ўзыходжання. Давідава. Калі б не Госпад быў з намі, хай скажа цяпер Ізраэль,
 
Песьня на ўступцох. Давідава. Калі б не СПАДАР быў із намі, — хай жа скажа Ізраель, —

Калі б не Госпад быў з намі, калі людзі паўсталі супраць нас:
 
Калі б не СПАДАР быў із намі, як паўстаў на нас чалавек,

адразу праглынулі б яны нас жывымі, калі б разгарэлася іх абурэнне на нас,
 
То жывых праглынулі б яны нас; як гнеў іхны ўзгарэўся на нас,

Напэўна, вада затапіла б нас, ручай праплыў бы праз душу нашу;
 
То воды залілі б нас, рака перайшла б над душамі нашымі;

напэўна, праплылі б праз душу нашу бурлівыя воды.
 
Тады прайшлі б над душою нашаю самадыйныя воды.

Дабраславёны Госпад, Які не даў нас на здабычу ў зубы іх.
 
Будзь дабраславёны, СПАДАРУ, што ня даў нас, як здабытак, на зубы іхныя.

Душа наша, як верабей, вырвалася з сіла птушкаловаў: сіло парвалася, а мы вызваліліся.
 
Душа наша, як птушка, уцякла з пасадкі паляўнічых; пасадка разьбіта, і мы ўцяклі.

Успамога наша ў імю Госпада, Які стварыў неба і зямлю.
 
Помач наша ў імені СПАДАРОВЫМ, Каторы ўчыніў нябёсы й зямлю.