Псалтыр 51 псалом

Псалтыр
Пераклад Чарняўскага 2017 → Пераклад Яна Станкевіча

 
 

Кіраўніку хору. Псальм. Давідаў.
 
Кіраўніку хору. Псальма Давідава,

Калі прыбыў да яго прарок Натан, пасля таго як учыніў ён грэх з Бэтсэбай.
 
Як Нафан прарока прыходзіў да яго, просьле тога, як ён увыйшоў да Бат-Шэвы.

Злітуйся нада мною, Божа, паводле міласэрнасці Тваёй; і паводле мноства літасцівасці Тваёй зруйнуй правіннасць маю.
 
Зьмілуйся над імною, Божа, подле ласкі Свае; подле множасьці міласэрдзя Свайго затры выступы мае.

Яшчэ больш абмый мяне ад правіннасці маёй і ад граху майго ачысці мяне.
 
Шмат разоў абмый мяне з бяспраўя майго і з грэху майго ачысьці мяне.

Бо я прызнаю правіннасць маю, і грэх мой заўсёды перада мною.
 
Бо выступ свой я ведаю, і мой грэх кажначасна перад імною.

Перад Табой, перад Табой адзіным зграшыў я і тое, што ліхім ёсць перад Табою, дапусціў я. Ты справядлівы у прысудзе Тваім і пераможаш на судзе Тваім.
 
Табе, Табе аднаму я ізграшыў і благое ў ваччу Тваім зрабіў, так што Ты справядлівы ў слове Сваім і беззаганны ў судзе Сваім.

Вось жа нарадзіўся я ў правіннасці, і ў граху пачала мяне маці мая.
 
Вось, у бяспраўю я створаны, у грэсе зачала мяне маці мая.

Вось жа палюбіў Ты праўду ў сэрцы і патаемна адкрыў Ты мне мудрасць.
 
Вось, Ты жадаеш праўды ў нутру і схаваную мудрасьць аб’явіў імне.

Пакрапі мяне гізопам — і стану чыстым, памый мяне — і стану бялейшы за снег.
 
Разграшы мяне гізопам, і буду чысты; абмый мяне, і буду бельшы за сьнег.

Дай мне пачуць пацеху і весялосць, і ўзрадуюцца косці, якія Ты паламаў.
 
Дай імне пачуць радасьць а весялосьць, няхай ушчоляць косьці, Табою пакрышаныя.

Адвярні аблічча Тваё ад грахоў маіх, і зруйнуй усе мае правіннасці.
 
Схавай від Свой ад грахоў маіх і ўсі бяспраўі мае затры.

Сэрца чыстае ствары ўва мне, Божа, і моцны дух аднаві ва ўлонні маім.
 
Сэрца чыстае ствары ў імне, Божа, і дух шчыры аднаві ў імне.

Не адганяй мяне ад Твайго аблічча і Духа Святога Твайго не адбірай у мяне.
 
Не адкінь мяне ад відзеньня Свайго й Духа Сьвятога Свайго не адбірай ад мяне.

Вярні мне пацеху збаўлення Твайго і самым руплівым духам узмацуй мяне.
 
Зьвярні імне радасьць спасеньня Свайго й духам ахвотным паддзяржы мяне.

Буду вучыць я збачэнцаў з Тваіх дарог, і тады бязбожнікі вернуцца да Цябе.
 
Буду вучыць выступнікаў дарогаў Тваіх, і грэшнікі да Цябе будуць наварачацца.

Вызваль мяне ад [віны пралітай] крыві, Божа, Божа збаўлення майго. Хай славіць радасна язык мой справядлівасць Тваю.
 
Вывальні мяне ад крыві, о Божа, Божа спасеньня майго, і пяяць будзе язык мой справядлівасьць Тваю.

Госпадзе, адчыні вусны мае, і вусны мае стануць апавяшчаць Тваю хвалу.
 
Адчыні вусны мае, Спадару, і мой рот выкажа хвалу Тваю.

Але ж не пацяшае Цябе ахвяра, цэласпаленне, калі прынясу яго, Табе не спадабаецца.
 
Бо Ты ня хочаш аброку; я аброк бы ўсепаленьне, Табе ня будзе прыемна.

Ахвяра Богу — дух спакутаваны; сэрца стурбаванага і пакорлівага, Божа, Ты не адцураешся.
 
Аброкі Богу — дух зломлены, сэрцам зломленым а пакрышаным Бог не пагрэбуе.

Будзь спагадлівым, Госпадзе, у Сваёй добразычлівасці да Сіёна, каб збудаваліся муры Ерузаліма.
 
Добра ўчыні Сыёну подле зычаньня Свайго, пабудуй сьцены Ерузаліму;

Тады прымеш Ты ахвяру справядлівасці, прынашэнні і цэласпаленні; тады буду складаць на ахвяру Табе цялят.
 
Тады Ты захочаш аброкаў справядлівасьці, усепаленьня а цэлых аброкаў; тады ўзьнясуць цяляты на аброчнік Твой.